1 KORINTUS 5 - JANJAI BLAU Lem Bahaso Jang Bebilai

Duso lem jemaat

¹ Sebeneane uku bi temimo laporan bahwo neak antaronu ade perbuatan-perbuatan kidek de keliwet. Ade kunei antaro Saudaro de nga'em ngen indok tirine. Tun-tun de coa kemnal Allah kulo coa menea awei o!

² Kunyau awei o, udi masiak ombong. Sebelekne udi seharusne ibo ngen keluea kunei tun-tun de menea hal o.

^3-4 Seca'o laher uku uak kunei udi, tapi seca'o batin uku ade neak tengeak-tengeak udi. Jijai, uku lok menea seolah-olah uku ade neak antaro udi, “Das gen Tuhan Yesus Kristus, uku madeak bahwo tun de bi menea perbuatan de kidek o, harus nukum!” Amen udi bekopoa anggepba bahwo uku ade neak antaro udi, ngen kuaso Tuhante Yesus,

⁵ udi harus semreak tun o ngen Iblis supayo awokne benaso, ngen awei o rohne senlamat pado waktau Tuhan teko igai.

⁶ Coa patut udi meraso ombong. Mukin udi bi namen peribahaso dio, “Agai de didik menea kute adonan jijai ngembang!”

⁷ Nuangba kileak agai de an o, adeba agai duso supayo Saudaro jijai adonan de blau, awei ipe Saudaro memang coa be agai. Sebab anok bebirai Paskah ite adeba Kristus? Bersih kunei agai duso de an, uku namen bahwo udi memang awei o. Sebab, perayaan Paskah ite bi siap, kerno Kristus de bi jijai sebagai domba Paskah ite, bi kenubua.

⁸ Jijai, maro ite mene pesta ite o ngen ruti de coa ade agai, adeba ruti de taine kemurnian ngen kute bekenan neak atei Allah. Jibeak ite menea pesta paskah o ngen ruti de ade agai de an, adeba agai duso ngen kejahatan.

⁹ Neak lem su'et uku de bel'o, uku melei namen ko supayo jibeak gabok ngen selawei-selawei nakea.

¹⁰ De uku maksud iso selawei nakea, tamak, tukang meliut, tukang nyembeak patung de samo sekilai coa kemnal Allah. Maksud uku iso tobo'o; sebab amen udi harus meuak tobo'o, makao paset bae udi perlu kelua samo sekilai kunei dunio yo.

¹¹ Maksud uku adeba, bahwo udi jibeak gabo ngen tun de makau diraine tun Kristen, tapi tun o selawei nakea, tamak, tukang nyembeak patung, galok kemidek tun luyen, tukang mabuk, tukang maling. Jibeak temot ngen tobo'o!

^12-13 Memang mukum tun-tun iso Kristen iso urusanku. Allah suangba bakea mukum tobo'o. Tapi tetang anggota jemaatnu, iso udi suang de harus mukum tobo'o? Lem Kiteb Sucai, “Nusirba tun coa benea kunei antaronu.”