1 TESALONIKA 5 - JANJAI BLAU Lem Bahaso Jang Bebilai

Bejago-jago

¹ Saudaro-saudaro, coa perlu keme temulis ngen udi tengen waktaune de tepat hal-hal o bakea tejijai.

² Sebab udi suang namen ngen jelas bahwo Bilai tekone Tuhan o bakea teko awei pencuri teko pado bilai kelmen

³ Amen tun madeak, “Kutene aman ngen tentram,” mako pado waktau o ba tetibo tobo'o bakea ditimpa kebinasoan, ngen coa suang tun kulo dapet lolos. Hal o bakea tejijai tetibo, awei suang selawei meding gis waktau lok melaher.

⁴ Tapi udi, Saudaro-saudaro, udi coa idup neak lem kelem sehinggo bilai o tetibo magea ko awei suang risau.

⁵ Saudaro kutene adeba tun de idup lem te'ang; udi adeba anok-anok te'ang ngen anok-anok lueng. Ite isoba tun-tun kelmen atau tun-tun kelem.

⁶ Sebab o ite coa buliak tidua bae awei tun luyen. Ite harus waspada ngen pekeran te harus te'ang.

⁷ Pado bilai kelmen tun tidua, ngen pado bilai kelmen kulo tun jijai mabuk.

⁸ Tapi ite, de adeba tun-tun lueng, sebab o pekeran ite harus te'ang. Ite harus tep pecayo ngen Tuhan ngen mengasihi tun-tun luyen serto ma'ep ngen yakin bahwo Allah bakea semlamat ite. Do'oba senatai de melindungi ite lem perjuangan melawen kelem.

⁹ Allah miliak ite iso utuk nukum, tapi utuk senlamat-Ne liwet Tuhan te Yesus Kristus.

¹⁰ Si matei utuk ite supayo pado waktau Si teko be – teak ite masiak idup, teak ite bi matei – ite dapet idup besamo Si.

¹¹ Kerno'o, lokba udi tep samo-samo ndukung ngen samo-samo melei semangat, serai de udi gidong menea uyo.

Nasehat

¹² Saudaro-saudaro, keme minoi nien supayo udi hormat ngen tobo'o de kerjo neak tengeak-tengeak udi; adeba tobo'o de niliak Tuhan utuk mipin ngen melei nasehat ngen udi.

¹³ Meneaba tobo'o ngen sehormat-hormatne, ngen kasih kerno minget jano de tobo'o menea. Hidupba ngen damoi.

¹⁴ Keme minoi kulo, Saudaro-saudaro, tena'okba bebaik tun de coa lok kerjo, hiburba atei tobo'o de saben, tulungba tun de perlu tenulung ngen sabarba te'adep kute tun.

¹⁵ Jagoba supayo jibeak ade de males kejahatan ngen kejahatan. Berusahoba utuk menea baik, suang ngen de luyen ngen kute tun.

¹⁶ Lokba udi bogoa riang,

¹⁷ tepba bedu'o

¹⁸ mucep syukurba lem kute hal, sebab do'oba de Allah kenlok kunei udi sebagai tun de idup jijai do ngen Kristus Yesus.

¹⁹ Jibeakba madem Roh Allah.

²⁰ Jibeakba manggep cayeak bito-bito de nelei Roh Allah.

²¹ Kute sesuaktau harus nujai, ngen de baik harus tenotoa.

²² Neu'akba kute mecem kejahatan.

²³ Semoga Allah suang de melei ite sejahtera, jemijai udi tun de sungguak-sungguak idup cuma utuk Allah. Semoga Allah jemago dirainu kutene, baik roh, jiwo ataupun awoknu, sehinggo coa ade cacetne pado waktau Tuhan te Yesus Kristus teko igai.

²⁴ Allah de sudo menok udi, bakea menea hal o sebab Si setia.

²⁵ Denu'oba keme, Saudaro-saudaro!

²⁶ Semapeiba salam keme ngen kute Saudaro do imen seca'o mesra.

²⁷ Das kuaso Tuhan, uku minoi nien supayo udi mbaco su'et yo ngen kute Saudaro do imen.

²⁸ Anugerah Yesus Kristus, Tuhan te, semerto udi! Hormat keme, Paulus