Romanos 9 - CHUYA QELLQA La Biblia en Quechua de Ayacucho 2012

Diospa akllasqankunamanta

¹ Cristopi iñisqayraykum cheqap kaqta rimani, manam llullakunichu. Chuya Espiritupa yanapasqanmi concienciaypas niwan, rimasqayqa cheqap kasqanta.

² Llumpa-llumpay llakisqam kachkani, sonqoypas tukuy tiempom nanasqa kachkan,

³ Cristomantapas rakikuruymanmi ñakasqa kanaypaq, sichum chay ruwasqaywan judiomasiykuna salvakunanku kaptinqa.

⁴ Paykunaqa Diospa churichakuykusqan Israelpa mirayninkunam. Diosmi hatu-hatun sumaq kayninta paykunaman qawachirqa, hinaspam pactota ruwarqa, leytawan promesankunata qospanmi imaynam yupaychanankupaq yachachirqa.

⁵ Paykunaqa ñawpa taytanchikkunapa mirayninmi, paykunapa mirayninmantam Cristopas runa kayninpi nacemurqa, Cristoqa Tukuy imapa hawanpi munaychakuq Diosmi. ¡Wiña-wiñaypaq yupaychasqayá kachun! Amén.

⁶ Amayá piensaychikchu Diospa promesankuna mana cumplikusqantaqa, Israelmanta miramuqkunapas manam lliwchu israelitakuna,

⁷ nitaqmi Abrahampa llapallan mirayninkunachu cheqap churinkunaqa, chaymi Dios nirqa: “Isaacllamantam qampa miraynikikunaqa kanqa”, nispa.

⁸ Chaynaqa, manam imananchu pipa miraynin kaypas Diospa churin kanapaqqa. Aswanqa Diospa promesanman hina naceqkunallam Abrahampa cheqap mirayninkuna hinaqa kanku.

⁹ Abrahammanmi kaynata Dios prometerqa: Wataman kunan hinatam kutimusaq, hinaptinmi warmiki Sarapas wawayuqña kanqa, nispa.

¹⁰ Manam chayllachu karqa, Rebecapas huk taytallapatam mellizota wiksayakurqa, paymi karqa ñawpaq taytanchik Isaac.

¹¹ Chaymi paykuna manaraqpas nacechkaptinku chaynataq allintapas otaq mana allintapas manaraq ruwachkaptinku,

¹² Rebecata Dios nirqa: “Punta nacemuqmi sullkanta servinqa”, nispa.

¹³ Chuya Qellqapim kaynata nin: “Jacobtam kuyarqani Esautañataqmi cheqnirqani”, nispa.

¹⁴ ¿Imanisuntaq kaykunamanta? ¿Diosqa mana allintachum ruwachkan? ¡Manapunim!

¹⁵ Moisesmanpas kaynatam nirqa: “Pim llakipayasqaytam llakipayasaq pim kuyasqaytam kuyapayasaq”, nispa.

¹⁶ Chaynaqa, Diosqa kuyasqanman hinam pitapas akllan, manam runapa munasqanman otaq kallpanchakusqaman hinachu.

¹⁷ Qellqapipas Diosmi rey Faraonta kaynata nirqa: Qamtaqa hatarichirqayki qamnintakama atiyniyta runakunaman qawachinaypaqmi, chaynapi lliw kay pachapi sutiy willakusqa kananpaq, nispa.

¹⁸ Chaynam Diosqa munarispaqa pitapas kuyapayarin. Chaynataqmi munarispaqa pipa sonqontapas rumiyachin.

¹⁹ Chayna kaptinqa niwankichá: Tukuy ima ruwasqanchikkuna Diospa munasqallan kaptinqa, ¿imanasqataq huchasapapaq hapiwanchik? nispa.

²⁰ Ichaqa yaw runa, ¿pitaq qamqa kanki Dioswan churanakunaykipaqqa? Yaqachum mitumanta ruwasqa manka ruwaqninta ninman: ¿Imanasqataq kaynata ruwaruwanki? nispa.

²¹ Manka ruwaqqa imam munasqantam mitumantaqa ruwan. Munarispaqa kuyayllapaq allin qawasqa mankatam ruwan, chay mitullamantataqmi mana allinpaq qawasqa mankatapas ruwan.

²² Diosmi piñakuyninta hinaspa atiyninta qawachiyta munarqa. Chaywanpas ñutupanapaq manka hina castigopaqña kachkaptinpas pacienciaykuspam aguantarqa.

²³ Chaynataqmi kuyayllapaq mankamanta hina ñoqanchikmantapas kuyapayarikurqa llumpay hatun atiyninta qawachikunanpaq. Ñawpaqmantapunim preparawachkanchik payman rikchakuqña sumaq kancharichkaq kananchikpaq.

²⁴ Chaynatam Dios qayaykuwarqanchik, wakiqninchikta judiokunamanta wakiqninchiktañataq mana judío kaqkunamanta.

²⁵ Profeta Oseaspas kaynatam qellqarqa: “Mana llaqtay kaqkunatam llaqtayñam kankichik”, nisaq. “Mana kuyasqaykunatam kuyasqaykunañam kankichik”, nisaq.

²⁶ “Qamkunaqa manam llaqtaychu kankichik nisusqaykichik sitiopim: Qamkunaqa kawsaq Diospa churinñam kankichik” nispa, nisunkichik.

²⁷ Israelpa mirayninmantam profeta Isaías nirqa: Lamar qochapi aqo hinaña kachkaspapas Israelpa mirayninkunaqa wakillanmi salvakunqa.

²⁸ Señorqa chayllam rimasqanta kay pachapi llapallan kaqkunawan cumplinqa, nispa.

²⁹ Ñawpaqtaraqmi Isaías nirqa: “Sichum Tukuy Atiyniyuq Señor Dios, mirayninchikta mana puchuykachiptinqa, Sodoma llaqta hinachá kachwan karqa, Gomorra llaqta hinachá kachwan karqa”, nispa.

Judiokunapa mana kasukusqanmanta

³⁰ ¿Imanisuntaq? Mana judío kaqkunapas Diosta mana ñawpaqta maskachkaspankupas, iñisqankuraykum Diospa pampachasqanña rikurirunku.

³¹ Judiokunañataqmi kamachikuyman hina pampachakuyta maskarqaku, ichaqa manam tarirqakuchu.

³² ¿Imanasqataq manaqa tarirqakuchu? Diosman mana iñisqankuraykum chaynataq ruwayllankuwan maskasqankuraykum. Chaynapim mitkana rumipi mitkakururqaku.

³³ Chuya Qellqapim kaynata nin: “Sión moqopim mitkana rumita churani, Sión moqopim urmachikuq hatun rumita churani, pipas paypi iñiqqa manam hukmanyanqachu”, nispa.