1 TIMOTIUS 5 - JANJAI BLAU Lem Bahaso Jang Bebilai

Kewajiban te'adep tun-tun do imen

¹ Jibeakba ko mengiak ngen tun de lebiak tuai kunei ko, meluyen ajokba si temi'uk kecek-keceknu seolah-olah si baknu. Anggapba tun-tun u'ai sebagai Saudaronu,

² mbei-mbei tuai sebagai indoknu ngen selawei-selawei u'ai sebagai asuaknu ngen sikep de murni.

³ Hormatba ngen rando-rando de benea-benea idup suang dirai.

⁴ Tapi amen suang rando temuan anok ngen kepau, tobo'oba de pertamo-tamo harus nelei pengertian bahwo tobo'o wajib memperhatikan keluargo tobo'o, ngen males jaso tun tuai ngen ninik tobo'o. Sebab hal o ba semnang atei Allah.

⁵ Rando de benea-benea suang dirai, ngen coa temuan keluargo de dapet murusne, cuma ma'ep ngen Allah. Lueng kelmen si terus bedu'o ngen Allah utuk minoi tulung.

⁶ Tapi rando de bi idup senang-senang, bi matei kunyau si masiak idup.

⁷ Melei nasihatba ngen rando-rando o kunyau tobo'o idup ngen bebaik.

⁸ Tapi amen ade tun de coa murus sanok Saudarone, jano igai tun-tun neak umeakne, tun o murtad, si lebiak kidek kunei tun de pecayo.

⁹ De bi masuk daftar sebagai rando, cuma tobo'o de omorne coa ku'ang kunei num puluak taun, de cuma debat temuan maten

¹⁰ ngen terbukti bi menea pekerjaan de baik, awei murus anok, temimo tun-tun temalem neak daseine, melayan tun-tun pecayo, temulung tun-tun saro, menea ngen sungguak-sungguak kute mecem pekerjaan de baik.

¹¹ Jibeak pek moi lem daftar o rando-rando de masiak u'ai. Sebab amen nafsu birahi tobo'o jijai kembiak kuet, tobo'o lok nikeak igai, ngen teminggea Kristus.

¹² Mako tobo'o saleak sebab muker janjai de nelei Allah.

¹³ Tobo'o kulo muang-muang waktau ngen keluea masuk umeak tun. Ngen de lebiak kidek igai, adeba bahwo tobo'o belajea fitneak tun luyen ngen milau urusan tun serto madeak hal-hal de coa patut nadeak.

¹⁴ Do'oba sebabne uku meluak rando-rando u'ai nikeak igai, dapet anok ngen murus umeak tanggo, supayo musuak-musuak ite coa dapet kesempatan utuk kemidek gen ite.

¹⁵ Sebab ade rando-rando de sudo tersesat motoa Iblis.

¹⁶ Amen suang selawei de percayo temuan anggota keluargone rando, lokba si temulung tobo'o sehinggo tobo'o jibeak jijai beban jemaat. Ngen awei o, jemaat dapet temulung tobo'o de benea-benea rando.

¹⁷ Pemipin jemaat de maneu tugasne ngen baik, patut nelei penghargaan duai kilai lipet, terutamo sekilai tobo'o de rajin khobah ngen ngajea.

¹⁸ Sebab lem Kiteb Sucai madeak, “Sapai de gidong melat-melat gendum utuk mpas ijat gendum kunei kaleakne, jibeakba nepem bibiane,” kulo, “Tun de bekerjo, berhok temimo upeakne”.

¹⁹ Jibeakba temimo tuduhan te'adep suang pemipin jemaat, kecuali amen ade dukungan kunei duai saksai atau lebiak.

²⁰ Tun de menea duso, harusba ten'gur neak adep kute jemaat, supayo de luyen jijai saben.

²¹ Neak adep Allah, Yesus Kristus ngen malaikat-malaikat pilihan-Ne, uku monoi nien supayo ko temotoa petunjuk-petunjuk yo ngen coa ade prasangka te'adep api bae, ngen coa mihak api bae.

²² Jibeakba gacang ige mpek tangen das suang tun utuk maket si sebagai pelayan Tuhan. Amen tun beduso, jibeak sapei terlibat lem duso o. Jenagoba dirainu supayo tep murni.

²³ Jibeakba igai mbuk bioa bae; menemba kulo didik anggur utuk supayo pencernaanne baik, sebab ko galok bolon.

²⁴ Duso kekedau tun, ayok senidang, bi keten ngen jelas. Tapi duso tun luyen tembei namen sesudone.

²⁵ Awei o kulo plep-plep baik lasung keten. Ngen de coa mudeak keten kulo, coa nam terus nunyin.