1 YOHANES 1 - JANJAI BLAU Lem Bahaso Jang Bebilai

Firman idup

¹ Isai su'et yo tetang firman de melei idup, adeba firman de sudo ade ayok mulone. Keme bi temi'ukne, kemliakne ngen matai keme su'ang. Keme bi kemliakne, bi megongne ngen tangen keme.

² Ketiko idup o ade, keme kemliakne. Do'oba sebabne keme melei saksai tetang si. Keme melei namen ngen udi tetang hidup sejati ngen kekal, de ade besamo Bapa, de sudo nelei ngen keme.

³ Jano de sudo keme kemliak ngen temi'uk, do'oba kulo de keme melei namen ngen udi, supayo udi ngen keme besamo-samo idup jijai do ngen Bapa ngen Anok-Ne Yesus Kristus.

⁴ Keme temulis dio supayo atei ite sungguak-sungguak riang.

Allah adeba te'ang

⁵ Dioba bito de sudo keme temi'uk kunei Anok-Ne ngen de keme melei namen ngen udi: Allah o te'ang, ngen Si coa ade kegelapan samo sekilai.

⁶ Amen ite madeak bahwo ite idup jijai do ngen Si, padahal ite idup lem kegelapan, mako ite mike baik ngen kecek-kecek atau plep.

⁷ Tapi amen ite idup neak lem teang serai awei Allah ade neak lem te'ang, mako ite idup erat, rukun do ngen de luyenne, ngen daleak Yesus, Anok-Ne, semucai ite kunei kute duso.

⁸ Amen ite madeak bahwo ite coa beduso, ite mike dirai ite su'ang; ngen Allah coa ade neak lem atei ite.

⁹ Tapi amen ite ngakau duso-duso ite ngen Allah, Si bakea melei janjai-Ne ngen menea jano de adea. Si bakea mapun duso-duso ite ngen semucai ite kunei kute saleak ite.

¹⁰ Tapi amen ite madeak bahwo ite coa beduso, ite manggap bahwo Allah mike ngen firman-Ne coa ade neak lem atei ite.