1 TESALONIKA 2 - JANJAI BLAU Lem Bahaso Jang Bebilai

Kerjo Paulus neak Tesalonika

¹ Saudaro-saudaro! Udi suang namen bahwo keme teko ngen udi coa sesio.

² Udi namen bahwo ayok keme teko ngen udi neak Tesalonika, keme bi senikso ngen nino neak Filifi. Tapi kunyau dau tun melawen keme, Allah ite bi melei keme kebinai utuk melei namen ngen udi Bito Baik de asalne kunei pado-Ne.

³ Nasehat keme ngen udi iso kunei kekeliruan; atau kunei maksud de coa benea atau utuk mike.

⁴ Coa! Keme coa miling utuk semnang atei tun, tapi utuk semnang atei Allah, de cemubo atei keme. Sebab Allah manggap keme patas utuk melei namen Bito Baik o.

⁵ Udi suang namen bahwo coa perneak keme ceicak baik atau mike udi utuk munyin maksud-maksud tamak. Allah saksaine!

⁶ Keme kulo coa berusaho utuk nujai tun – baik kunei udi atau kulo kunei tun luyen. Sebeneane sebagai rasul Kristus, keme buliak bae temutut sesuaktau kunei udi.

⁷ Tapi keme besikap lemah lembut sewaktau ade neak tengeak-tengeak udi, awei suang indok murus ngen tlusik anokne.

⁸ Kerno keme kembiak sayang keme siap melei namen ngen udi iso bae Bito Baik de kunei Allah o, tapi idup keme kulo. Sebab keme kembiak mengasihi udi!

⁹ Paset udi masiak tinget awei ipe keme berusaho ngen berjuang. Lueng kelmen keme bekerjo supayo keme coa semaro suang tun kulo kunei udi sewaktau keme melei namen Bito Baik de kunei Allah o ngen udi.

¹⁰ Keme idup ngen sucai, benea ngen coa ade cacet te'adep udi de sudo pecayo ngen Kristus. Udiba saksai-saksai keme, awei o kulo Allah.

¹¹ Udi namen bahwo keme manggap udi awei suang bapok te'adep anok-anokne.

¹² Keme melei nasihat ngen udi, keme melei semangat ngen udi, ngen keme pakso udi supayo idup awei o sehinggo semnang atei Allah. Kerno Allah bi menok udi utuk jijai warga Dunio Blau Allah ngen meding kemulioan-Ne.

¹³ Ade igai do hal luyen de menea keme bogoa mucep mokasiak ngen Allah. Hal o adeba, bahwo pado waktau keme semapei bito kunei Allah, udi temi'uk ngen temimo bito o iso sebagai bito kunei manusio, tapi sebagai bito de benea-benea kunei Allah. Siba de gidong kerjo lem dirainu de pecayo ngen Kristus.

¹⁴ Saudaro-saudaro, hal de udi meding bi nding kulo jemaat-jemaat Allah neak Yudea de jijai de Kristus Yesus temuan. Udi meding saro kunei pihok bangsonu suang, serai awei de nding jemaat-jemaat Allah neak Yudea o kunei pihak tun-tun Yahudi.

¹⁵ Bahkan tun-tun Yahudi o de bi munuak Tuhan Yesus ngen para nebai, bi semikso keme. Tobo'o musuak ngen kute tun, Allah samo sekilai coa senang ngen tobo'o.

¹⁶ Bahkan tobo'o temutup dalen keme utuk melei namen ngen bangso-bangso iso Yahudi bito de dapet semlamat bangso-bangso o. Ngen awei o tun-tun Yahudi o temambeak trus duso-duso tobo'o sapei jumlahne genep. Ngen uyo tobo'o temimo hukuman Allah.

Kelok Paulus magea tun-tun Tesalonika

¹⁷ Tapi Saudaro-saudaro, sejak keme ce; ei sementaro waktau kunei udi – uak neak matai, tapi pa'ok neak atei – keme tambeak indau ngen udi ngen berusaho sungguak-sungguak utuk temau igai ngen udi!

¹⁸ Sebab keme bi niat utuk teko magea udi; ngen uku bi cemubone kekedau kilai, tapi Iblis temutup dalen keme.

¹⁹ Sungguak udiba harapan ngen keriang serto mahkota kebanggaan keme. Sebab be amen Tuhan Yesus teko, ngen ite madep-Ne, mako udiba de bakea jijai kebanggaan keme!

²⁰ Memang udiba kebanggaan ngen keriang keme!