1 TESALONIKA 1 - JANJAI BLAU Lem Bahaso Jang Bebilai

¹ Saudaro-saudaro jemaat neak Tesalonika, de jijai umat Allah Bapa ngen Tuhan Yesus Kristus: Keme, adeba Paulus, Silas ngen Timotius ma'ep Allah melei berkat, sejahtera ngen udi.

Kehidupan ngen imen tun-tun Tesalonika

² Keme bogoa mucep syukur ngen Allah kerno Saudaro kutene. Tiep kilai keme bedu'o ngen Allah ngen Bapa ite, keme bogoa minget udi. Keme bogoa demu'o udi.

³ Keme tinget awei ipe udi kemten lem perbuatan bahwo udi pecayo ngen Kristus, awei ipe udi mengasihi tun luyen sehinggo melayan tobo'o, ngen awei ipe udi tep ma'ep ngen Tuhan te Yesus Kristus.

⁴ Keme namen, Saudaro-saudaro, bahwo Allah mengasihi udi ngen bi miliak udi jijai de Si temuan.

⁵ Sebab keme semapei Bito Baik ngen udi iso ngen kecek-kecek bae, tapi kulo ngen kuaso Roh Allah. Ngen keme yakin sekilai ngen kebenaran Bito Baik o. Udi namen awei ipe keme idup utuk kepetingannu ketiko keme ade neak tengeak-tengeak udi.

⁶ Udi temotoa teladan keme ngen teladan Tuhan. Kunyau udi kembiak saro, udi semambut ngen riang bito de keme melei namen ngen udi. Riang o nelei Roh Allah.

⁷ Sehinggo udi jijai contoh utuk kute tun Kristen neak Makedonia ngen Akhaya.

⁸ Sebab muloi kunei udi, bito tetang Tuhan bi tesebea sapei moi Makedonia ngen Akhaya. Ngen iso cuma do'o bae; bahkan bito tetang awei ipe udi pecayo ngen Allah bi sapei moi ipe bae, sehinggo keme coa perlu igai madeak jejano.

⁹ Kute tun miling tetang awei ipe udi temimo keme ketiko keme bel'o teko ngen udi. Tobo'o miling tetang awei ipe udi teminggea patung-patung, teko ngen do-done Allah de idup utuk mengabdi ngen-Si.

¹⁰ Tobo'o miling kulo tetang awei ipe udi ma'ep tekone Anok Allah kunei surgo, adeba Yesus, de sudo nidup Allah kunei matei. Yesus do'oba kulo de semlamat ite kunei hukuman Allah de bakea teko.