Zacarías 14 - CHUYA QELLQA La Biblia en Quechua de Ayacucho 2012

Jerusalenmantawan nacionkunamanta

¹ Jerusalén llaqta, Tayta Diospa punchawninmi hamuchkan, llapa tukuy imaykikunatapas chawpikipim rakinakunqaku.

² Tayta Diosmi kaynata nin: Chay punchawpim llapa nacionkunata hatarirachisaq Jerusalenpa contranpi peleanankupaq. Hinaspam llaqtata venceruspanku wasikunata salteaspa warmikunatapas abusanqaku. Llapa runatam partenta presota apanqaku, puchuqkunañataqmi hinapi qepanqaku, nispa.

³ Chaymantam Tayta Dios, chay nacionkunawan peleanqa, hatun guerrapi peleasqanta hina.

⁴ Chay punchawpim Tayta Dios, Jerusalenpa chimpan intipa qespimunan law Olivos moqopi sarupakuykunqa. Hinaptinmi Olivos moqo intipa qespimunan lawmanta intipa seqaykunan lawman kicharikuptin hatu-hatun wayqo rikurinqa. Huknin partenmi norte lawman asurinqa, hukninñataqmi sur lawman.

⁵ Qamkunañataqmi chay hatu-hatun wayqoman ayqenkichik, chay wayqom chayanqa Azal lawkama. Ayqenkichikqa Judá nacionpi rey Uzías munaychakuchkaptin terremoto pasaptin ayqesqaykichikpi hinam. Hinaptinmi Señorniy Tayta Diosqa llapa salvasqankunapiwan hamunqa.

⁶ Chay punchawpiqa achkiypas, qasapas, chiripas manam kanqañachu.

⁷ Chay punchaw hinaqa manam kanqachu hukqa, chay punchawtaqa Tayta Diosllam reqsin. Chaypiqa manañam punchawpas nitaq tutapas kanqañachu, tutaykuruptinpas achkiqa hinallam kanqa.

⁸ Chay punchawpim Jerusalenmanta kawsaq yaku lloqsimunqa, partenmi intipa qespimunan Puchqo lamar qocha lawman kallpanqa, partenñataqmi intipa seqaykunan Mediterráneo lamar qocha lawman kallpanqa. Chay yakuqa poqoypipas hinaspa chirawpipas mana tukuytam kallpanqa.

⁹ Tayta Diosmi kay pachapi munaychakunqa. Pay sapallanmi Dios kanqa, sutinpas sapallanpam reqsisqa kanqa.

¹⁰ Kay allpam Geba lawmanta qallaykuspa Jerusalenpa sur lawninpi Rimón lawkama pampayanqa. Jerusalenmi ichaqa maymi kasqanpi takyanqa, chaypim runakuna yachanqaku Benjaminpa punkunmanta qallaykuspa esquina punkukama otaq ñawpaq tiempopi kaq punkukama chaynataq Hananeelpa torrenmanta qallaykuspa reypa lagarninkunakama.

¹¹ Jerusalén llaqtapi runakuna yachaptinmi manaña mastaqa tuñichisqañachu kanqa, aswanqa runankunapas hawkañam yachakunqaku.

¹² Jerusalenpa contranpi hatarimuq nacionkunatam Tayta Dios kaynata castiganqa: Runankunapa aychanmi kaw-sachkaptillankuraq ismurunqa, ñawinkuwan qallunkupas maymi kasqanpim ismurunqa.

¹³ Chay punchawpim Tayta Dios chay runakunata llumpayta mancharichinqa, hinaptinmi makinkuta hoqarispa kikinkupura wañuchinakunqaku.

¹⁴ Judapas Jerusalenpim peleanqa, hinaspam muyuriqninpi kaq nacionkunapa tukuy imankunatapas chaynataq qorintawan qollqenkutapas qechunqa.

¹⁵ Runakunata castigasqan onqoyllawanmi castiganqa campamentonkupi tarikuq caballokunatapas, mulakunatapas, camellokunatapas, asnokunatapas hinaspa wakin animalkunatapas.

¹⁶ Chaymantam Jerusalenpa contranpi hatariq nacionkunamanta puchuqkunañataq, Tukuy Atiyniyuq Tayta Dios Reyta yupaychanankupaq hinaspa ramada fiestata ruwanankupaq watan-watan qespinqaku.

¹⁷ Sichum kay pachapi nacionkunamanta hukkaqnin, Jerusalén llaqtaman Tukuy Atiyniyuq Tayta Dios Reyta yupay-chananpaq mana qespiptinqa, manam chay nacionpa allpanman para chayan-qachu.

¹⁸ Sichum Egipto runakuna mana rinqakuchu, hinaptinqa paykunapaqpas manam para kanqachu, Tayta Diospas aswanraqmi ramada fiestaman mana riq nacionkunata castigasqan ñakariywan paykunatapas castigarunqa.

¹⁹ Chaymi castigo kanqa Egiptopaqwan ramada fiestaman mana qespiq nacionkunapaq.

²⁰ Chay punchawpim caballokunapa esquelankunapipas kay qellqa qawakunqa: “Tayta Diospaq Sapaqchasqam” niq qellqa. Tayta Diospa templonpi kaq mankakunapas, altarpa ñawpaqninpi kaq tazonkuna hinam Tayta Diospaq sapaqchasqa kanqa.

²¹ Jerusalenpi hinaspa Judá nacionpi llapa mankakunapas Tayta Diospaq sapaqchasqam kanqa, chaynapim sacrificiota ruwaq hamuqkunapas chay mankakunata hapispa ofrecespanku aychata yanunqaku. Chay punchawpiqa, Tukuy Atiyniyuq Tayta Diospa templonpi negociantekunapas manañam kanqañachu.