1 PETRUS 4 - JANJAI BLAU Lem Bahaso Jang Bebilai

Idup de blau

¹ Kerno Kristus sudo menderita seca'o jasmani, udi kulo harus kemuat dirai ngen pendirian de awei'o. Sebab tun de menderita seca'o awokne, cigai menea duso.

² Sebab o, lokba udi idup selanjutne neak dunio yo temurut kelok Allah, ngen iso temurut kelok manusio.

³ Pado maso de sudo, udi sudo cukup an menea jano de galok nea tun-tun de coa kemnal Tuhan. Udi idup coa baik. Udi temurut hawa nafsu, memabuk, pesta fora, memenem ngen sembeak berhala seca'o janjing.

⁴ Uyo tun de coa kemnal Tuhan, heran bahwo udi coa milem idup awei'o tobo'o, menikmati duso ngen coa ade batas. Do'oba sebabne tobo'o mino udi.

⁵ Tapi tobo'o konyo harus melei pertanggungjawaban ngen Allah de sudo siap utuk semidang tun de idup ngen de matei.

⁶ Do'o sebabne Bito Baik sudo nelei kulo ngen tun-tun matei. Maksudne supayo tobo'o, de bi nadea lem keadaan jasmani – awei'o halne kute tun bakea nadea dapet idup seca'o rohani, temurut kelok Allah.

Idup tun Kristen

⁷ Kute sesuaktau sudo pa'ok kesudahanne, sebab o lokba udi kemuaso dirai ngen waspada, supayo udi dapet bedu'o.

⁸ Lebiak kunei pado kekute, lokba udi sungguak-sungguak kemasiak do ngen luyen, sebab ngen saling kemasiak udi bakea besedio kulo utuk saling mapun.

⁹ Lokba udi temimo do ngen de luyen neak umeak masing-masing, ngen coa mengeluh.

¹⁰ Udi masing-masing sudo temimo pelei-pelei de coa serai kunei Allah. Sebab o sebagai tun de matur pelei-pelei Allah, lokba udi gemuno kepacok o utuk kepetingan besamo.

¹¹ Tun de semapei bito, harusba semapei bito kunei Allah; tun de mlelayan tun luyen, harusba mlayan ngen kekuatan de kunei Allah, supayo lem kute hal, Allah dapet diagungkan liwet Yesus Kristus. Siba de bekuaso ngen patut diagungkan utuk selamo-lamone. Amin.

Menderita sebagai tun Kristen

¹² Saudaro-saudaro de tecito! Udi uyo kembiak menderita kerno dong nujai. Tapi jibeakba meraso sele, seolah-olah ade sesuaktau de luea biaso tejijai ngenko.

¹³ Malah, lokba udi meraso senang kerno milau menderita besamo-samo ngen Kristus. Mako konyo amen keagungan Kristus kenten, udi bakea bersukacita.

¹⁴ Udi butung amen udi nino sebab udi penotoa Kristus. Do'o beartai Roh de mulio, adeba Roh Allah, ade padonu.

¹⁵ Jibeakba suang kulo kunei antaro udi menderita kerno si tukang munuak tun, atau risau, atau penjahat, atau kerno si cemapua urusan tun luyen.

¹⁶ Tapi amen udi menderita sebab udi tun Kristen, jibeakba selek kerno hal o. Mokasiakba ngen Allah, bahwo udi mbin gen Kristus.

¹⁷ Sudo sapei waktaune Allah madea dunio. Ngen umat Allah suangba de bakea nadea telebiak dute. Nah, amen Allah bakea muloi ngen ite, awei ipe jijaine konyo ngen tun-tun de coa pecayo ngen Bito Baik kunei Allah?

¹⁸ Lem Kiteb tetulis awei yo, “Amen tun-tun de biak kulo sudo payeak utuk senlamat, jano igai de bakea tejijai ngen tun-tun beduso de coa kemnal Tuhan!”

¹⁹ Sebab o, amen ade tun-tun de menderita kerno Allah lok awei yo, lokba tun-tun o idup ngen benea ngen mempercayakan dirai ngen Pencipta tobo'o. Si bakea bogoa tempat janjai-Ne.