1 YOHANES 5 - JANJAI BLAU Lem Bahaso Jang Bebilai

Imen maleak dunio

¹ Tun de pecayo bahwo Yesus adeba Rajo Penyelamat de jenanjai Allah, tun o adeba Anok Allah. Tun de mengasiak su'ang bapok, mengasiak anokne kulo.

² Dioba tandone, bahwo ite mengasiak anok-anok Allah, adeba amen ite mengasiak Allah serto maneu periteak-periteak-Ne

³ Sebab, mengasiak Allah taine taat ngen periteak-periteak-Ne. Periteak-periteak-Ne o coa saro.

⁴ Sebab kute Anok Allah sanggup maleak dunio. Ngen ite maleak dunio ngen imen ite

⁵ Api dapet maleak dunio? Cuma tun de pecayo bahwo Yesus adeba Anok Allah.

Saksai tetang Yesus Kristus

⁶ Yesus Kristusba de teko moi dunio ngen bio baptisan-Ne ngen daleak kematian-Ne. Si teko iso cuma ngen bioa bae tapi ngen bio ngen daleak. Roh Allah su'ang melei saksai bahwo do'o benea, sebab roh coa perneak berdusta.

⁷ Ade telau saksai, de neak surgo adeba Bapa, Firman ngen Roh Allah, ketelaune adeba do. Saksai-saksai de neak bumai adeba:

⁸ Roh Allah, bioa ngen daleak – ketelaune melei saksai de serai.

⁹ Ite pecayo ngen saksai manusio, tapi saksai Allah lebiak kuet igai. Ngen do'oba saksai de sudo nelei Allah tetang anok-Ne.

¹⁰ Sebab o, tun de pecayo ngen Anok Allah, sudo temimo saksai o neak lem ateine; tapi tun de coa pecayo ngen Allah, bi manggap amen Allah pendusta, sebab si coa pecayo jano de nadeak Allah tetang anok-Ne.

¹¹ Dioba saksai: Allah bi melei ngen ite idup sejati ngen kekal, ngen anok-Ne adeba sumber idup o.

¹² Tun de temuan Anok Allah, temuan idup o; ngen tun de coa temuan Si, coa temuan idup o.

Hidup sejati ngen kekal

¹³ Uku temulis ngen udi de pecayo ngen Anok Allah, supayo udi namen bahwo udi sudo temuan idup sejati ngen kekal.

¹⁴ Ngen ite binai madep Allah, kerno ite yakin Si kemabul du'o ite, amen ite minoi jano bae de sesuai ngen kelok-Ne.

¹⁵ Kerno ite namen bahwo Si temi'uk ite amen ite minoi ngen si, mako ite namen kulo bahwo Si melei ite jano de ite minoi kunei Si.

¹⁶ Amen udi kemliak saleak su'ang saudarone menea duso de coa sembab tun o nyep idup sejati ngen kekal, lokba udi bedu'o ngen Allah; ngen Allah melei idup o ngen si, adeba tobo'o de menea duso de coa jijai maut. Tapi ade duso de menea tun nyep idup o. Tetang hal o uku coa madeak bahwo udi harus bedu'o ngen Allah

¹⁷ Kute kejahatan adeba duso, tapi ade duso de menea tun nyep idup sejati ngen kekal o.

¹⁸ Ite namen bahwo kute tun de sudo jijai anok-anok Allah, coa bogoa menea duso, sebab Anok Allah semlamatne, ngen de jahat coa dapet menea jejano teadepne.

¹⁹ Ite namen bahwo ite de Allah temuan, kunyau kute dunio yo ade neak beak kuaso de jahat.

²⁰ Ite namen bahwo Anok Allah bi teko ngen sudo melei pengertian ngen ite, supayo ite kemnal Allah de benea. Ite idup jijai do ngen Allah de benea ngen idup jijai do ngen anok-Ne Yesus Kristus, dioba Allah de benea, ngen dioba idup sejati ngen kekal.

²¹ Anok-anokku, ne'uakba dirainu kunei patung-patung!