2 PETRUS 1 - JANJAI BLAU Lem Bahaso Jang Bebilai

Salam

¹ Saudaro-saudaro de sungguak-sungguak pecayo awei keme! Yesus Kristus, adeba Allah ngen Rajo Penyelamat ite. Menea ite pecayo ngen-Si, Si menea de benea. Su'et yo kunei Simon Petrus suang hamba ngen rasul Yesus Kristus.

² Semoga Allah melei berkat ngen sejahtera ngen udi seca'o berlimpah, sebab udi kemnal Allah ngen Yesus, Tuhan ite.

Panggilan ngen piliak Tuhan

³ Allah bi makei kuaso ilahi-Ne utuk melei ngen ite kute de ite perlu utuk idup beribadah. Si menea yo liwet jano de ite namen tetang Yesus Kristus, de sudo menok ite utuk menikmati kebesaran ngen kebaikan-Ne.

⁴ Ngen ca'o do'oba Allah melei anugerah ngen ite berkat-berkat de kembiak luea biaso ngen bego de sudo jenanjai-Ne. Ngen berkat-berkat o udi dapet mbebas udi kunei kelok-kelok kidek de musak neak dunio yo, ngen udi temimo sifet ilahi.

⁵ Kerno o, berusahoba sungguak-sungguak supayo udi tep pecayo ngen Kristus, ngen pecayonu o tenunjang idup de baik. Seluyen idup de baik udi perlu jijai tun de temuan pengetahuan,

⁶ seluyen pengetahuan, udi harus kulo dapet kemuaso dirai. Ngen seluyen dapet kemuaso dirai lokba udi kulo mupuk dirai utuk tabah madep kute sesuaktau. Ngen seluyen tabah madep kute sesuaktau, udi harus kulo idup temurut kelok Allah.

⁷ Ngen idup temurut kelok Allah harus kulo nelkep ngen kasih sayang ngen saudaro-saudaro do imen. Selanjutne lokba kasih sayangnu ngen saudaro-saudaro do imen tenambeak ngen kasih teadep kute tun.

⁸ Kutene o adeba sifet-sifet de udi perlu. Amen sifet-sifet o ade padonu ngen berlimpah-limpah, udi bakea jijai giat ngen berasea, ngen kemnal Yesus Kristus Tuhan ite ngen lebiak baik igai.

⁹ Tapi tun de coa temuan sifet-sifet o, pandanganne kidek; si coa nam kemliak ngen si coa tinget bahwo duso-dusone de bel'o sudo nersih.

¹⁰ Sebab o, Saudaro-saudaro, beusahoba lebiak giat supayo panggilan Allah ngen Piliak-Ne das dirainu o jijai semakin teguak. Amen udi menea o, udi coa bakea murtad.

¹¹ Ngen awei yo udi bakea nelei hok penuak utuk masuk Kerajaan de kekal kunei Tuhan ngen Rajo Penyelamat ite Yesus Kristus.

¹² Sebab o, uku bogoa minget udi tetang hal tesebut, kunyau udi bi namen ngen pecayo sekilai ngen ajaran kunei Allah de bi udi temimo o.

¹³ Selamo uku masiak idup, uku meraso wajib minget udi tetang hal-hal tesebut.

¹⁴ Sebab uku namen bahwo coa an igai uku bakea teminggea dunio yo, kerno Tuhan ite Yesus Kristus sudo melei namen ngen jelas ngen uku.

¹⁵ Mako uku bakea beusaha supayo sesudo uku ninggea kulo, udi bogoa minget igai hal-hal yo.

Saksai matai keagungan Kristus

¹⁶ Pado waktau keme melei namen ngenko betapa agungne tekone Tuhan ite Yesus Kristus, keme coa begatung pado nandei-nandei. Keagungan Kristus o sudo keme kemliak ngen matai keme suang.

¹⁷ Keme berade neak di ketiko Si dihormati ngen diagungkan ngen Allah Bapa. Pado waktau o tetiuk sa'ei kunei De Mahamulio, de madeak ngen-Ne, “Diyoba Anok-Ku de Kukemasiak. Si semnang atei-Ku!”

¹⁸ Keme suang temi'uk sa'ei o teko kunei surgo ketiko keme berade besamo Si neak das tebo de sucai o.

¹⁹ Do'o sebabne keme lebiak yakin igai ngen pesen Allah de nelei namen nebai. Sebaikne udi memperhatikan pesen o, sebab pesen o awei lapu de besinea neak penan kelem sapei matai bilai timboa, ngen cahayo bitang timur besinea neak lem ateinu.

²⁰ Teutamo sekilai lokba udi inget dio: Pesen Allah de senapei tobo nebai coa buliak ditafsirkan temurut pedapet suang.

²¹ Sebab, coa perneak pesen kunei Allah nelei namen cuma das kelok manusio. Tapi Roh Allah kemuaso tun utuk semapei pesen kunei Allah suang.