1 YOHANES 2 - JANJAI BLAU Lem Bahaso Jang Bebilai

Kristus penulung ite

¹ Anok-anokku! Uku temulis dio ngen udi supayo udi jibeak menea duso. Tapi amen ade de menea duso, mako ite temuan suang pembela, adeba Yesus Kristus de adea o; Si bakea minoi nien utuk ite neak adep Bapa.

² Ngen liwet Yesus Kristus o ba duso-duso ite napun. Iso duso-duso ite bae, tapi duso kute umat manusio kulo.

³ Amen ite taat ngen periteak-periteak Allah, do'o tandone bahwo ite kemnal Allah.

⁴ Tun de madeak, “Uku kemnal Allah,” tapi coa taat ngen periteak-periteak-Ne, tun o tukang mike, ngen Allah coa ade neak lem ateine.

⁵ Tapi tun de taat ngen kecek Allah, tun o mengasiak Allah seca'o sempurno. Do'oba tandone ite idup jijai do ngen Allah.

⁶ Api de madeak bahwo si idup jijai do ngen Allah, si harus idup serai awei Kristus bi idup.

Periteak de belau

⁷ Saudaro-saudaro de tecito! De uku temulis yo iso suaktau periteak de belau. Dio periteak an de sudo senapei ngen udi sejak udi muloi pecayo ngen Kristus; adeba bito kunei Allah de sudo udi temi'uk ayokne.

⁸ Kunyau awei o, periteak de uku temulis yo belau kulo; kerno kebeneane dapet kenliak neak dirai Kristus ngen dirai udi. Sebab kelem tambeak nyep ngen te'ang de benea bi muloi bersinar

⁹ Tun de madeak bahwo si ade neak lem te'ang tapi tun o masiak jengik ngen saudarone, tun o masiak ade neak lem kelem sapei uyo.

¹⁰ Tun de mengasiak saudarone, idup lem te'ang sehinggo coa ade sesuaktau ngen si de bakea menea tun luyen us lem duso.

¹¹ Tapi tun de jengik ngen saudarone, ade neak lem kelem. Si paneu neak kelem, ngen coa namen moi ipe si lalau, sebab kelem o menea si coa nam ngeliak.

¹² Uku temulis ngen udi, Anok-anok, sebab dusonu bi napun kerno Kristus.

¹³ Uku temulis ngen udi, Bapak-bapak, sebab udi kemnal Si de sudo ade sejak mulone. Uku temulis ngen udi, Tun-tun u'ai, sebab udi bi maleak de jahat.

¹⁴ Uku temulis ngen udi, Anok-anok, sebab udi kemnal Allah Bapa. Uku temulis ngen udi, Bapak-bapak sebab udi kemnal Firman de sudo ade sejak mulone. Uku temulis ngen udi, Tun-tun u'ai, sebab udi kuet. Kecek Allah ade neak lem ateinu, ngen udi bi maleak de jahat.

¹⁵ Jibeakba cito dunio yo, atau jano bae de ade neak lem dunio yo. Amen udi cito dunio, udi coa cito ngen Bapa.

¹⁶ Kute de ade neak lem dunio yo – adeba kelok tabi'at manusio de beduso, de kenliak lajau kenlokne ngen jijai ombong – kutene adeba hal-hal de asalne iso kunei Bapa, tapi kunei dunio.

¹⁷ Dunio ngen kute de ade neak lemne ngen kenlok manusio, gidong nyep. Tapi tun de temotoa kelok Allah, tep idup sapei selamo-lamone.

Musuak Kristus

¹⁸ Anok-anokku, kiamat bi pa'ok! Sudo nelei namen ngen udi ayokne bahwo musuak Kristus bakea teko; ngen uyo bi teko dau tun de musuak ngen Kristus. Do'o tandone bahwo kiamat bi pa'ok.

¹⁹ Musuak-musuak Kristus o adeba tun-tun de sudo teminggea ite, kerno tobo'o sebeneane iso tun-tun ite. Amen tobo'o tun-tun ite, paset bae tobo'o tep besamo-samo ite. Tapi tobo'o teminggea ite, supayo jelasba bahwo coa su'ang tun kulo kunei tobo'o de benea-benea termasuk kelopok ite.

²⁰ Tapi udi sudo temimo Roh Sucai kunei Yesus Kristus, do'o sebabne udi kutene kemnal ajaran de benea.

²¹ Jijai uku temulis dio ngen udi iso kerno udi coa kemnal ajaran de benea, tapi kerno udi sudo kemnalne, udi kulo namen bahwo coa ade dusta lem ajaran de benea o.

²² De berdusta adeba tun de madeak bahwo Yesus iso Rajo Penyelamat de jenanjai Allah. Tun o musuak Kristus; si coa makau Bapa atau Anok.

²³ Tun de coa makau Anok, taine coa temimo Bapa kulo. Tun de makau Anok, taine temimo Bapa kulo.

²⁴ Sebab o, bito de sudo udi temi'uk sejak udi muloi pecayo harusba udi jemago bebaik neak lem atei. Amen bito o udi kemliak bebaik, udi bakea bogoa idup jijai do ngen Anok ngen Bapa.

²⁵ Dioba de jenanjai Kristus su'ang ngen ite: idup sejati ngen kekal.

²⁶ Uku temulis dio ngen udi tetang tun-tun de gidong berusaho mike udi.

²⁷ Tapi tetang udi su'ang, Kristus bi melei Roh-Ne ngen Udi. Selamo Roh-Ne Ade ngen udi, coa perlu ade tun luyen majea udi. Sebab Roh-Ne majea udi tetang kute sesuaktau; jano de najea-Ne o benea, iso mike. Sebab o, lokba udi taat ngen jano de najea Roh o, lokba udi tep idu jijai do ngen Kristus.

²⁸ Jijai, anok-anokku, tepba idup jijai do ngen Kristus, supayo amen Si teko, ite madep Si seca'o binai, ngen coa selek.

²⁹ Udi bi namen bahwo Kristus idup temurut kelok Allah. Sebab o udi harus namen kulo bahwo tiep tun de idup temurut kelok Allah adeba anok Allah.