Zacarías 13 - CHUYA QELLQA La Biblia en Quechua de Ayacucho 2012

¹ Chay tiempopim huk pukyumanta yaku lloqsiptin, chay yakupi Davidpa mirayninkunawan Jerusalenpi yachaqkuna huchankumantawan milla-kuypaq mana allin ruwasqankumanta chuyanchakunqaku.

² Tayta Diosmi kaynata nin: Chay punchawpim, kay nacionmanta idolokunapa sutinta chinkachiptiy manaña yuyayllapas yuyarinqakuñachu. Profetakunatawan mana allin espiritukunatapas pasaypaqtam chinkarachisaq.

³ Chaynapim pipas hinallaraq profetizaptinqa, hina tayta mamallan ninqa: “Llullakuspa Tayta Diospa sutinpi rimasqaykiraykum wañunkipuni”, nispa. Pipas profeta tukuqtaqa, ¡hina tayta mamallanmi espadawan tuksirunqa!

⁴ Chay tiempopiqa profetakunapas llullata willakusqankumantam penqakunqaku. Manañam pipas profetapa qaramanta capanwan churakuykuspaqa runamasinta engañanqañachu.

⁵ Aswanqa sapakamam ninqaku: “Ñoqaqa manam profetachu kani, chakrapi llamkakuqllam, warmaymantapacham chakrallapi llamkani”, nispa.

⁶ Sichum pipas tapunqa: “Chaynaqa, ¿imataq chay cuerpoykipi heridakunaqa?” nispa, hinaptinqa paymi ninqa: Amistadniykunapa wasinpim kaynaramuwanku, nispa.

Ovejakuna michiqta wañuchinankumanta

⁷ Tukuy Atiyniyuq Tayta Diosmi kaynata nin: Espada, michiqniypa contranpi hatariy, yanapaqniypa contranpi hoqarikuy, michiqta wañuchiptikim llapa ovejakuna cheqenqa. Ñoqañataqmi uñachakunapa contranpi makiyta hoqarisaq, nispa.

⁸ Tayta Diosmi kaynata nin: Hinaptinmi kay pachapi llapallan yachaqkunamanta kimsa parten wañuspa chinkanqa, huknin partellanñam hinapi puchunqa.

⁹ Chay puchuqkunatam qollqeta hina ninapi chulluchisaq, qorita hinam chuyanchasaq. Hinaptinmi paykuna qayakamuwaptinku ñoqañataq uyariykuspay kaynata nisaq: “Llaqtalláy” nispay, paykunañataqmi ninqaku: “Tayta Diosllam Diosninchikqa”, nispanku.