Rutwan Sutichasqa Libro 2 - CHUYA QELLQA La Biblia en Quechua de Ayacucho 2012

Boozpa chakranpi cebadata Rut pallapakusqanmanta

¹ Noemiypa qosan Elimelecpa ayllunmi karqa Booz, payqa ancha reqsisqa apu runam karqa.

² Huk punchawmi Noemiyta Rut nirqa: Mañakuykim chakraman rirunaypaq, pipas chaskiykuwaqniypa chakranpi cebadata pallapakaramunaypaq, nispa. Chaymi Noemí nirqa: Riruyá wawalláy, nispa.

³ Hinaptinmi Rutqa pasaspan chakraman chayarurqa, chaymi rutuqkunapa qepanta pallapakustin rirqa. Chay chakraqa Elimelecpa ayllun Boozpam karqa.

⁴ Chayllamanmi Boozqa Belén llaqtamanta chayaramuspan rutuqkunata rimaykurqa: Diosyá qamkunawan kachun, nispa. Chaymi rutuqkunapas nirqaku: Qamtapas Diosyá bendecisunki, nispanku.

⁵ Chaymantam rutuqkunapa kamachiqninta Booz tapurqa: ¿Pitaq wak sipasqa? nispa.

⁶ Rutuqkunapa kamachiqninñataqmi nirqa: Moab lawmanta Noemiywan hamuq sipasmi.

⁷ Paymi ruegakuwarqa rutuqkunapa qepanta rispa gavillakunapa chawpinpi pallapakunanpaq. Chaynapim tutapaymanta kunankama pallapakuchkan mana samaykuspa, nispa.

⁸ Chaymi Rutta Booz nirqa: Uyariykuway churilláy, amam kaymanta huklaw chakramanqa pasakunkichu, hinallapimá criadaykunawan kuska pallapakunki.

⁹ Qawariy sumaqta maypim rutusqankuta, hinaspayá paykunata qatiy maymanmi risqankuta, ñam serviqniykunata kamachiniña pipas mana imanasunaykipaq. Yakunayasuptikipas puyñukunaman asuykuspam serviqniykunapa yaku hurqomusqanta tomakunki, nispa.

¹⁰ Chaymi Rutqa qonqoranpa kumuykuspan Boozta nirqa: ¿Imanasqataq forastera kachkaptiypas llakipayariykuwaspa yanapaykuwanki? nispa.

¹¹ Chaymi Boozñataq nirqa: Yachanim qosayki wañukuptin suegraykiwan imaynam vida pasasqaykita, yachanitaqmi tayta-mamaykitawan nacekusqayki llaqtata saqemuspa mana reqsisqayki llaqtaman hamusqaykitapas.

¹² Diosyá tukuy chaykuna ruwasqaykimanta kutichipusunki, Israelpa yupaychasqan Diosyá bendecisunki payman hapipakamusqaykirayku, nispa.

¹³ Rutñataqmi Boozta nirqa: Taytalláy, llakipayaykuwaspam con-suelaykuwanki; mana serviqniki kachkaptiypas sonqollayta rimapayaykuwaspaykim kallpanchaykuwanki, nispa.

¹⁴ Mikuy hora chayaramuptinmi Rutta qayaykuspan Booz nirqa: Hamuy mikusunchik, tantaykitapas vinagrepiyá nuyuchiy, nispa. Chaymi rutuqkunawan kuska tiyaykuptin Boozqa mikuyta haywaykurqa, Rut-ñataqmi saksanankama mikuruspan puchupakururqaraq.

¹⁵ Huktawan pallapakunanpaq hatariptinmi, rutuqkunata Booz kamachirqa: Gavilla huñusqaykichikpipas hinam pallapakunqa, amam penqachinkichikchu,

¹⁶ rutusqaykichik gavillamantapas mana musyayllatam wichichinkichik pallapakunanpaq, amam michakunkichikchu, nispa.

¹⁷ Chaynapim Rutqa punchaw qaspaykunankama chakrapi pallapakurqa; chay cebada pallapakusqanta qaqoruptinmi yaqa iskay arroba nisqa lloqsirurqa.

¹⁸ Pallapakusqanta aparikuspa llaqtaman kutiruspanmi suegranman qawaykachirqa, hinaspanmi alsakamusqantapas qepinmanta hurqoykuspan qoykurqa.

¹⁹ Suegranñataqmi tapurqa: ¿Maypitaq pallapakamurqanki? ¿Maypi-taq kunan punchaw llamkapakamurqanki? Diosyá bendecichun yanapaykusuqniki runata, nispa. Maypim llamkamusqanta suegranman willaspanmi Rut nirqa: Kunan punchaw llamkamusqay chakrayuqpa sutinqa Boozmi, nispa.

²⁰ Noemiyñataqmi llumchuyninta nirqa: Diosyá payta bendecichun. Diosqa bendeciykuwanchikmi ñoqanchikta hinaspa wañukuqninchikunatapas. Chay runaqa qosaypa ayllunmi, payqa nanachikunanmi ñoqanchikmantapas, nispa.

²¹ Rutqa kaytapas willarqataqmi: Chay runam niwarqa: Criadaykunawan kuskayá pallapakuy rutuy tukunankama, nispa.

²² Noemiyñataqmi llumchuyninta nirqa: ¡Ima allinmi wawalláy! Allinpunim criadankunawan llamkakuynikiqa, chaynapi amaña huklaw chakrakunaman richkanaykipaq, nispa.

²³ Chaynapim Rutqa Boozpa cria-dankunawan kuska pallapakurqa, ceba-da rutuywan trigo rutuy tukunankama. Hinaspanmi Rutqa suegranwan kuska yacharqa.