2 KORINTUS 4 - JANJAI BLAU Lem Bahaso Jang Bebilai

Hok kunei surgo neak lem penan de kunei pitok

¹ Keme menea kerjo yo kerno Allah baik. Do'o sebabne keme coa putus asa.

² Keme coa makei ca'o-ca'o de menea selek. Keme coa lok kerjo ngen ca'o licik atau menea coa benea kecek Allah. Keme melayan Allah ngen atei baik temurut kelok-Ne. Sebab o, keme minoi kute tun kemliak keme ngen baik neak lem ateine.

³ Amen Bito Baik de keme semapei o masiak kulo coa naham, mako cuma tun-tun de gidong moi kehancuran baeba de coa paham.

⁴ Tun-tun de coa pecayo, de pekeranne bi tetutup ngen ilah zaman yo, sehinggo tobo'o coa kemliak cahayo kunei Bito Baik o de adeba gambar Allah.

⁵ Bito de keme semapei o isoba bito tetang dirai keme suang. Bito o adeba bito tetang Yesus Kristus; bahwo Si adeba Tuhan; ngen keme adeba hamba-hambanu kerno Si.

⁶ Allah de madeak, “Lokba kunei kelem timboa te'ang,” Siba de menea te'ang-Ne becahayo neak lem ateite, supayo ite dapet te'ang kunei pengetahuan tetang kemulioan Allah de keten neak papea Kristus.

⁷ Tapi hok rohani de baes o keme mbin pado dirai keme de coa bego yo de nea kunei pitok. Ngen awei o nyatoba bahwo laine kuaso o ade ngen Allah ngen iso ngen keme.

⁸ Keme senrang kunei kute pihok, tapi keme coa terjepit; keme bingung tapi coa sapei putus asa.

⁹ Dau de musuak ngen keme, tapi coa perneak keme tinggea suang dirai. Ngen kunyau cet kilai keme nokoa sapei us, tapi keme coa matei.

¹⁰ Keme bogoa mbin mateine Kristus neak lem awok keme, supayo idup Yesus kulo jijai nyato neak lem awok keme.

¹¹ Sebab keme de masiak idup yo, bogoa senreak ngen maut kerno Yesus, supayo kulo idup Yesus jijai nyato neak lem awok keme de coa kekal yo.

¹² Ngen awei o, maut giat neak lem dirai keme ngen idup giat neak lem udi.

¹³ Neak lem Alkitab ade kecek awei yo, “Uku pecayo, do'o sebabne uku miling.” Ngen awei yo keme kulo pecayo ngen sebab o keme kulo miling.

¹⁴ Keme yakin bahwo Allah de sudo midup igai Tuhan Yesus, bakea midup keme kulo ngen Yesus, ngen mbin udi ngen keme moi adep-Ne.

¹⁵ Kutene o adeba utuk kepentingannu. Sebab tambeak dau tun meding kasih Allah, tambeak dau kulo du'o syukur de senapei ngen Allah; ngen awei o Allah mulio.

Idup ngen imen

¹⁶ Do'oba sebabne keme coa putus asa. Kunyau manusio lahiriah keme tambeak merosot, tapi manusio batiniah keme jijai blau tiep bilai.

¹⁷ Sebab penderitaan de coa sebrapo yo, bakea mbin asea bagiak keme kemulioan kekal de lebiak kunei kute-kutene, uak lebiak lai kunei pado penderitaan keme.

¹⁸ Sebab keme coa kemliak hal-hal de keten, meluyen de coa keten, kerno de keten adeba sementaro, tapi de coa keten adeba kekal.