Zacarías 10 - CHUYA QELLQA La Biblia en Quechua de Ayacucho 2012

Llaqtanta Dios waqaychananmanta

¹ Tayta Diosmanta poqoy parata mañakuychik, hinaptinqa yana puyukunata hatarichiq Diosmi sinchi parata qomususpaykichik allpaykichiktapas ruruchinqa.

² Idolokunapa rimasqanqa llullam, qatipaqkunapa rikusqanpas pantaymi, yanqa musqoy hinallam willakuyninkupas, yanqa rimayllam sonqo tiyachita rimasqankupas. Chayraykum runakunaqa, mana michiqniyuq ovejakuna hina llutanpi purispa michiqninku mana kaptin ñakarichkanku.

³ Chayraykum Tayta Dios kaynata nin: Michiqkunapa contranpim sinchita piñakuruni, llaqtay nanachikuq runakunatam castigasaq. Tukuy Atiyniyuq Tayta Diosmi, Judapa mirayninkunata ovejankunata hina waqaychaqmi, paykunata guerrapaq kallpasapa caballonta hina ruwanqa.

⁴ Judamantam lloqsinqa wasipa cimientonpi esquina rumipas, carpata takyachiq estacapas, guerrapi peleana flechapa arconpas. Paymantataqmi lloqsinqa llapa kamachikuqkunapas.

⁵ Paykunaqa kanqaku mitupa hawanpi enemigonta sarupaq soldadokuna hinam; Tayta Diospa yanapakuyninwanmi paykunaqa peleanqaku. Sillada tropakunatapas paykunaqa penqaymanmi churanqaku.

⁶ Judapa mirayninkunatam kallpanchasaq, Joseypa mirayninkunatam salvaykusaq, llakipayasqayraykum paykunata allpankuman kutichimusaq, mana haykapipas qepanchasqay hinam kanqaku. Ñoqa Tayta Dios, Diosninku kasqayraykum mañakuyninkutapas uyariykusaq.

⁷ Efrainpas allinnin qari-qari soldado hinam kanqa, vino upyaqpa hinam sonqonpas kusikunqa, wawa-churinkupas rikuspam kusikunqaku, sonqonpas Tayta Diospim kusikunqa.

⁸ Salvaykuspaymi silbarispay paykunata huñurusaq, hinaptinmi pasaq tiempokunapi hinaraq achkallaña kanqaku.

⁹ Nacionkunamanmi paykunata cheqerachisaq, hinaptinmi chay karu llaqtakunapi ñoqamanta yuyarinqaku, huk punchawmi wawa-churintin kutimunqaku.

¹⁰ Egiptomantam paykunata kutichimusaq, Asiriamantam paykunata huñumusaq, Galaadmanwan Libanoman pusaptiymi achkallaña kasqankurayku allpapas pisinqaraq.

¹¹ Lamar qochapa olanta sayarachiptiymi, lamar qochapa chawpinta pasamunqaku. Nilo mayutam chakichisaq, Asiriapa hatun tukuynintam puchukachisaq, Egiptopa atiynintam tukurusaq.

¹² Ñoqa Tayta Dios kallpanchaptiymi sutiypi ñawpaqman rinqaku.