Zacarías 11 - CHUYA QELLQA La Biblia en Quechua de Ayacucho 2012

¹ Yaw, Líbano orqo, punkuykita kichariy cedro sachaykikunata nina rupachun.

² Yaw, ciprés sacha qaparkachay, cedro sacha wichiykusqanmanta, chay hatu-hatun sachakunam kuchurachikun. Basán lawpi encina sachakuna allwaychik, saqñuy-saqñuy sachakuna wichiykusqanmanta.

³ Michinanku pastokuna chinkarusqanraykum michiqkuna qapariyllawanña waqachkanku, Jordanpa sumaqllaña saqñunkuna tukurusqanraykum leonkuna qaparkachachkanku.

Mana allin michiqkunamanta

⁴ Tayta Diosmi, Diosniymi kaynata niwarqa: Nakanapaq ovejakunata michiy.

⁵ Chay ovejakunataqa rantiqninkunapas mana llakipayarispam wañuchinku, hinaptinmi rantikuqninkunapas kaynataraq ninku: “Tayta Diosyá yupaychasqa kachun, llumpaytañam apuyaruni” nisparaq. Michiqninkupas chay ovejakunamantaqa manam llakipayarikunchu, nispa.

⁶ Chayraykum Tayta Dios kaynata nin: Ñoqapas manañam kay nacionpi yachaq runakunataqa llakipayasaqñachu, aswanqa sapakamatam runamasinpa chaynataq reyninpa munaychakunanpaqña hapiykachisaq, paykunañam nacionninkuta purmachinqa, ñoqapas manam paykunapa makinmantaqa librasaqchu, nispa.

⁷ Chaynapim wañuyman destinasqa kaq ovejakunata michirqani. Michinaypaqmi iskay tawnakunata hapiykurqani, huknintam suticharqani kuyapayakuywan, huknintañataqmi hukllawanakuywan, hinaspaymi michirqani.

⁸ Hinaspam huk killallapi kimsa michiqkunata qarqorurqani. Paykunaqa llumpaytañam cheqniruwarqaku, ñoqapas paqwaytañam paykunata amirurqani.

⁹ Ovejakunatapas kaynatam nirqani: Manañam michisqaykichikñachu. Wañuy munaqqa wañuchunpas, chinkaqqa chinkachunpas, qepaqkunapas kikinkupura mikunakuchun, nispay.

¹⁰ Hinaspaymi llapa llaqtakunawan Tayta Diospa pacto ruwasqan pakisqaña kasqanta qawachinaypaq, kuyapayakuywan sutichasqay tawnayta hapiykuspay pakirurqani.

¹¹ Chay punchawpim chay pacto pakisqa karqa, hinaptinmi oveja rantiqkuna imam ruwasqayta qawaykuspanku yacharurqaku, chayqa Tayta Diospa Chuya simin kasqanta.

¹² Hinaspaymi paykunata nirqani: Munaspaykichikqa llamkasqaymanta pagaykapuwaychik, mana chayqa hina kachun, nispay. Chaymi kimsa chunka qollqeta pagay-kapuwarqaku.

¹³ Hinaptinmi Tayta Dios niwarqa: Chay qollqe hinallam kay runakunapa ñoqapaq kuyakuyninpas, chaytayá ofrenda huñunankuman wischuykamuy, nispa. Chaynapim chay qollqeta ofrenda huñunankuman wischuykamurqani.

¹⁴ Chaymantam “hukllawanakuywan” sutichasqa tawnaytapas hapiykuspay pakirurqani, chaynapim Israelwan Judá huklla kayninku pakisqa karqa.

¹⁵ Huktawanmi Tayta Dios kamachiwarqa kaynata: Kunanñataq mana imapas qokuq michiqman rikchakuy.

¹⁶ Kunanmi kay nacionpi huk michiqta churasaq, chinkasqa ovejakunapas paytaqa manam imapas qokunqachu, uñachankunatapas manam maskamunqachu, chaki pakisqakunatapas manam hampiykunqachu, pisipasqakunatapas manam marqarinqachu, aswanmi poqosqan kaqkunata situntawanpas mikurunqa.

¹⁷ ¡Imallapiraq rikukunqa michisqan ovejakunata saqeruq mana valeq michiq! Makinpas espadawan kuchusqa kachun, alleq ñawinpas espadawan tuksisqa kachun. Chayna runapaqqa makinpas chakiruchun, alleq ñawinpas ñawsayaruchun.