1 TIMOTIUS 2 - JANJAI BLAU Lem Bahaso Jang Bebilai

Tetang du'o jemaat

¹ Pertamo-tamo, uku minoi nien supayo kinoi, semyang, ngen du'o utuk tun-tun luyen serto ucapan mokasiak senapei ngen Allah utuk kute tun;

² utuk rajo-rajo ngen utuk kute tun de megong kuaso. Minoiba supayo ite dapet idup tenang ngen tentram utuk Allah ngen plep de patas.

³ Do'oba de baik ngen semnang atei Allah, Penyelamat ite.

⁴ Si lok supayo kute tun senlamat ngen namen de benea.

⁵ Sebab, cuma ade do Allah, ngen cuma do penengeak antaro Allah ngen manusio, adeba Kristus Yesus.

⁶ Si suang manusio de sudo semreak dirai-Ne utuk mbebas kute tun kunei duso-duso tobo'o. Ngen o Allah kemten pado waktau de tepat, bahwo Si lok kunyau kute tun senlamat.

⁷ Ngen do'oba sebabne uku neluak lalau ngen tun-tun iso Yahudi utuk melei namen ngen tobo'o bito tetang kepercayaan de benea. Lajau uku coa mike.

⁸ Uku lok supayo neak ipe bae semanei bedu'o ngen atei de sucai, coa pakei mengiak ngen selisiak.

⁹ Awei o kulo lokne selawei berias ngen sederhano ngen makei keracok de sopan. Jibeak makei potongan buk de nyolok atau makei perhiasan emas, mutiaro, atau keracok de la'ang-la'ang.

¹⁰ Sebelekne, lokba selawei berias ngen plep-plep de baik awei de patut utuk selawei de beribadah ngen Allah.

¹¹ Seharusneba selawei belajea diem dirai ngen taat.

¹² Uku coa melei izin selawei ngajea ngen meriteak semanei; tobo'o harus diem.

¹³ Sebab de pertamo-tamo cenipto adeba Adam, sudo'o tembei Hawa.

¹⁴ Isone Adam de tergoda, tapi Hawaba de tergoda ngen jijai beduso.

¹⁵ Tapi selawei bakea senlamat kerno melaher anok, asl si tep pecayo ngen Kristus, tep mengasihi tun luyen serto idup cuma utuk Allah.