Santiago 1 - CHUYA QELLQA La Biblia en Quechua de Ayacucho 2012

Cartapa qallariyninmanta

¹ Ñoqa Santiagom Diospa hinaspa Señor Jesucristopa serviqnin, llapallan kay pachapi cheqesqa Israelpa chunka iskayniyuq ayllunkunata rimay-kamuykichik.

Sasachakuykuna hamuptin pacienciakunamanta

² Wawqe-panillaykuna, imaymana sasachakuykunapi tarikuspaykichikqa aswanraqyá kusikuychik.

³ Yachasqay-kichikpi hinapas iñisqaykichikmanta pruebasqa kaspaqa aswan pacienciayuq kaytam tarinkichik.

⁴ Ichaqa qespichisqa kanaykichikkamayá aswanraq pacienciakuychik, chaynapi iñiypi wiñaspa mana imapa pisisqan kanaykichikpaq.

⁵ Mayqannikichikpapas yachaynikichik pisilla kaptinqa, Diostayá mañakuychik, payqa lliw mañakuqninkunamanqa mana piñakuspam chaninninpi qoykunqa.

⁶ Ichaqa ama iskayrayaspayá mañakuychik, iskayrayaspa mañakuqqa lamar qochapa kayman chayman wayrapa apasqan olankunamanmi rikchakun.

⁷ Iskayrayaspa mañakuq runaqa amayá suyachunchu Señormanta imapas chaskiytaqa.

⁸ Chayna iskayrayaq runaqa tukuy ima ruwasqanpipas manam allintaqa takyanchu.

Apumantawan wakchamanta

⁹ Wakcha wawqe-panikunaqa Señorpa hatunchasqan kasqanpiyá hatunchakuchun,

¹⁰ apu runañataq Señorpa uchuychasqanpi. Apu runaqa qorapa waytan hina chinkaruqllam.

¹¹ Inti qespiramuspa ruparamuptinmi qoraqa chakirun, waytanñataqmi wichirun hinaptinmi sumaqllaña kayninpas tukurun, chaynapunim apu runapas qollqella huñuy munasqanpi wañurunqa.

Pruebakunamantawan tentasqa kaymanta

¹² Mayna kusisqam sasachakuykuna hamuptin pacienciakuq runaqa. Payqa chay sasachakuykunata venceruspanmi wiñay kawsay coronata chaskinqa. Chaytam Dios prometekurqa haykam kuyaqninkunaman qonanpaq.

¹³ Pipas tentasqa kaspaqa ama piensachunchu: “Diosmi tentawachkan” nispaqa, Diosqa manam piwanpas tentachikunmanchu, nitaqmi pitapas tentanmanchu.

¹⁴ Runaqa sonqonpa munasqankunawan apachikuspanmi tentachikunanpaq aysachikun.

¹⁵ Chayna mana allin munaykunamantam huchakuna rikurimun; huchañataqmi llumpayta wiñaruspaqa wañuyta apamun.

¹⁶ Kuyasqay wawqe-panillaykuna, amayá pantaruychikchu.

¹⁷ Tukuy imapas allin kaqkunawan cheqap atiyqa cielopi kaq chaskakuna unanchaq Diosllamantam hamun. Diosqa hina kaqllam, payqa manam tikrakunchu, nitaqmi llantuy hinachu pasaruqlla.

¹⁸ Paymi cheqap palabranta reqsiykachiwaspanchik musoqmanta nacechiwarqanchik, chaynapi lliw unanchasqankunamanta primicia hina kananchikpaq.

Diosta cheqap serviymanta

¹⁹ Kuyasqay wawqe-panillaykuna, qamkunaqa chaylla uyariqyá kaychik, allinta tanteaspayá rimaychikpas, amataqyá piñakuqllañaqa kaychikchu.

²⁰ Piñasqa runaqa manam Diospa munasqanman hinachu ruwan.

²¹ Tukuy mana allin ruwaykunata hinaspa millay munapayaykunata saqespa, Diospa siminta llampu sonqowan chaskiychik. Paypa palabranqa almaykichikta salvaykunapaq atiyniyuqmi.

²² Diospa palabranta ruwayman churaqyá kaychik, amayá uyariqllachu; chayna kaspaqa kikillaykichiktam engañakuchkankichik.

²³ Pipas uyariqlla kaspa mana ruwayman churaqqa, espejopi uyan qawakuqmanmi rikchakun,

²⁴ paymi qawapakusqanmanta muyuriykuspanqa imayna kasqantapas chaylla qonqakurun.

²⁵ Ichaqa librawaqninchik alli-allin ley uyarisqanta mana qonqaruspa chaypi yuyaymanaspa allinta takyaqqa chaynataq mana qonqaspa kasukuqqa mayna kusisqam kanqa tukuy ima ruwasqanpipas.

²⁶ Sichum pipas Dios yupaychaq kasqanpaq hapikuchkaspa, rimasqantañataq mana controlakuq runaqa, kikintam engañakuchkan, Diosta yupaychasqanpas yanqapaqmi kanqa.

²⁷ Dios Taytapa qayllanpi mana pantayniyuq cheqap religionqa kayna ruwanmi: Mana tayta-mamayuqkunaman watukuykuymi, viudakunata llakinkupi yanapaykuymi hinaspa kay pachapi mana allin ruway-kunaman mana chapukuspa waqay-chakuymi.