1 PETRUS 3 - JANJAI BLAU Lem Bahaso Jang Bebilai

Maten ngen ngenyan

¹ Awei o kulo udi, ngenyan-ngenyan, harus hormat ngen maten supayo amen neak antaro tobo'o ade de coa pecayo ngen bito kunei Allah, perbuatannu dapet menea tobo'o jijai pecayo. Ngen coa perlu udi madeak jejano ngen tobo'o,

² sebab tobo'o kemliak perbuatannu de sucai ngen saleh.

³ Jibeakba kecantikannu cuma kecantikan luea, awei misalne menghias buk atau makei perhiasan, atau keracok de la'ang.

⁴ Sebelekne, lokba kecantikannu ade kunei lem batin, budi pekerti de lemah lembut ngen tenang; do'oba kecantikan kekea de kembiak bego temurut pandangan Allah.

⁵ Ngen ca'o dioba pado zaman bel'o selawei-selawei beragamo de ma'ep ngen Allah mempercantik dirai ngen ca'o hormat ngen maten tobo'o.

⁶ Sara kulo awei o, si taat ngen Abraham, madeak si tuanne. Saudaro uyo adeba anok-anok Sara, amen udi menea hal-hal de baik, coa saben ngen jano bae.

⁷ Ngen udi kulo, maten-maten, lokba idup ngen penuak pengertian teadep ngenyannu, ngen sadar bahwo tobo; o adeba kaum de lemah. Bersikapba hormat ngen tobo'o, sebab tobo'o besamo-samo ngen udi, bakea temimo anugerah idup de sejati kunei Allah. Neaba dio, supayo coa ade de malang du'onu.

Saro kerno menea de benea

⁸ Kesimpulanne adeba: lokba Saudaro-saudaro do atei ngen do perasaan. Lokba udi saling sayang menyayangi awei tun-tun de bersaudaro. Ngen lokba udi berbelaskasihan ngen bersikap rendak atei.

⁹ Jibeakba males kejahatan ngen kejahatan, atau caci maki ngen caci maki; sebelekne malesba ngen minoi berkat kunei Allah. Sebab Allah menok udi justru supayo udi temimo berkat kunei Allah.

¹⁰ Neak lem Kiteb Sucai tetulis awei yo, “Tun de lok menikmati idup ngen lok midep bilai-bilai de baik, harus jemago bibiane supayo coa madeak hal-hal de kidek ngen coa madeak hal-hal de coa benea.

¹¹ Si harus me'uak de kidek ngen menea de baik; lokba si berjuang sungguak-sungguak utuk dapet damoi.

¹² Sebab Tuhan bogoa kemliak tun-tun de temotoa kelok-Ne, ngen Tuhan bogoa temi'uk du'o-du'o tobo'o; tapi Tuhan melawen tun-tun de menea kejahatan.”

¹³ Api de lok menea jahat ngen udi, amen udi senang menea baik?

¹⁴ Tapi kunyau udi harus saro kerno menea hal-hal de baik, udi butung! Jibeakba saben ngen api bae, jibeak khawatir.

¹⁵ Tapi neak lem ateinu, lokba udi melei ngen Kristus penghormatan de khusus de sesuai ngen kedudukan-Ne sebagai Tuhan. Ngen lokba udi bogoa siap utuk melei jawaban ngen tiep tun de betanye tetang harapan de udi temuan.

¹⁶ Tapi neaba do'o ngen lemah lembut, hormat. Ngen lokba atei nuraninu sucai, supayo amen udi fitneak tun kerno udi idup ngen baik sebagai penotoa Kristus, mako tun de fitneak o bakea jijai selek suang.

¹⁷ Lebiak baik saro kerno menea baik – amen do'o adeba kelok Allah – kuneipado saro kerno menea de kidek.

¹⁸ Sebab Kristus suang matei cuma debat bae, utuk selamo-lamone kerno duso manusio – suang tun de coa saleak, matei utuk tun de saleak. Kristus menea do'o supayo Si dapet bimbing udi ngen Allah. Si nunuak seca'o jasmani, tapi nidup igai seca'o rohani.

¹⁹ Lem keadaan roh Si lalau melei namen bito kunei Allah ngen roh-roh de neak lem sel:

²⁰ adeba roh tun-tun de coa taat ngen Allah pado zaman Nuh menea kepeane. Cuma ade tun-tun de neak kepea bae – kutene tun lapen – de senlamat liwet banjir lai o.

²¹ Nah, kejadian o adeba kiasan kunei baptisan de uyo yo semlamat udi. Baptisan yo iso suaktau upacara semucai awok kunei kute de ngei, meluyen adeba janjainu ngen Allah kunei atei nurani de baik. Baptisan o semlamat udi kerno Yesus Kristus bi idup igai kunei matei,

²² ngen bi kenek moi surgo. Uyo si bekuaso besamo Allah ngen meriteak kute malaikat, kute penguaso serto kute kekuatan.