1 KORINTUS 14 - JANJAI BLAU Lem Bahaso Jang Bebilai

Penjelasan tetang karunio kunei Roh Allah

¹ Lokba udi berusaho utuk kemasiak tun-tun luyen. Ngen berusahoba kulo utuk temimo karunio-karunio de nelei Roh Allah, terutamo sekilai kesanggupan utuk semapei rencano-rencano Allah ngen manusio.

² Tun de miling lem bahaso de ajaib, tun o isone miling ngen manusio; si miling ngen Allah. Coa ade tun de ngertai jano de si madeak, sebab Roh Allah de jijai sebab si mucep hal-hal de Allah bae namen.

³ Sebelekne, tun de semapei bito kunei Allah, semapeine ngen manusio; utuk kemuet tobo'o, utuk melei semangat ngen tobo'o ngen utuk mibur tobo'o.

⁴ Tun de miling lem bahaso ajaib cuma kemuet diraine bae, tapi tun de semapei bito kunei Allah temulung jemaat jijai maju.

⁵ Baik nien amen Saudaro kute dapet miling ngen bebagoi bahaso de ajaib. Tapi de paling baik adeba amen Saudaro dapet melei namen rencano-rencano Allah. Sebab, tun de semapei bito kunei Allah, lebiak lai kunei pado tun de miling ngen bebagoi bahaso de ajaib; luyen halne amen tun de miling ngen bebagoi bahaso de ajaib o dapet jemlas jano de nadeakne, supayo kute jemaat dapet, paiedeakne.

⁶ Amen seandaine uku teko ngenko, uku miling lem bebagoi bahaso de ajaib, jano gunene do'o utuk udi? Coa ade gunene samo sekilai! Luyen halne, amen uku madaek jano de nadeak Allah, atau uku jemlas sesuaktau tetang Allah, atau uku semapei bito kunei Allah, atau uku majea.

⁷ Alat-alat musik de coa ade nyabai samo sekilai, awei suling ngen kecapi, amen sa'ei nada-nadane coa ba'es, aweipe tun namen legau jano de si main?

⁸ Do contoh de luyen igai: Amen trupet teniup coa tekelu'at, api de bakea siap utuk perang?

⁹ Awei'o kulo ngen kesanggupannu utuk miling bebagoi bahaso de ajaib. Amen Saudaro ngen kesanggupan o madeak kecek de coa jelas, coa gen suang tun de nam ngertai jano de Saudaro madeak. Kecek-keceknu bakea nyep coa tegen.

¹⁰ Neak dunio yo ade dau bahaso, tapi coa ade do kulo kunei bahaso-bahaso o de coa gen taine.

¹¹ Tapi amen uku coa ngertai bahaso de nucep suang tun, mako tun de makei bahaso o adeba tun asing bagiakku; awei'o kulo uku te'adep si.

¹² Tetang udi suang, uku namen udi kembiak lok dapet karunio-karunio kunei Allah. Tapi de utamo sekilai, harus berusaho utuk makei kesanggupan de temulung jemaat jijai maju.

¹³ Do'o sebabne tun miling lem bahaso de ajaib, harusba minoi kunei Allah supayo si nelei kulo kesanggupan utuk jemlas jano de nadeakne o.

¹⁴ Sebab, amen uku bedu'o ngen bahaso de ajaib, rohku memang bedu'o, tapi pekeranku coa bekerjo.

¹⁵ Jijai, uku harus menea jano? Dio de bakea uku nea: Uku bakea bedu'o ngen roh ku, tapi uku bakea bedu'o kulo ngen pekeranku. Uku bakea nyanyi ngen rohku, tapi uku lok nyanyi kulo ngen pekeranku.

¹⁶ Sebab amen Saudaro mucep mokasih ngen Allah ngen rohnu bae, ngen ade tun luyen de coa ngertai bahaso ajaib de kunei Roh Allah o, mako tun coa dapet madeak, “Uku tujau” te'adep du'o sukurnu o; kerno si coa namen jano de Saudaro nadeak.

¹⁷ Kunyau du'o mokasihnu ngen Tuhan o kembiak baik, tapi du'o o coa ade guno'ne samo sekilai utuk tun luyen.

¹⁸ Uku mokasih ngen Allah sebab uku suang dapet miling lem bebagoi bahaso de ajaib lebiak kunei Saudaro kutene.

¹⁹ Tapi, neak lem pertemuan-pertemuan utuk sembeak Tuhan, uku lebiak galok makei lemo kecek de dapet tun jijai ngertai kunei pado makei beribau kecek lem bahaso de ajaib. Uku lebiak galok awei'o supayo uku dapet majea tun.

