1 KORINTUS 2 - JANJAI BLAU Lem Bahaso Jang Bebilai

Bito tetang mateine Yesus Kristus neak salib

¹ Saudaro-saudaro! Pado waktau uku teko ngen ko, melei namen ngen ko tetang rencano Allah de ati dunio namen. Uku coa makei kebijaksanaan dunio yo atau miling ngen kecek de kembiak baik.

² Sebab uku bi menea keputusan utuk coa lok namen jejano neak antaro udi seluyen Yesus Kristus, adeba Si de senalib.

³ Uku kulo bi teko ngen ko lem kelemahan, ngen kembiak saben ngen gemtea.

⁴ Bito de uku semapei ngen ko coa uku semapei ngen kecek-kecek de memikat temurut kebijaksanan manusio. Uku semapei o ngen ca'o de melei bukti bahwo Roh Allah bekuaso.

⁵ Uku menea awei o, supayo kepercayoannu ngen Kristus coa das dasar kebijaksanaan manusio, meluyen das dasar kuaso Allah.

Kebijaksanaan Allah

⁶ Kunyau awei o, neak antaro tun-tun de imenne bi kuet, uku memang miling tetang kebijaksanaan. Tapi kebijaksanaan yo iso kebijaksanaan dunio, atau kebijaksanaan penguaso-penguaso zaman yo, de kuasone bakea nyep.

⁷ Tapi de keme melei namen adeba kebijaksanaan kunei Allah. Kebijaksanaan o coa namen ngen dunio, tapi Allah bi semiapne utuk kebahagiaan ite ayok dunio yo jenijai.

⁸ Coa suang kulo kunei penguaso-penguaso zaman yo de namen tetang kebijaksanaan o. Sebab, seandaine tobo'o bi namenne, paset bae tobo'o coa bakea semalib Tuhan de mulio o.

⁹ Sebelekne hal o adeba awei de tetulis lem Kiteb Sucai, “Jano de coa perneak kenliak atau teni'uk manusio, ngen coa perneak kulo timboa lem pekeran manusio, do'oba de seniap Allah utuk tun-tun de sayang ngen-Si.”

¹⁰ Kerno ngen ite Allah bi kemtenne ngen Roh, sebab Roh semlidik kute sesuaktau, bahkan hal-hal de coa keten lem dirai Allah.

¹¹ Sebab de namen atei tun adeba Roh tun o suang. Awei o kulo tetang Allah. De namen atei Allah cuma Roh Allah o suang!

¹² Ite coa temimo roh dunio, tapi roh de asalne kunei Allah, supayo ite namen, jano de nelei Allah ngen ite.

¹³ Kerno o, amen keme jemlas hal-hal tetang Allah ngen tun-tun de temuan Roh Allah. Keme coa madeakne ngen temurut kebijaksanaan manusio, meluyen temurut ajaran Roh Allah.

¹⁴ Tun de coa temuan Roh Allah, coa dapet temimo jano de nadeak Roh o. Sebab bagiak tun-tun o hal-hal o adeba awei kebodohan bae. Tun o coa dapet ngertai, sebab hal-hal o cuma dapet kenliak seca'o rohani.

¹⁵ Tun de temuan Roh Allah dapet kenliak kute sesuaktau, tapi coa suang tun kulo berhok menilai si.

¹⁶ Lem Kiteb Sucai ade tetulis, “Api de namen pekeran Tuhan? Api de dapet melei nasihat ngen-Si?” Iteba de temuan pekeran de serai ngen Kristus!