Zacarías 5 - CHUYA QELLQA La Biblia en Quechua de Ayacucho 2012

Wankusqa qellqata rikusqanmanta

¹ Huktawan qawarispaymi visionpi rikurqani pawachkaq wankusqa qellqata.

² Hinaptinmi chay ángel tapuwarqa: ¿Imatataq rikuchkanki? nispa. Ñoqañataqmi nirqani: Pawachkaq wankusqa qellqatam, sayayninmi kasqa isqon metro, anchonñataqmi tawa metro parten, nispay.

³ Chaymi payñataq niwarqa: Wakpiqa qellqasqa kachkan kay pachapaq ñakaymi; cheqaptapunim pipas suwakuqqa, huklawninpi qellqasqa kasqanman hina, puchukachisqa kanqa; chaynallataqmi pipas yanqamanta juramentaqqa, huklawninpi qellqasqa kasqanman hina, chinkachisqa kanqa, nispa.

⁴ Tukuy Atiyniyuq Tayta Diosmi kaynata nin: Ñoqam ñakayniyta kacharini, suwakuqpa chaynallataq sutiypi yanqamanta juramentaqpa wasinman chayananpaq. Chay ñakaymi chayna runapa wasinpi takyanqa qerunkunatapas, ruminkunatapas chinkachinankama, nispa.

Tupuna canastapi warmita rikusqanmanta

⁵ Chaymantam rimapayawaqniy ángel asuykamuwaspan niwarqa: Wak rikurimuqta sumaqta qaway, nispa.

⁶ Chaymi ñoqa tapurqani: ¿Imataq wakqa? nispay. Hinaptinmi chay ángel niwarqa: Tupuna canastam. Wakqa llapa nacion-kunapa huchanta tupuqmi, nispan.

⁷ Chay tupuna canastam titimanta tapayuq kasqa, chay tapanta hurqoruptinkum, chay canasta ukupi huk warmi tiyachkasqa.

⁸ Hinaptinmi chay ángel niwarqa: Kay warmiqa tukuy mana allinmanmi rikchakun, nispa. Chaynata nispanmi chay warmita tupuna canasta ukuman tanqaykurqa, hinaspanmi chay titimanta tapanwan taparurqa.

⁹ Huktawan qawarispaymi visionpi rikurqani iskay warmikuna rikurimuqta. Chay warmikunam kasqaku wachwapa rapran raprayuqkama, hinaptinmi wayrañataq apasqa. Paykunam chay tupuna canastata altollanta aparqaku.

¹⁰ Chaymi chay rimapayawaqniy angelta tapurqani: ¿Maymantaq wak tupuna canastata apachkanku? nispay.

¹¹ Hinaptinmi payñataq niwarqa: Sinar nacionmanmi, chaypim huk templota ruwaruspanku maymi tiyananpi churaykunqaku, nispan.