2 KORINTUS 8 - JANJAI BLAU Lem Bahaso Jang Bebilai

Pelayanan kasih

¹ Saudaro-saudaro, keme lok melei namen ngen udi tetang anugerah de nelei ngen jemaat-jemaat neak Makedonia.

² Tobo'o bi cenubo ngen bebagoi derito, tapi neak tengeak-tengeak derito-derito o, tobo'o riang ngen kebiak mu'eak atei lem melei sumbangan utuk temulung tun luyen, kunyau tobo'o peset sekilai.

³ Uku bersaksai bahwo tobo'o bi melei temurut kemampuan tobo'o, bahkan lebiak kunei kemampuan tobo'o.

⁴ Tobo'o minoi nien ngen keme amen buliak tobo'o milau temulung melei sumbangan ngen umat Allah neak Yudea.

⁵ Tobo'o melei lebiak dau kuneipado de keme ma'ep. Tobo'o mulo-mulo semreak dirai ngen Tuhan, sudo'o ngen keme kulo, sesuoi ngen kelok Allah.

⁶ Sebab o, keme pakso Titus, supayo si mulau udi ngen semlesei pelayanan kasih o awei ipe si bi muloine.

⁷ Kerno o, uyo, serai awei udi kayo lem kute sesuaktau – lem imen, lem kecek, lem pengetahuan, lem sungguak-sungguak utuk mulung, ngen lem kasihnu teadep keme – awei oba kulo lokne udi kayo lem pelayanan kasih yo.

⁸ Uku madeak hal o iso sebagoi periteak, meluyen, ngen kemten usaho-usaho tun luyen utuk temulung, uku lok cemubo keikhlasan kasih udi.

⁹ Kerno udi bi kemnal anugerah Tuhan te Yesus Kristus bahwo sekilai kulo si kayo, kerno udi Si jijai peset, supayo udi jijai kayo kerno peset-Ne.

¹⁰ Dioba pendapetku tetang hal o, de mukin beguno utuknu. Memang bi sejok taun de sudo udi muloi kemerjone ngen mok keputusan utuk semleseine kulo.

¹¹ Semlesei kuloba pelaksanaanne sesuoi ngen kerelaannu, ngen neaba do'o ngen jano de ade ngen udi.

¹² Sebab amen udi rela utuk melei, mako Allah bakea temimo peleinu o das dasar jano de ade ngen ko, iso das dasar jano de coa ade ngen ko.

¹³ Uku samo sekilai coa ade maksud utuk mbebas tun luyen kunei tanggung jawab, ngen menea ko saro. Tapi kerno udi uyo yo lem keadaan serbo cukup, mako bi sepatutneba udi gemnep kekurangan tobo'o.

¹⁴ Lokba uyo yo kelebiak udi gemnep kekurangan tobo'o, kunyau kelebiak tobo'o gemnep kekurangan udi, supayo ade keseimbangan.

¹⁵ Awei ade tetulis: “Tun de melungguk dau, coa lebiak ngen tun de melungguk didik, coa ku'ang.”

Titus ngen kekuat nutus

¹⁶ Keme mucep syukur ngen Allah sebab Si bi menea Titus serai giatne ngen keme utuk temulung udi.

¹⁷ Sebab Titus iso bae rela melei kinoi keme, tapi si kulo kebiak giat lok temulung udi. Kerno si sungguak-sungguak o ba, si lalau ngen udi.

¹⁸ Besamo ngen si keme mbo kulo suang saudaro de kebiak dihormati neak kute jemaat kerno kerjono melei namen Bito Baik kunei Allah.

¹⁹ Iso do'o bae! Si kulo bi niliak jemaat-jemaat utuk kemuat keme lem pemaneu keme. Sebab keme bakea menea pemaneu utuk semapei sumbangan o, de keme nea utuk kemulioan Tuhan ngen sebagai bukti kerelaan keme.

²⁰ Keme kebiak teatei supayo jibeak ade tun de semaleak keme lem hal semapei sumbangan de lai yo.

²¹ Kerno keme meker de baik, iso bae neak adep Tuhan, tapi kulo neak adep manusio.

²² Besamo-samo ngen tobo'o keme mbo suang tun de luyen igai, adeba saudaro do imen ite, de sudo kekedau kilai keme mtes ngen ternyato bogoa berusaho utuk temulung. Uyo si tambeak berusaho kerno laine kepercayoanne ngen udi.

²³ Titus adeba kuatku de bekerjo samo ngen uku utuk udi; saudaro-saudaro do imen keme de luyen o adeba utusan jemaat-jemaat ngen suaktau kemulioan bagiak Kristus.

²⁴ Keme ma'ep udi kemten kasihnu ngen tobo'o, supayo kute jemaat namen bahwo udi mengasihi tobo'o ngen bahwo jano de keme banggakan tetang udi adeba benea.