1 TIMOTIUS 3 - JANJAI BLAU Lem Bahaso Jang Bebilai

Syarat-syarat bagiak pekerjo jemaat

¹ Beneaba kecek yo, “Tun de lok kerjo utuk jemaat lok pekerjaan de mulio.”

² Kerno o, pekerjo jemaat harusba suang tun de bebaik, maten kunei do ngenyan, dapet temaen dirai, bijaksano, sopan, galok temimo tun neak umeakne, pacok majea tun,

³ jibeak tun galok mabuk, atau de galok belago. Sebelekne, si harus lemah lembut, damoi. Si coa buliak mata duitan.

⁴ Si harus namen matur umeak tanggone ngen baik, majea anok-anokne utuk taat ngen hormat ngen si.

⁵ Sebab amen tun coa namen matur umeak tanggone dewek, ka'ro si dapet matur jemaat Allah?

⁶ Suang pekerjo jemaat coa buliak tun de tembei jijai Kristen, sebab be si jijai ombong lajau keno hukuman awei Iblis bel'o.

⁷ Si harusba tun de temuan gen baik lem masyarakat; sebab amen si awei o, mako si bakea nino tun, sehinggo us moi lem perangkap Iblis.

Syarat-syarat bagiak pekerjo luyenne

⁸ Pekerjo luyenne harusba kulo tun de baik ngen tulus; coa mata duitan ngen coa galok menem anggur kembiak dau.

⁹ Tobo'o harus bepegong teguh ngen atei nurani de sucai pado ajaran kepercayaan Kristen de sudo Allah melei namen.

¹⁰ Tobo'o kulo harus ntes kileak, amen ternyato tobo'o tun baik, tembeiba tobo'o buliak mulung neak lem jemaat.

¹¹ Ngenyan-ngenyan tobo'o lokba tun terhormat, harusba kulo tun baik, iso tun de galok fitneak. Tobo'o harus temaen dirai ngen jujur lem kute hal.

¹² Pekerjo luyenne harusba maten kunei do ngenyan ngen murus anok-anokne ngen keluargone seca'o baik.

¹³ Tun-tun de temulung ngen baik neak lem jemaat, tun bakea hormat ngen jijai tambeak binai miling tetang kepercayaan tobo'o ngen Kristus.

Resio agamo te

¹⁴ Uku ma'ep coa an igai uku bakea semulau udi. Kunyau awei o, uku temulis kulo su'et yo ngen udi,

¹⁵ supayo amen uku cendok, ko bi namen awei ipe ite harus idup sebagai keluargo Allah, adeba jemaat Allah de idup. Jemaat dioba de adeba tiang penegok ngen pendukung ajaran de benea kunei Allah.

¹⁶ Coa suang kulo dapet temulok, padeak kelaine resio agamo te: Si kemten dirai lem rupo manusio, ngen de benea lem Roh, serto kenliak para malaikat. Bitone sapei neak antaro bangso-bangso, ngen Si cenayo neak kute dunio ngen naket moi surgo.