1 KORINTUS 8 - JANJAI BLAU Lem Bahaso Jang Bebilai

Tetang kembuk utuk sedekeak ngen patung

¹ Uyo tetang kembuk de nelei sebagai sedekeak ngen patung. Memang benea awei nadeak tun, “Ite kutene bi pacok.” Tapi kepacok o menea tun jijai ombong, sebelekne kasih mbangun pribadi tun.

² Tun de sako bahwo si namen dau, sebeneane tun ati dau namen.

³ Tapi de sungguak kemasiak Allah, Allah namen ngen si.

⁴ Tetang persoalan kembuk de sudo sendekeak ngen patung, ite namen bahwo patung jijai lambang de sebeneane coa gen. Ite namen kulo bahwo Allah cuma do; coa gen de luyen.

⁵ Memang dau kulo jano de tenggen ilah ngen tuhan; baik de ade neak lenget atau de ade neak das bumai.

⁶ Tapi bagiak ite, Allah cuma do. Si Bapa de menea kute sesuaktau. Utuk Siba ite idup. Tuhan cuma do kulo, adeba Yesus Kristus. Liwet Si kutene nea, kerno Siba mako ite idup.

⁷ Kunyau awei'o, coa kute tun namen hal'o. Ade de dute biasone sembeak patung. Jijai kerno'o sapei uyo kulo tobb'o masiak meding kembuk, de sudo sendekeak ngen patung, adeba kembiak patung. Mako amen tobo'o mbuk kembuk o, tobo; o meding duso; kerno imen tobo'o ati kuet.

⁸ Sebeneane kembuk suang coa menea hubungan ite ngen Allah jijai lebiak paok. Amen ite mbuk kembuk o, ite coa dapet utung jejano. Sebelekne amen ite coa mbuk kembuk o, ite kulo coa rugai jejano.

⁹ Tapi, te atei! Jibeak sapei tejijai bahwo tun luyen jijai duso – kerno imenne ati kuet – sebab Saudaro bebas menea jano bae.

¹⁰ Maksudku awei yo: Amen Saudaro, de temuan imen de kuet, gidong mukmei neak penan patung. Sesudo'o suang tun kemliak Saudaro temot mukmei neak di. Amen imen tun o coa kuet, iso do'o bakea menea tun'o binai mbuk kembuk de sudo nelei ngen patung'o?

¹¹ Kerno'o, mako imen Saudaro menea tun de imenne coa kuet'o jijai limau. Padohal Kristus matei utuk tun o kulo.

¹² Amen Saudaro menea saleak awei'o te'adep Saudaro-saudaro Kristen – adeba Saudaro musak imen tobo'o de cayeak – mako Saudaro beduso ngen Kristus.

¹³ Do'o sebabne, amen kembuk yo Saudaroku jijai beduso, mako uku samo sekilai coa bakea mbuk daging igai. Sebab jibeak bae Saudaroku beduso kerno uku.