2 KORINTUS 3 - JANJAI BLAU Lem Bahaso Jang Bebilai

Pelayan-pelayan janjai de blau

¹ Jano keme muloi igai mujai dirai keme? Atau jano perlu keme awei tun-tun luyen kemten su'et pujian ngen ko atau kunei ko?

² Koba su'et pujian keme de tetulis lem atei keme, de tun namen ngen dapet baco kute tun.

³ Tobo'o suang dapet kemliak bahwo Saudaro adeba su'et de tenulis Kristus, de mbo liwet keme. Su'et o tenulis iso ngen dawat, tapi ngen Roh Allah de idup; iso kulo neak das butau tulis, tapi neak lem atei manusio.

⁴ Keme madeak awei o kerno keyakinan keme teadep Allah liwet Kristus.

⁵ Keme coa temuan sesuaktau alasan utuk madeak bahwo keme sanggup menea kerjo yo, tapi Allah de melei kemampuan o ngen keme.

⁶ Sanggup jijai pelayan-pelayan kunei suaktau janjai blau, janjai de kunei Allah, iso kunei hukum de tetulis. Sebab de tetulis o mbin matei, sedangkan Roh Allah o melei idup.

⁷ Pado waktau janjai de mbin matei o nea ngen nukir neak butau, cahayo Allah besinea teang neak papea Musa. Cahayone kebiak te'ang sehinggo bangso Israel coa sanggup kemliak papea Musa, kunyau cahayo neak papea o muloi pudea pado waktau o. Amen pelayanan o teko ngen kemulioan de awei o,

⁸ padeak lebiak lai igai kemulioan de semerto pelayanan Roh!

⁹ Amen pelayanan de mipin ngen penghukuman o mulio, padeak lebiak mulione igai pelayanan de mipin ngen pembenaran.

¹⁰ Sebeneane jano de bel'o naggap mulio, amen mbanding ngen kemulioan de mengatasi kute sesuaktau yo, samo sekilai coa temuan tai.

¹¹ Amen sesuaktau de taen cuma sementaro, kebiak te'ang, paset bae sesuaktau de kekal lebiak te'ang igai.

¹² Kerno keme temuan harapan de awei o, mako keme binai madeak awei o.

¹³ Keme coa awei Musa de temutup papeane ngen kain supayo bangso Israel coa kemliak cahayo Tuhan dong padem ngen nyep neak papeane.

¹⁴ Pekeran tobo'o bi tetutup. Sapei pado bilai yo kulo pekeren tobo'o masiak tetutup ngen selikep pado waktau tobo'o mbaco bukau-bukau tetang janjai de an. O coa tukok, kerno cumu lem Kristus selikep o nam tukok.

¹⁵ Bahkan sapei bilai yo, tiep kilai tobo'o mbaco kiteb Musa, ade kain de temutup atei tobo'o.

¹⁶ Tapi amen suang tun belek moi Tuhan, mako selikep o nemok kunei papea tun o.

¹⁷ Sebab Tuhan adeba Roh; ngen neak ipe ade Roh Tuhan, neak di ade kemerdekaan.

¹⁸ Ite kutene adeba senno kemulioan Tuhan ngen papea de coa tenutup selikep. Kerno kemulioan o tekone kunei Tuhan de adeba Roh, mako ite dong nubeak jijai awei ngen gambar-Ne, lem kemulioan de tambeak lai.