1 KORINTUS 15 - JANJAI BLAU Lem Bahaso Jang Bebilai

Tetang Kristus idup igai

¹ Uyo, Saudaro-saudaro, uku lok udi minget igai Bito Baik kunei Allah de uku melei namen bel'o ngen udi. Udi temimone, lajau pecayo ngen Kristus kerno Bito Baik o.

² Amen udi kuet bepegong pado jano de uku melei namen o, mako Bito Baik o semlamat udi; kecuali amen Saudaro pecayo coa gen taine.

³ Jano de uku semapei ngen Saudaro-saudaro adeba de sudo uku temimo kulo. De penting, awei de tetulis lem Kiteb Sucai, uku semapei ngen udi bahwo Kristus matei kerno duso-duso ite;

⁴ bahwo Kristus kenubua, tapi sesudo'o idup igai pado bilai ketelau. Do'o kulo tetulis lem Kiteb Sucai.

⁵ Uku melei namen kulo ngenko bahwo Kristus de idup igai kemten kulo dirai-Ne ngen Petrus lajau ngen keduai belas rasul.

⁶ Sesudo'o Kristus kemten dirai kulo ngen lebiak kunei lemo otos penotoa-Ne. Dau kunei tobo'o sapei uyo masiak idup, cuma kekedau tun de sudo ninggea.

⁷ Sesudo'o Kristus kemten dirai kulo ngen Yakobus ngen sesudo'o ngen kute rasul.

⁸ Terakhir sekilai, Kristus kemten dirai ngen uku kulo – uku de awei cupik de laher coa pado waktaune!

⁹ Uku adeba rasul Tuhan de paling tembeak. Uku coa patut senbut rasul, sebab uku sudo semikso jemaat Allah.

¹⁰ Tapi kerno rahmat Allah uku jijai awei keadaan uku de uyo. Coa percuma Allah mapun uku. Ukuba de kerjo lebiak benek kunei kute rasul de luyenne. Tapi sebeneane iso usaho ku; do usaho Allah de kemasiak uku ngen de kerjo besamo-samo uku.

¹¹ Jijai, kunei api bae udi temimo Bito Baik o – jano do'o kunei uku atau kunei rasul-rasul de luyen – do'o coa jijai soal. De penting adeba keme melei namen Bito Baik o ngen Saudaro pecayo.

Tetang manusio idup igai

¹² Amen de keme madeak o adeba bahwo Kristus sudo idup igai kunei mateine, getai ade kunei antaronu de madeak bahwo tun matei coa bakea idup igai?

¹³ Amen benea tun matei coa bakea nidup igai, do'o beratai Kristus kulo coa nidup igai kunei matei-Ne.

¹⁴ Ngen amen seandaine Kristus coa nidup igai kunei matei-Ne, mako coa ade gunone keme melei namen jano-jano ngen coa ade gunone kulo udi pecayo, sebab kepercayoannu coa temuan dasar jejano.

¹⁵ Lebiak kunei o, nyatoba bahwo keme ngike tetang Allah, sebab keme melei namen bahwo Allah sudo midup igai Kristus kunei matei-Ne, amen Allah coa midup Si igai – amen memang benea tun matei coa nidup igai!

¹⁶ Sebab amen tun matei coa nidup igai, mako Kristus kulo coa nidup igai kunei matei.

¹⁷ Ngen amen Kristus coa nidup igai mako kepercayoannu cuam mipai; do'o taine udi masiak lem keadaan beduso ngen coa temuan harapan samo sekilai.

¹⁸ Do'o taine kulo bahwo tun-tun Kristen de sudo ninggea, coa kulo temuan harapan.

¹⁹ Amen pengharapan ite ngen Kristus cuma ketiko ite ade neak dunio yo, mako kunei kute umat manusio neak dunio yo, itebe de paling malang!

²⁰ Tapi nyatone Kristus bi nidup igai kunei matei. Dioba jaminan bahwo tun-tun de sudo matei bakea nidup igai.

²¹ Sebab kematei masuk moi lem dunio ngen liwet do tun, awei'o kulo idup igai kunei matei nelei manusio liwet do tun kulo.

²² Aweipe kute manusio matei kerno do ngen Adam, awei'o kulo kute bakea nidup, kerno do ngen Kristus.

²³ Tapi masing-masing bakea nidup temurut giliane: pertamo-tamo Kristus; sudo'o pado waktau Si teko igai, semsung tun-tun de temasuk de Kristus temuan.

²⁴ Sesudo'o tejijaiba kiamat. Pado waktau o Kristus bakea maleak kute pemeriteak, kute kuaso ngen kute kekuatan; lajau Si bakea semreak kuaso-Ne sebagai Rajo, ngen Allah Bapa ite.

²⁵ Kristus harus terus meriteak sapei Allah menea kute musuak Kristus aleak.

²⁶ Musuak de terakhir de bakea naleak adeba kematei.

²⁷ Lem Kiteb Sucai tetulis awei'o, “Allah bi menea kutene aleak ngen-Si.” Jelasba bahwo, “Kute sesuaktau” taine coa temasuk Allah suang, de menea kutene o aleak ngen Kristus.

²⁸ Tapi sesudo kutene naleak moi beak pemeriteak Kristus, mako Si suang, adeba Anok Allah, bakea maleak dirai-Ne ngen Allah de sudo menea kekutene aleak ngen-Si. Mako Allah suang kulo bakea meriteak kutene.

²⁹ Amen tun matei coa nidup igai, getai ade tun dibaptis utuk tun matei? Utuk jano tobo'o menea hal o? Amen memang tun matei samo sekilai coa bakea nidup igai, utuk jano tobo'o menea hal o?

