2 KORINTUS 5 - JANJAI BLAU Lem Bahaso Jang Bebilai

¹ Kerno keme namen bahwo amen umeak – adeba awok – penan ite diem neak bumai nukea, Allah bakea semiap do umeak neak surgo bagiak ite, do penan de kekal, de iso nea tangen manusio.

² Selamo neak umeak de uyo yo, ite geruyam, kerno ite indau tinggea neak lem umeak ite de neak surgo.

³ Umeak o ba awokte de blau.

⁴ Selamo ite tinggea neak lem umeak de kunei dunio yo, ite gerunyam kerno bebante benek. Iso kerno ite lok mpas kunei awokte de kunei dunio yo, tapi kerno ite lok makei awok de kunei surgo o, supayo awokte de pacok matei yo kenuaso de idup.

⁵ De semiap ite utuk o adeba Allah suang, Allah melei Roh-Ne ngen ite sebagai jaminan.

⁶ Kerno o atei keme kuet. Keme namen bahwo selamo keme masiak tinggea neak lem awok keme yo, keme uak kunei umeak de bakea keme tinggea besamo Tuhan.

⁷ Sebab keme idup das dasar pecayo ngen Kristus, iso das dasar jano de dapet kenliak.

⁸ Do'o sebabne atei keme sabar. Keme lebiak riang keluea kunei awok keme yo, supayo dapet tinggea besamo Tuhan.

⁹ Kerno o keme berusaho sungguak-sungguak utuk semnang atei-Ne, baik waktau keme masiak ade neak umeak keme neak yo, atau neak di.

¹⁰ Sebab paset ite kute bakea mbin moi adep pengadilan Kristus, memasing bakea dapet balasan setimpal ngen plepne neak dunio yo, baik atau kidek.

Baik ngen Allah liwet Kristus

¹¹ Keme namen jano taine saben ngen Tuhan, kerno o keme berusaho menea tun yakin tetang dirai keme. Allah kebiak namen atei keme ngen te'ang, ngen uku ma'ep udi kulo kemnal keme neak lem ateinu.

¹² Ngen dio keme coa minoi udi mujai dirai keme, tapi keme lok melei kesepatan ngen udi utuk mujai keme, supayo udi dapet madep tun-tun de ombong kerno hal-hal lahiriah ngen iso batiniah.

¹³ Sebab amen keme coa kemuaso dirai, hal o adeba demi Allah ngen amen keme kemuaso dirai, hal o adeba demi udi.

¹⁴ Sebab kasih Kristus kemuaso keme, kerno keme bi namen bahwo amen suang tun bi matei utuk kute tun, mako tobo'o kutene bi matei.

¹⁵ Kristus bi matei utuk kute tun, supayo tobo'o de idup, coa igai idup utuk diraine suang, tapi utuk Si de sudo matei ngen nidup igai utuk tobo'o.

¹⁶ Sebab o, keme coa igai menilai suang tun kulo temurut ukuran manusio, uyo keme coa igai menilai-Ne awei o.

¹⁷ Jijai, api de ade neak lem Kristus, si adeba ciptaan blau: De an bi liwet, sesungguakne de blau bi teko.

¹⁸ Kutene yo kunei Allah, ngen perantaraan Kristus bi ndamoi ite ngen dirai-Ne, ngen Kristus bi melei kepercayaan pelayanan perdamaian o ngen keme.

¹⁹ Sebab neak lem Kristus, Allah ndamoi dunio ngen dirai-Ne ngen coa kemliak saleak tobo'o, Si bi melei kepercayaan bito perdamaian o nge keme.

²⁰ Jijai, keme yo utusan-utusan Kristus, awei Allah melei nasihat ngen udi liwet keme; lem gen Kristus keme minoi ngen udi: Keleiba dirainu damoi nge Allah.

²¹ Si de coa namen duso bi nea-Ne jijai duso kerno ite, supayo neak lem Si ite jijai benea.