Zacarías 4 - CHUYA QELLQA La Biblia en Quechua de Ayacucho 2012

Candelabromantawan aceitunas sachakunamanta

¹ Rimapayawaqniy angelmi kutira-muspan, puñuchkaq runata rikcha-chichkaq hina rikcharachiwarqa.

² Hinaspam tapuwarqa: ¿Imatataq rikuchkanki? nispa. Hinaptinmi nirqani: Qorimanta ruwasqa candelabrotam, aceite hillpunapaq pukru hawayuqta. Chaypa hawanpim qanchis mecherokuna kachkan, chay mecherokunaman aceite chayananpaqñataqmi qanchis tubokuna kachkan.

³ Chay candelabropa waqtanpim iskay olivos sachakuna kachkan, hukninmi alleqninpi, hukninñataqmi ichoqninpi, nispay.

⁴ Chaymantam rimapayawaqniy angelta tapurqani: Señorlláy, ¿ima ninantaq kayqa? nispay.

⁵ Angelñataqmi niwarqa: ¿Manachu yachanki ima ninanmi kasqanta? nispan. Chaymi nirqani: Manam señorlláy, nispay.

⁶ Hinaptinmi chay angelñataq niwarqa: Kaymi Zorobabelpaq Diospa Chuya simin: Manam tropakunawanchu, nitaqmi kallpawanchu, aswanqa espirituywanmi, Tukuy Atiyniyuq Tayta Diosmi chaynata nin.

⁷ Hatun orqo, ¿pitaq qamqa kanki? Qamqa Zorobabelpa ñawpaqninpim pampaman tikrasqa kanki. Paymi temploy hatarichisqa kananpaq cimientopaq rumita hurqonqa, llapa runakunañataqmi qaparinqaku: ¡Ima allinmi, ima sumaqmi! nispanku.

⁸ Tayta Diosqa niwarqataqmi kaytapas:

⁹ Zorobabelmi kay templopa cimientonkunata churarqa, hina kikintaqmi qespichinqapas, nispa. Chaynapim yachankichik Tukuy Atiyniyuq Tayta Dios kachamuwasqanta.

¹⁰ Templo ruwayta qallaykuptinku, “maytaya tukurusun” niqkunapas, Zorobabel qespirachiptinmi kusikunqaku. Chaymantam chay angelqa niwarqa: Kay qanchis mecherokunañataqmi Tayta Diospa ñawinkuna, kaykunam kay allpa pachapi tukuy hinastinta qawachkanku, nispa.

¹¹ Hinaptinmi ñoqañataq tapurqani: ¿Ima ninantaq wak candelabropa alleqninpi chaynataq ichoqninpi iskay olivos sachakunaqa? nispay.

¹² Huktawan tapuspaymi nirqani: ¿Ima ninantaq wak iskay qori tubonkunatakama qellu aceitepa pasanan olivos sachapa iskay kallmankunaqa? nispay.

¹³ Chaymi angelñataq niwarqa: ¿Manachu yachanki ima ninanmi kasqanta? nispan. Hinaptinmi ñoqañataq nirqani: Manam señorlláy, nispay.

¹⁴ Payñataqmi niwarqa: Kay iskay olivoskunaqa kay pachapi munaychakuq Tayta Diospa qayllanpi servikunankupaq sapaqchasqakunam, nispan.