2 KORINTUS 11 - JANJAI BLAU Lem Bahaso Jang Bebilai

Paulus ngen rasul-rasul palsu

¹ Padeak baikne, amen udi sabar te'adep kebodohanku de titik o. Memang udi sabar teadep uku.

² Uku indau ngen udi, awei Allah suang kulo indau ngen udi. Udi adeba awei suang semulen de masiak sucai de sudo uku jenanjai utuk nikeak ngen suang semanei, adeba Kristus.

³ Tapi uku saben, amen pekeran udi sensat kunei kesetiaan udi de sejati ngen Kristus, serai awei Hawa tergoda ngen kelicikan dung.

⁴ Sebab udi sabar bae, amen ade suang tun teko melei bito Yesus de luyen kuneipado de sudo keme melei namen, atau melei ngen udi roh de luyen de sudo udi temimo atau Bito Baik de luyen kuneipado de sudo udi temimo.

⁵ Tapi temurut pendapetku didik kulo uku coa ade ku'ang kunei pado rasul-rasul de luea biaso o.

⁶ Mukin uku ku'ang pacok miling, tapi tetang pengetahuan, uku iso tun de bodong. Do'o sudo keme melei bukti ngen udi lem kute hal.

⁷ Pado waktau uku melei namen Bito Baik kunei Allah ngen udi, uku coa minoi biaya didik kulo ngen udi. Uku nea o utuk melekat udi. Jano uku saleak?

⁸ Pado waktau uku melayan udi, uku nelei biaya ngen jemaat-jemaat luyen. Buliak nadeak uku menea jemaat-jemaat o rugai supayo dapet temulung udi.

⁹ Amen pado waktau o uku serbo kuang, uku coa perneak semaro suang tun kulo kunei udi. Kute de uku perlu seniap ngen saudaro-saudaro de teko kunei Makedonia. Uku jemago baik-baik supayo uku coa semaro udi lem hal jano bae, ngen uku bakea te'us jemago supayo do'o tep awei o.

¹⁰ Demi kebenaran Kristus lem diraiku cao dapet napus neak ipe bae kulo neak kute negrai Akhaya, kerno ajaran Kristus de benea ade ngen uku.

¹¹ Getai uku madeak awei o? Jano kerno uku coa mengasihi udi? Allah namen uku mengasihi.

¹² Jano de uku nea uyo bakea uku nea supayo “rasul-rasul” de luyen o coa temuan alasan utuk ombong ngen madeak bahwo tobo'o kerjo awei keme.

¹³ Tun-tun awei o adeba rasul-rasul palsu. Tobo'o pekerjo-pekerjo de mike tun ngen nyamar sebagoi rasul-rasul Kristus.

¹⁴ Coa sele tobo'o menea awei o, sebab Iblis suang kulo nyamar sebagoi malaikat te'ang.

¹⁵ Jijai coa aneh kulo amen pelayan-pelayan Iblis nyamar sebagoi pelayan-pelayan de menea kelok Allah. Akhirne tobo'o kulo bakea temimo balasan de setimpal ngen kute plep tobo'o.

Penderitaan Paulus sebagai rasul

¹⁶ Uku mulang debat igai: Jibeak sapei ade de manggap uku bodong. Tapi amen udi tep manggap uku awei o, temimoba uku sebagoi tun bodong supayo uku kulo buliak bangga didik.

¹⁷ Jano de uku nadeak, uku madeakne iso sebagoi tun de madeak temurut firman Tuhan, meluyen sebagai tun bodong de yakin bahwo si buliak bangga.

¹⁸ Kerno dau tun bangga seca'o duniawi, uku lok bangga kulo.

¹⁹ Sebab udi senang atei sabar te'adep tun bodong, kerno udi kebiak bijaksano:

²⁰ kerno udi sabar, amen tun mbudok udi, amen tun meras udi, amen tun kemuaso udi, amen tun ombong te'adep udi, amen tun tempok udi.

²¹ Uku selek makau bahwo keme kebiak lemah utuk menea awei o. Tapi jano de tun luyen binai ombong, uku binai kulo! (Uku miling awei tun bodong.)

²² Jano tobo'o tun Ibrani? Uku kulo tun Ibrani! Jano tobo'o tun Israel? Uku kulo tun Israel. Jano tobo'o tembo Abraham? Uku kulo tembo Abraham!

²³ Jano tobo'o pelayan Kristus? – uku madeak awei tun iloa – uku lebiak igai! Uku kerjo lebiak giat; lebiak galok neak lem sel; uku lebiak dau senikso, cet gesea matei.

²⁴ Bi lemo kilai uku senikso tun Yahudi ngen cambuk telau puluak sembilan kilai.

²⁵ Telau kilai uku cenambuk ngen tun-tun Roma, perneak kulo uku neluk ngen butau. Telau kilai kepea keme tendem neak laut, ngen debat uku terapung-apung neak laut selamo duai puluak pat jam.

²⁶ Lem pemaneuku uku cet nacam bahayo banjir ngen perapok, bahayo kunei pihok tun-tun Yahudi ngen kunei pihok tun-tun iso Yahudi; bahayo neak kota, bahayo neak benei libea, bahayo neak tengeak laut, gen bahayo kunei pihok saudaro-saudaro palsu.

²⁷ Uku kerjo keras ngen berjuang setengeak matei; cet coa tidua, coa mukmei, coa mbuk bioa, cet uku puaso, meding sengok kerno coa ade keracok ngen coa temuan penan tinggea.

²⁸ Seluyen kutene o, tiep bilai uku temes ngen keadaan kute jemaat.

²⁹ Amen ade de lemah uku kulo meding lemah. Amen ade de us moi lem duso, ateiku milau duko.

³⁰ Amen uku harus mbangga, mako uku bangga ngen hal-hal de kemten kelemahanku.

³¹ Allah, adeba Bapa kunei Yesus, Tuhante, namen bahwo uku coa mike, tepujaiba gen-Ne seke'an-ke'anne.

³² Waktau uku ade neak Damsyik, gubernur de bekuaso neak di neak beak pemeriteak Rajo Aretas, meluak tentra jago bang kota o utuk temakep uku.

³³ Tapi lem debueak keranjang uku tenu'un kunei debueak ndea neak luea tembok kota. Ngen awei o uku lolos kunei tangen gubernur o.