Romanos 5 - CHUYA QELLQA La Biblia en Quechua de Ayacucho 2012

Dioswanqa allinyanakusqaña kasqanchikmanta

¹ Iñisqallanchikraykum Diosqa mana huchayuqpaqña chaskiwanchik, Señorninchik Jesucristontakamam Dioswan hawkayayta haypanchik.

² Iñisqanchikraykum Jesucristontakama Diosman asuykunchik hinaspa kuyakuyninwan allinta takyachkanchik. Hinaspataqmi kusikuchkanchik Diosman rikchakuq kancharichkaq suma-sumaq kananchikta confianzawan suyaspa.

³ Chaynataqmi ñakariykunapipas kusikunchik, ñakariykunaqa pacienciakuytam yachachiwanchik,

⁴ pacienciakuyñataqmi allinpaq hapisqa kayta, allinpaq hapisqa kayñataqmi Diosman hapipakuyta;

⁵ Diospi hapipakuyñataqmi paypi takyachiwanchik, Diosmi kuyakuyninta sonqonchikman huntaykuwarqanchik qowasqanchik Chuya Espirituntakama.

⁶ Salvakuyta mana atichkaptinchikmi Diospa akllasqan tiempo chayaramuptin ñoqanchik huchasapakunapa rantinchikpi Cristo wañurqa.

⁷ Cheqaptapas huk allin ruwaq runapa rantinpi wañuruyqa sasallañam, ichapas allin ruwaq runapa rantinpi hukkaq wañurunman.

⁸ Diosmi ichaqa kuyakuyninta qawachiwanchik huchasapa kachkaptinchikpas ñoqanchikrayku Cristo wañupuwas-qanchikwan.

⁹ Cristopa yawar chaqchus-qanwanmi mana huchayuqtaña Dios ruwaykuwanchik, chaynapim paynintakama tukupay punchawpi Diospa piñakuyninmanta salvasqaña kasunchik.

¹⁰ Diospa enemigon kachkaptinchikpas, Churin Jesuspa wañusqanwanmi kikinwan allinyanaykachiwanchik. Chayna-qa, Dioswan allinyanakusqaña kaspan-chikqa, aswanraqmi vidanrayku salvasqa kasunchik.

¹¹ Manataqmi chayllachu, Señorninchik Jesucristontakamam Diospi kusikusunchik, Jesucristontakamam Dioswan allinyanakuyta haypaykunchik.

Adanmantawan Cristomanta

¹² Huk runantakamam kay pachaman hucha yaykuramurqa, huchantakamañataqmi wañuypas yaykuramurqa, chay wañuymi lliw runakunaman chayarun llapallanku huchayuq kasqankurayku.

¹³ Manaraqpas kamachikuykuna qomusqa kachkaptinqa, ñam huchaqa kay pachapi karqaña; chaywanpas maypim kamachikuypa mana kasqanpiqa manam pipas huchayuqpaq hapisqachu.

¹⁴ Ichaqa Adanmanta Moiseskamam lliw huchallikuqkunapi wañuy munaychakurqa, paykunaqa manam Adán hinachu kamachikuypa contranpi huchallikurqaku. Adanmi karqa hamuq Cristopa rikchaynin.

¹⁵ Chaywanpas Adanpa mana kasukuyninqa manam rikchakunchu Diospa kuyakuynin qowasqanchikmanqa. Huk runapa huchallikusqanmantam lliw runa wañun, Diospa mana imallapaq huk runantakamalla otaq Jesucris-tontakamalla kuyakuy qowasqanchikmi ichaqa lliwpa allinninpaq, chayqa hatu-hatunmi.

¹⁶ Adanpa huchallikusqantaqa manam tupachichwanchu Diospa qowas-qanchik kuyakuywanqa. Huk hucha-llamantam wañuy hamurqa, Diospa kuyakuy qomusqanmi ichaqa mayna huchayuq kachkaptinpas runakunata mana huchayuqtaña ruwaykun.

¹⁷ Imay-nam huk runapa huchallanmanta wañuy munaychakurqa, chaynam mana imallapaq Diospa salvasqan runakunapas sapallan Jesucristopa ruwasqallanwan musoq kawsakuypi aswanraq munaychakunqaku.

¹⁸ Chaynaqa, imaynam huk runapa huchallamanta lliw runakuna wañuypaq condenasqa karqanchik, chaynapunim sapallan Jesucristopa allin ruwasqanpas llapa runakunata mana huchayuqtaña ruwaykun chaynapi wiñay kawsanankupaq.

¹⁹ Imaynam chullalla runapa mana kasukusqanwan achkallaña runakuna huchasapa rikurirurqaku, chaynam chullalla runapa kasukusqanwanpas achkallaña runakuna mana huchayuqña rikurinqaku.

²⁰ Leyqa qomusqa karqa hucha astawan achkayananpaqmi, ichaqa hucha astawan rikuriptinmi, Diospa kuyapayakuyninpas aswan chaninchasqa karqa.

²¹ Imaynam huchaqa wañuyta aparamuspan munaychakurqa, chaynam Diospa kuyakuyninpas mana huchayuqtaña ruwawaspanchik munaychakurqa, Jesucristontakama wiñay kawsakuyta qowaspanchik.