Romanos 7 - CHUYA QELLQA La Biblia en Quechua de Ayacucho 2012

Casada warmiwan rikchanachiymanta

¹ Wawqe-panillaykuna, leytaqa allintam yachankichik, huk runaqa kawsanankamallam leytaqa kasukun.

² Huk casada warmipas leyman hinaqa qosan kawsanankamallam payman sujetasqa. Qosan wañukuptinmi ichaqa chay leymanta libreña rikurirun.

³ Sichum qosan kawsachkaptinraq hukwan tupakuruspanqa waqllikuy huchamanmi wichiykun. Qosan wañuruptinmi ichaqa, casada kasqan leymanta libreña rikurirun, hukwan yapakuspapas manañam waqllikunñachu.

⁴ Wawqe-panillaykuna, chaynam qamkunapas Cristoman hukllawa-kuspaykichikqa leypaqa wañurunkichikña, wañusqanmanta kawsari-muq Jesucristowan hukllaña kanay-kichikpaq, chaynapi Diosllataña servinanchikpaq.

⁵ Aychapa munasqanman hina kawsaptinchikqa leypas mana allinkuna ruwaymanmi tanqawarqanchik, chaynapim wañuypaq kaqkunallata ruwachiwarqanchik.

⁶ Kunanmi ichaqa munaychakuwaqninchik leypaqqa wañurunchikña, chaynapim libreña kachkanchik, Espiritupa qowasqanchik musoq kawsakuypiña Diosta servinanchikpaq, manam ñawpaq qellqasqa leyman hinañachu.

Munaychakuwaqninchik huchamanta

⁷ Hinaptinqa, ¿imanisuntaq? ¿Leyqa huchachum? ¡Manapunim! Mana ley kaptinqa manachá yachaymanchu karqa imam huchallikuy kasqantapas. Manachá yachaymanchu karqa runapa kaqnin munapayayqa hucha kasqanta: “Amam munapayankichu” nispa ley mana niptinqa.

⁸ Hucham kamachikuykunapi hapikuykuspan, millakuypaq munapayaykunata ñoqapi hatarirachin. Ley mana kaptinqa huchapas manam kanchu.

⁹ Ñawpaqtaqa manam leyman hinachu kawsarqani. Ley rikuriramuptinmi ichaqa hucha kawsarirurqa, ñoqañataqmi wañururqani.

¹⁰ Chaynapim kawsayman pusawaqniy kamachikuyqa wañuyman aparuwan.

¹¹ Hucham kamachikuyman hapikuykuspan engañaruwan hinaspam wañuyman aparuwan.

¹² Chaywanpas Diospa qosqan leyqa chuyam. Kamachikuykunapas chuyam, mana pantayniyuq hinaspa allinpunim.

¹³ Hinaptinqa, ¿chayna allin kamachikuychum wañuyman aparuwan? ¡Manapunim! Huchallikuymi hucha kasqanta qawachikunanpaq allin kaqman hapikuykuspan wañuyman aparuwan, hinaptinmi imam hucha kasqanta yacharuni. Chaynapim kamachikuykunaqa yachachiwanchik huchallikuyqa llumpay mana allin kasqanta.

¹⁴ Yachasqanchikpi hinapas leyqa Diosmantam hamun. Ñoqam ichaqa aychalla kani huchaman rantikusqa.

¹⁵ Manam ima ruwasqaytapas yachakunichu, munasqay kaqtaqa manam ruwanichu, aswanqa mana munasqay kaqtaraqmi ruwani.

¹⁶ Chaynaqa, mana munasqay kaqta ruwaspaymi nini: “Leyqa allinmi”, nispay.

¹⁷ Chaynaqa, manam ñoqañachu mana allintaqa ruwani, aswanqa ñoqapi kaq hucham.

¹⁸ Ñoqaqa yachakunim, ñoqapiqa manam ima allin kaqpas kanchu, aswanqa mana allin kaqkunallam; maynatam munani allin kaqkuna ruwayta, ichaqa manam atinichu.

¹⁹ Allin kaq ruway munasqaytaqa manam ruwanichu, aswanqa mana ruway munasqay kaqtaraqmi ruwani.

²⁰ Chaynaqa, sichum mana munasqay kaqta ruwaspayqa, manañam ñoqachu ruwani, aswanqa ñoqapi kaq hucham.

²¹ Chaynaqa, allin kaqkuna ruwayta munaspaypas mana allinllatam ño-qapi tarini.

²² Sonqoypiqa Diospa ley-ninpim kusikuni;

²³ chaywanpas cuerpoypiqa huk kamachikuymi kachkan, chay kamachikuymi yuyaymanayniypi kaq kamachikuypa contranpi kachkan, hinaspanmi aychaypi kaq huchapa kamachikuyninman presota apawan.

²⁴ ¡Imallapiraq rikukuni! ¿Pitaq aychaypi kaq wañuypa munaychakuyninmanta libraykuwanqa?

²⁵ Ichaqa Diosman gracias kachun Señorninchik Jesucristomanta. Yuyaymanayniywanqa Diospa leynintam kasukuni, aychaywanñataqmi huchapa kamachikuyninta kasukuni.