Zacarías 3 - CHUYA QELLQA La Biblia en Quechua de Ayacucho 2012

Sumo sacerdote Josueyta visionpi rikusqanmanta

¹ Chaymantam sumo sacerdote Josueyta visionpi rikurqani, Tayta Diospa angelninpa ñawpaqninpi sayachkaqta. Josueypa alleq lawninpiñataqmi Satanás sayachkasqa acusananpaq.

² Hinaptinmi Satanasta Tayta Diospa angelnin kaynata nirqa: Yaw Satanás, Tayta Diosyá wischusunki. Jerusalén llaqtata akllakuq Tayta Diosyá qarqosunki. Josueyqa rupachkaq ninamanta hurqorusqa sansa hinam, nispa.

³ Josueyñataqmi qachallaña pachayuq sayarqa Diospa angelninpa qayllanpi.

⁴ Chay angelñataqmi ñawpaqninpi kaqkunata kaynata kamachirqa: Chay qachallaña pachankunata chustuychik, nispa. Josueytañataqmi nirqa: Pachaykikunata chustuchkaq hinam huchaykikunata mayllaruyki, kunanqa suma-sumaq pachawanñam pachaykachiki, nispa.

⁵ Chaymantam yanapaqninkunata kamachirqa: Josueypa umanta limpio uma wankikuna telawan wankiychik, nispa. Hinaptinmi Josueypa umanta wankiy-kuspanku suma-sumaq pachakunawan pachaykachirqaku. Tayta Diospa angelninñataqmi hina chaypi sayarqa.

⁶ Chaymantam Josueyta Tayta Diospa angelnin kaynata qaqcharqa:

⁷ Tukuy imapa hawanpi munaychakuq Tayta Diosmi kaynata nin: Sichum ñoqapa munasqayman hina kawsaspa kamachikuyniykunata ruwayman churaspaykiqa temploypim kamachikunki, temploypa pationkunatam nanachikunki, hinaptinmi serviwaqniy angelkunatawan kuskata churasqayki.

⁸ Chaynaqa, sumo sacerdote Josué kayta uyariy, uyariwachuntaq sacerdotemasikikunapas, qamkunaqa qepa punchawkunapaqmi señal hina kankichik: Ñoqam pusamusaq serviqniyta, “Ikllirimuqta”, nispa.

⁹ Tukuy Atiyniyuq Tayta Diosmi nin: Ñoqam Josueypa ñawpaqninpi qanchis waqtayuq rumita churaruni, chay rumipim ñoqa qellqasaq. Hinaspam huk punchawllapi kay llaqtapa huchanta chinkarachisaq, nispa.

¹⁰ Tukuy Atiyniyuq Tayta Diosmi nin: Chay punchaw chayaramuptinmi qamkuna, uvas plantaykichikpa hinaspa higos sachaykichikpa sikinman qayanakuspa mikunkichik, nispa.