Zacarías 2 - CHUYA QELLQA La Biblia en Quechua de Ayacucho 2012

Tupuna cordelta Zacarías rikusqanmanta

¹ Huktawan qawarispaymi visionpi rikururqani, tupuna cordelta aptarayachkaq runata.

² Chaymi payta tapurqani: ¿Maytataq richkanki? nispay. Hinaptinmi payñataq niwarqa: Jerusalén llaqta tupuqmi, chaynapi largontapas anchontapas yachanaypaq, nispa.

³ Rimapayawaqniy ángel pasakuchkaptinmi, huk angelñataq taripaykamuspan

⁴ nirqa: Kallpaspayki wak tupuna cordel aparisqa riq joventa kaynata nimuy: Manaña yupay atina runakuna chaynataq animalkuna chaypi yachasqanraykum Jerusalenqa mana murallayuqña kanqa, nispa.

⁵ Tayta Diosmi kaynata nin: Ñoqam Jerusalenpa muyuriqninpi lenwachkaq nina murallan kasaq, hinaspaymi chawpinpi atiyniyta qawachikusaq, nispa.

Llaqtanta Diospuni salvananmanta

⁶ Tayta Diosmi kaynata nin: ¡Lluptiychik, lluptiychik! norte lawpi yachaqkuna. Ñoqam kay pachapi tukuy hinastinman cheqechirqaykichik. Tayta Diosmi chaynata nin.

⁷ ¡Babilonia nacionpi yachaq Sión runakuna chaymanta lloqsispa lluptiychik! Tayta Diosmi chaynata nin.

⁸ Tukuy Atiyniyuq Tayta Diosmi, tukuy imaykichiktapas qechusuqnikichik nacionkunaman kayta willamunaypaq kachawarqa: Pipas qamkuna llapchaykuqqa, ñawi ruruytam llapchaykun.

⁹ Chayraykum chay nacionkunawan kikiy peleasaq, criadonkunallawanmi tukuy imankutapas qechurachisaq, nispa. Chaynapim yachankichik Tukuy Atiyniyuq Tayta Dios kachamuwasqanta.

¹⁰ Tayta Diosmi nin: Sionpi yachaqkuna, takispa kusikuychik. Ñoqam hamuchkani qamkunawan yachanaypaq, nispa.

¹¹ Chay punchawpim achka nacionkuna Tayta Diosman hukllawakunqaku, paykunapas llaqtanñam kanqaku, Diosmi chawpikichikpi yachanqa. Chaynapim yachankichik Tukuy Atiyniyuq Tayta Dios kachamuwasqanta.

¹² Tayta Diosmi Judá nacionpi, ancha kuyasqan allpapi huktawan munaychakunqa, Jerusalentapas huktawanmi llaqtanpaq akllaykunqa.

¹³ Chaynaqa, llapallan runakuna Tayta Diospa qayllanpi upallachun; paymi, maymi yachananmanta hatarispan ñoqanchikman hamuchkan.