²⁰ Saudaro-saudaro! Jibeakba meker awei anok titik. Lem hal-hal kejahatan, lokba udi tep awei anok titik. Tapi lem pekeran, lokba udi jijai tun lai.

²¹ Lem Kiteb Sucai tetulis awei'o, “Tuhan madeak, ‘Liwet tun-tun de miling ngen bahaso de ganjea, Uku bakea miling ngen umat yo. Bahkan liwet tun-tun asing, Uku bakea miling ngen umat-Ku; ngen awei'o, tobo'o coa lok temi'uk kecek-Ku.’ ”

²² Jijai karunio utuk miling ngen bahaso de ajaib adeba sebagai tando bagiak tun de coa pecayo, iso utuk tun de pecayo. Ngen karunio utuk melei namen rencano Allah ngen manusio adeba tando utuk pecayo, iso utuk tun de coa pecayo.

²³ Kerno o, seandaine neak lem pertemuan jemaat, kute jemaat miling lem bebagoi bahaso de ajaib, lajau teko kekedau tun luea, atau tun de iso Kristen, paset tun-tun o bakea sako udi bi iloa kutene!

²⁴ Tapi amen Saudaro kutene semapei bito kunei Allah, lajau teko suang tun de iso Kristen atau tun luea, mako hal-hal de nelei namen Saudaro kutene bakea kemten duso-duso tun o ngen menea si sadar ngen duso-dusone.

²⁵ Hal-hal de coa keten lem ateine bakea keten, sehinggo si bakea rendeak dirai lajau nyembeak Allah. Si bakea makau bahwo Allah benea-benea ade neak tengeak-tengeak udi.

Aturan lem jemaat

²⁶ Jijai, Saudaro-saudaro, jano tai kutene o? Amen udi bekopoa utuk nyembeak Tuhan, ade nyanyi, ade ngajea, ade de melei namen sesuaktau kunei Allah, ade de miling lem bahaso de ajaib, ngen ade de jemlas jano de nadeak o. Tapi kutene o harusba nea utuk majea ngen kebaikan kutene.

²⁷ Amen ade de lok miling lem bahaso de ajaib, harusba duai atau paling dau telau tun bae seca'o begilia. Ngen harus ade de jemlas jano de nadeak tun de miling o.

²⁸ Amen coa ade de dapet jemlasne, mako tun-tun de miling lem bahaso de ajiab o harus diem lem pertemuan. Kunyauba tobo'o miling lem atei bae ngen Allah.

²⁹ Duai atau telau tun de temuan bito kunei Allah harus semapei bito o, sementaro de luyen meker jano de nadeak o.

³⁰ Tapi amen seandaine bito kunei Allah teko pado tun luyen de temot neak pertemuan o, mako tun de gidong miling, harus te'atei.

³¹ Ngen ca'o de awei'o, Saudaro-saudaro kutene, dedo, dapet semapei bito kunei Allah; supayo kutene dapet temimo pelajaran ngen jijai tambeak pecayo.

³² Karunio kunei Roh utuk semapei bito kunei Allah berade neak beak kuaso tun de semapei bito o.

³³ Allah adeba Allah de galok ngen ketertiban; Si iso Allah de galok pado kekacauan. Awei de belakau neak lem kute jemaat Allah,

³⁴ selawei harus diem pado waktau pertemuan jemaat. Tobo'o coa nelei izin utuk miling. Tobo'o coa buliak jijai pemipin; do'o sesuoi ngen ukum agamo.

³⁵ Amen tobo'o lok namen sesuaktau tobo'o harus betanye ngen sematen tobo'o neak dasei. Nyelek amen suang selawei miling neak lem pertemuan jemaat.

³⁶ Jano kecek Allah o teko kunei udi? Atau cuma ngen ko bae kecek o senapei?

³⁷ Amen ade tun de meraso temuan karunio utuk semapei bito kunei Allah, atau si temuan karunio de luyenne kunei Roh Allah, tun o harus sadar bahwo jano de uku temulis yo adeba periteak kunei Tuhan.

³⁸ Tapi amen ade de coa temmimo dio, jibeakba gemle si.

³⁹ Kerno o, Saudaro-saudaro, berusahoba utuk semapei bito kunei Allah, tapi jibeakba temgea tun de lok miling lem bebagoi nahaso de ajaib.

⁴⁰ Tapi kutene harus nea seca'o baik ngen tatur.