2 KORINTUS 10 - JANJAI BLAU Lem Bahaso Jang Bebilai

Paulus mbela pelayanan

¹ Uku, Paulus, suang tun de coa binai amen sekadep papea ngen udi, tapi binai teadep udi amen kunei ku'uak, uku minget udi demi Kristus de lemah lembut ngen ramah.

² Uku minoi ngen udi: Jibeak udi makso uku kemten kebinaiku kunei pa'ok, Sebab niatku utuk bertidak teges teadep tun-tun de madeak bahwo keme kerjo ngen tujuan-tujuan duniawi.

³ Keme memang masiak idup neak lem dunio, tapi keme berjuang das dasar tujuan duniawi.

⁴ Senatai-senatai keme lem perjuangan iso senjato duniawi, meluyen senjato de lengkap ngen kuaso Allah, de sanggup utuk mubuak benteng-benteng.

⁵ Keme matiak tiep siasat tun ngen mubuak tiep klopok de tegok ngen keangkuhan manusio utuk temtang pengenalan Allah. Keme temaen pekeran tun-tun ngen menea tobo'o takluk ngen Kristus.

⁶ Ngen amen udi bi taat ngen sepenuakne, keme siap utuk mukum kute tun de coa taat.

⁷ Lokba udi sadar ngen keadaan de sebeneane. Amen suang tun yakin bahwo si de Kristus temuan, lokba si tinget diraine suang ngen sadar bahwo keme kulo de Kristus temuan awei si.

⁸ Uku coa selek amen uku harus lebiak dau mbangga ngen kuaso de sudo nelei Tuhan ngen keme, sebab kuaso o nelei utuk temgok udi, iso utuk mubuak udi.

⁹ Uku coa lok udi meraso bahwo uku nyaben udi ngen su'et-su'et ku.

¹⁰ Tun madeak, “Su'et-su'et Paulus o tegas ngen berwibawa, tapi amen si suang ade neak tengeak-tengeak ite, pribadinya lemah ngen kecek-kecekne coa ade taine!”

¹¹ Lokne tun de awei o sadar bahwo amen keme ade neak tengeak-tengeak udi, tindakan keme tepat awei jano de keme tulis lem su'et-su'et keme.

¹² Paset bae keme coa binai mbanding atau semrai dirai keme sederajat ngen tun-tun de manggap diraine lekat. Padeak bodongne tobo'o! Tobo'o o menea ukuran suang ngen menilai suang ngen ukuran o.

¹³ Sebelekne keme coa lok mbangga keliwet batas, meluyen tep neak lem batas-batas penan kerjo de tentau Allah bagiak keme, de tesebea sapei ngen udi kulo.

¹⁴ Sebab lem melei namen Bito Baik tetang Kristus keme bi sapei ngen udi, sehinggo keme coa liwet batas penan kerjo keme, seolah-olah keme ati sapei ngen udi.

¹⁵ Keme coa mujai dirai das pekerjaan de nea tun luyen neak penan kerjo de coa ade batas utuk keme. Tapi keme ma'ep bahwo amen imennu tambeak, keme bakea dapet hormat lebiak lai igai neak antaro udi, amen mbanding ngen penan kerjo de mbatas utuk keme.

¹⁶ Ngen awei o, keme dapet melei namen Bito Baik neak daerah-daerah de lebiak uak kuneipado daerahnu ngen coa mujai das asea-asea de tun luyen dapet neak penan kerjo de mbatas utuk tobo'o.

¹⁷ “Tapi api bae de mbangga, lokba si mbangga neak lem Tuhan.”

¹⁸ Sebab iso tun de mujai dirai de taen cenubo, meluyen tun de nujai Tuhan.