Zacarías 6 - CHUYA QELLQA La Biblia en Quechua de Ayacucho 2012

Guerrapaq tawa carretakunata rikusqanmanta

¹ Huktawan qawarispaymi visionpi rikururqani, broncemanta iskay orqokunapa chawpinmanta guerrapaq tawa carretakuna lloqsimuchkaqta.

² Punta kaq carretatam chutasqa puka caballokuna, iskay kaq carretatam yana caballokuna,

³ kimsa kaq carretatam yuraq caballokuna, tawa kaq carretatañataqmi moro caballokuna.

⁴ Hinaptinmi chay rimapayawaqniy angelta tapurqani: Señorlláy, ¿imataq kayqa? nispay.

⁵ Chay angelñataqmi niwarqa: Kay carretakunaqa hanaq pachapi tawa wayrakunam, paykunam kay pachapi munaychakuq Tayta Diospa qayllanman yaykusqankumanta lloqsichkanku.

⁶ Yana caballokunapa chutasqan carretam norte lawpi nacionman richkan, yuraq caballokunapa chutasqanmi intipa seqaykunan lawpi nacionman richkan, moro caballokunapa chutasqanñataqmi sur lawpi nacionman richkan, nispa.

⁷ Chay kallpasapa caballokuna tukuy kay pachaman kallpanankupaq hikutakuptinkum, paykunata chay ángel kamachirqa: Tukuy kay pachaman riychik, nispa. Hinaptinmi chay caballokuna kay pachaman pasarqaku.

⁸ Chaymantam qayaykuwaspan chay angelqa niwarqa: Qaway Zacarías, wak norte lawman lloqsiqkunam, Diospa piñakuyninta chay nacionpi taniykachinku, nispa.

Josueyta coronachisqankumanta

⁹ Tayta Diosmi kaynata niwarqa:

¹⁰ Babiloniapi preso kamusqankumanta kutimuq Heldaiman, Tobiasman hinaspa Jedaiasman riy hinaspa qori-qollqenkuta mañakamuy. Hina chay punchawllapitaq Sofoniaspa churin Josiaspa wasinmanpas riy.

¹¹ Chay qori-qollqe huñusqaykiwanmi coronakunata ruwanki, hinaspam Josadacpa churin sumo sacerdote Josueyta hukninwan coronachinki.

¹² Hinaspam Josueyta ninki, Tukuy Atiyniyuq Tayta Diosmi kaynata nin: Kaymi chay “Ikllirimuq” nispa sutichasqa runa, paymi sapinmanta ikllimuspan Tayta Diospa templonta musoqmanta hatarichinqa.

¹³ Tayta Diospa templonta musoqmanta hatarirachispanmi Rey kanqa, hatunchasqa kaspam trononmanta kamachikunqa, sacerdotepas trononpa waqtanpim tiyanqa, hinaspam iskayninku hawkalla kawsakunqaku, nispa.

¹⁴ Chay coronakunam, Tayta Diospa templonpi señal hina churasqa kanqa, Helemta, Tobiasta, Jedaiasta hinaspa Sofoniaspa churin Josiasta yuyarinankupaq.

¹⁵ Karu llaqtakunapi kaqkuna hamuspam Tayta Diospa templonta huktawan hatarichiypi yanapakunqaku. Chaynapim yachankichik Tukuy Atiyniyuq Tayta Dios qamkunaman kachamuwasqanta. Kaykunaqa pasakunqa Tayta Diospa nisqanta uyarispa kasukuptikichikmi.