2 KORINTUS 2 - JANJAI BLAU Lem Bahaso Jang Bebilai

¹ Uku bi mok keputusan neak lem ateiku bahwo uku coa bakea teko igai ngen ko, amen tekone uku menea ko ibo.

² Sebab, amen uku menea ateinu ibo, api igai de dapet menea uku jijai riang amen iso tun de uku menea ibo o.

³ Do'ba maksud su'etku o, adeba supayo amen uku teko, jibeak uku ibo kerno tobo'o de seharusne menea uku jijai riang. Sebab uku yakin tetang udi kutene bahwo keriangku adeba kulo keriangnu.

⁴ Uku temulis ngen udi ngen atei de kebiak temes, gis ngen kemluea dau bioa matai, iso supayo udi sedih, tapi supayo udi namen kebiak laine kasihku ngen udi kutene.

Melei apun utuk tun de saleak

⁵ Amen ade tun de jijai sebab kesedihan, mako hal o si menea iso teadep uku, tapi teadep saudaro kutene atau paling coa teadep pao kunei Saudaro. Uku coa lok terlalu makso teadep si.

⁶ Bagiak tun de awei o cukupba hukuman ngen pao kunei udi.

⁷ Uyo udi harus mapun si ngen melei semangat igai ngen si supayo si jibeak terlalu sedih sapei putus asa.

⁸ Sebab o uku melei nasihat, supayo udi kemten igai ngen si bahwo udi benea-benea sayang ngen si.

⁹ Uku temulis su'et o ngen udi, maksudne utuk tes udi, jano udi bogoa motoa petunjuk-petunjuk kunei uku.

¹⁰ Amen udi melei apun ngen tun de sudo menea saleak teadepnu mako uku kulo mapun tun o. Sebab de sudo uku mapun – amen memang ade de perlu napun – do'o uku mapun neak adep Kristus utuk kebaikan udi.

¹¹ Uku menea o supayo Iblis jibeak mok kesempatan utuk kemuaso ite; sebab ite namen rencano-rencanone.

Kekhawatiran Paulus neak Troas

¹² Ketiko uku sapei neak Troas utuk melei namen Bito Baik tetang Kristus, Tuhan sudo mukok dalen utuk uku, utuk kerjo neak penan o.

¹³ Tapi ateiku coa tenang, kerno uku coa temau ngen Titus saudaro do imen. Mako uku pamit ngen tun-tun neak di o lajau lalau moi Makedonia.

Kemenangan kerno Kristus

¹⁴ Tapi syukur ngen Allah! Si bogoa mipin keme neak dalen kemenangan Kristus. Allah makei keme supayo bito tetang Kristus tesebea awei aroma de um moi ipe bae.

¹⁵ Sebab bagiak Allah keme adeba aroma de um kunei Kristus neak tengeak-tengeak tobo'o de senlamat ngen neak antaro tobo'o de benaso.

¹⁶ Teadep tun-tun de gidong moi kehancuran, keme yo awei mbon kematian de menea matei; tapi teadep tun-tun de gidong senlamat, keme awei mbon um de mbin kehidupan. Nah, api de dapet maneu tugas yo?

¹⁷ Keme coa awei dau tun de mesoa utung kunei bito Allah awei barang dagangan bae. Tujuan-tujuan keme adeba benea, sebab keme nelei tugas ngen Allah. Ngen Allah suang kemliak bahwo keme semapei bito o sebagai hamba-hamba Kristus.