1 KORINTUS 12 - JANJAI BLAU Lem Bahaso Jang Bebilai

Karunio kunei Roh Allah

¹ Uyo tetang karunio-karunio de nelei Roh Allah. Tetang o, uku lok Saudaro-saudaro namen de sebeneane.

² Tingetba bahwo pado waktau udi ati namen Tuhan, udi milau percayo ngen patung de bisau.

³ Udi harus namen bahwo tun de nipin Roh Allah coa nam miling, “Tekutukba Yesus!” Awei'o kulo coa ade suang dapet madeak, “Yesus adeba Tuhan!” amen tun o coa nipin Roh Allah.

⁴ Ade memecem karunio kunei Roh Allah, tapi kutene berasal kunei Roh de do.

⁵ Ade memecem kerjo utuk melayan Tuhan, tapi Tuhan de nelayan o adeba Tuhan de do kulo!

⁶ Ade bebagoi ca'o kemerjo kerjo Tuhan, tapi de melei kekuatan utuk o ngen tiep tun adeba Allah de do kulo.

⁷ Utuk kebaikan ite kute, Roh Allah kerjo pado tiep tun seca'o sesuang.

⁸ Ngen de suang, Roh o melei kesanggupan utuk miling ngen kuaso. Ngen de luyen Roh de serai o melei kesanggupan utuk jemlas tetang Allah.

⁹ Roh de do o kulo melei ngen tu de do, kemampuan de luea biaso utuk pecayo ngen Kristus; tapi ngen de luyen Roh melei kuaso utuk kema'en tun.

¹⁰ Ngen suang tun nelei kuaso utuk menea keajaiban, ngen de luyen nelei karunio utuk melei namen rencano-rencano Allah. Ngen de luyen igai Roh o melei kesanggupan utuk kemliak bedane karunio de kunei Roh Allah ngen de iso kunei Allah. Ade de nelei kesanggupan utuk miling ngen bebagoi bahaso de ajaib, ngen ade kulo de nelei kesanggupan utuk jemlas tai bahaso-bahaso o.

¹¹ Kutene o kenerjo Roh de do o kulo; masing-masing tun nelei karunio kusus temurut kelok Roh o suang.

Dau anggota tapi do awok

¹² Kristus adeba awei awok manusio; awok o do, tapi ade dau anggotane. Kunyau dau, kute anggota o adeba do awok.

¹³ Awei'o kulo ite kute, baik tun Yahudi atau iso tun Yahudi, hamba-hamba atau tun-tun bebas; ite kute bi baptis ngen Roh de serai, supayo ite jenijai do ngen awok Kristus. Ite kute kulo meding Roh de do o sepenuakne.

¹⁴ Sebab pado awok o iso temuan do anggota bae, tapi dau.

¹⁵ Amen kekea madeak, “Uku iso tangen, kerno o uku iso anggota awok,” do'o taine iso bahwo kekea iso anggota awok.

¹⁶ Ngen amen ti'uk madeak, “Kerno uku iso matai, mako uku iso anggota awok,” do'o kulo taine iso bahwo ti'uk o iso anggota awok.

¹⁷ Seandaine kute awok o jijai matai bae, aweipe awok o dapet temi'uk? Atau amen awok o jijai ti'uk bae, aweipe awok o semnok?

¹⁸ Ite kemliak bahwo Allah de mpek anggota-anggota o moi awok. Masing-masing ne'pek Allah neak penanne temurut kelok-Ne.

¹⁹ Amen kutene cuma do anggota bae, ipe de senbut awok?

²⁰ Jijai memang ade dau anggota tapi awok cuma do.

²¹ Kerno o, matai coa dapet madeak ngen tangen, “Uku coa perlu ko!” atau ulau madeak ngen kekea, “Uku coa perlu ko!”

²² Sebelekne anggota-anggota awok de nanggep coa kuet o, ite kembiak perlu;

²³ ngen anggota-anggota de ite anggep coa bego, justru adeba anggota-anggota de lebiak ite mego. Anggota-anggota awok de ketenne coa ba'es, malah lebiak ite mego.

²⁴ Anggota-anggota awok de sudo keten ba'es, coa perlu perhatian ite. Allah sudo semusun awok ite ngen ca'o awei'o sehinggo anggota-anggota de ku'ang bego, lebiak ite mego.

²⁵ Ngen aweiyo, awok o coa tece'ei; masing-masing anggota dulai do ngen de luyenne.

²⁶ Amen do anggota saro, kute anggota luyenne saro kulo; amen do anggota nujai, kute anggota luyenne milau riang.

²⁷ Saudaro kutene adeba awok Kristus ngen tiep-tiep udi kulo anggota kunei awok o.

²⁸ Awei'o kulo neak lem jemaat, Allah sudo temtau penan utuk dau tun: Mulo-mulo rasul-rasul; keduai nebai-nebai, ketelau gu'au-gu'au lajau tobo'o de menea keajaiban-keajaiban, sudo'o tobo'o de nelei karunio utuk kema'en tun, atau utuk temulung tun luyen atau utuk mipin, atau kulo utuk miling ngen bebagoi bahaso de ajaib.

²⁹ Tobo'o iso kutene rasul, atau nebai, atau gu'au. Coa kute temuan kuaso utuk menea keajaiban,

³⁰ atau utuk kema'en tun, atau utuk miling ngen bebagoi bahaso de ajaib, atau utuk melei namen tai bahaso-bahaso o.

³¹ Kerno o, lokba udi berusaho sungguak-sungguak utuk dapet karunio-karunio de paling utamo. Tapi neak beak yo uku melei namen ngen udi dalen de baik.