³⁰ Ngen utuk jano kulo keme lok madep bahayo tiep waktau?

³¹ Saudaro-saudaro! Tiep bilai uku ta'en saro kerno uku bangga das hidupnu sebab udi bi pecayo ngen Kristus Yesus, Tuhan ite.

³² Amen do'o cuma kunei manusio bae, jano utungne bagiak uku utuk bejuang awei mlawan benatang-benatang buas neak kota yo, neak Efesus? Amen memang tun matei coa nidup igai, lebiak baik ite temotoa pribahasa yo, “Maro ite embuk, menem ngen beriang, sebab men ite bakea matei.”

³³ Jibeakba keno pike! Pergaulan de coa baik musak ahlak de baik.

³⁴ Sadarba uyo, ngen jibeak igai menea duso. Seharusne udi selek, bahwo neak antaro udi ade de ati kemnal Allah.

Awok manusio sesudo nidup igai

³⁵ Mukin ade de batanye, “Aweipe tun matei nidup igai? Awok de aweipe de nelei ngen tobo'o, sesudo tobo'o nidup igai?”

³⁶ Uboh nien! Amen Saudaro temanem biniak neak lem pitok, biniak o coa bakea idup, amen biniak o ati matei kileak.

³⁷ Ngen biniak de Saudaro tanem neak lem pitok o – mukin biniak gendum atau biniak luyenne – adeba ijat biniak o bae, iso kute tanemne de bakea idup.

³⁸ Allah suang de bakea melei ngen biniak o de ulesne temurut pandangan-Ne baik utuk tanem o. Utuk tiep mecem biniak, Allah melei ules tanemne sesuang.

³⁹ Awok makhluk-makhluk de idup coa kutene serai. Manusio temuan mecem awok, benatang-benatang temuan mecem awok de luyen; burung-burung luyen kulo mecem awokne, ngen kan-kan luyen igai mecem awokne.

⁴⁰ Awei'o kulo ngen benda-benda neak lenget ngen benda-benda neak bumai. Benda-benda de neak lenget memasing temuan keindahanne suang, ngen benda-benda neak bumai awei o kulo.

⁴¹ Keindahan matai bilai luyen kunei pado keindahan bulen. Bitang-bitang kulo temuan keindahanne suang. Malah masing-masing bitang luyen kulo keindahanne.

⁴² Awei'o kulo halne konyo ngen tun-tun matei de nidup igai. Awok de kenubua o adeba awok de pacok usuk, tapi awok de nidup igai adeba awok de coa pacok usak.

⁴³ Pado waktau awok o kenubua, awok o usak ngen luyek; tapi pado waktau si nidup igai, si adeba awok de baes ngen kuet.

⁴⁴ Pado waktau kenubua, awok o awok kunei dunio; tapi sesudo idup igai, mako awok o awok de nelei Roh Allah. Ade awok de kunei dunio, ade kulo awok de kunei Allah.

⁴⁵ Lem Kiteb Sucai tetulis aweiyo, “Manusio de pertamo, adeba Adam, jijai makhluk de idup,” tapi Adam de terakhir adeba Roh de melei idup.

⁴⁶ De teko telebiak dute adeba de jasmani, iso de rohani. De rohani teko sesudo'o.

⁴⁷ Adam de pertamo jenijai kunei pitok, tapi Adam de keduai asalne kunei surgo.

⁴⁸ Tun-tun dunio yo adeba awei Adam de pertamo, de jenijai kunei pitok, tapi tun-tun surgo adeba awei Si de teko kunei surgo.

⁴⁹ Serai awei ite uyo adeba awei Adam de jenijai kunei pitok, mako konyo ite bakea jijai awei Si de kunei surgo o.

⁵⁰ Maksud uku, Saudaro-saudaro, adeba: awok de jenjai kunei daleak ngen daging, coa dapet masuk Dunio Blau Allah; ngen awok de dapet matei coa dapet jijai kekal.

⁵¹ Ingetba resio yo: Coa kutene ite bakea matei, tapi ite kutene bakea bubeak.

⁵² Hal o bakea tejijai tetibo lem dekejeb matai, pado waktau trupet teniup utuk terakhir kilaine. Sebab pado waktau teni'uk sa'ei trupet o, tun-tun matei bakea nidup igai ngen awok de kekal, ngen ite kutene bakea nubeak.

⁵³ Awok ite de dapet matei yo harus genitei ngen awok de coa dapet matei, ngen awok de kunei dunio harus genitei ngen awok de kunei surgo.

⁵⁴ Amen awok de dapet matei sudo genitei ngen awok de coa dapet matei, ngen awok de kunei dunio sudo genitei ngen awok de kunei surgo, pado waktau o baruba tejijai jano de tetulis lem Kiteb Sucai, “Kematei sudo nenyep; kemenangan sudo dapet!”

⁵⁵ “Hoi matei, neak ipe kemenangannu? Hoi matei, neak ipe bisainu?”

⁵⁶ Bisai matei adeba duso, ngen duso maneu kerjone liwet ukum agamo.

⁵⁷ Tapi syukur ngen Allah; Si melei ngen ite kemenangan liwet Yesus Kristus Tuhan ite!

⁵⁸ Kerno o, Saudaro-saudaro de uku cemito, lokba udi kuet ngen teguak. Kerjoba terus utuk Tuhan ngen bebenea, sebab udi namen bahwo kute de udi kemerjo utuk Tuhan, coa bakea sesio.