Romanos 3 - CHUYA QELLQA La Biblia en Quechua de Ayacucho 2012

¹ Hinaptinqa, ¿imapaqtaq judío kayqa allin? ¿Imapaqtaq qari kayninpi señalasqa kaypas allin?

² Arí, allinpunim. Puntataqa judiokunamanmi Diospa palabran qomusqa karqa.

³ Hinaptinqa, ¿paykunamanta wakiqninku mana kasukuq kasqankuraykuchu Diospas qepanchakurunqa?

⁴ Manam, llapallan runakunaña llulla kachkaptinkupas aswanraqmi Diosqa cheqap kaqwan imatapas ruwan. Chuya Qellqapim kaynata nin: “Cheqap rimaq kasqaykitam reqsichikunki, chaynapim juzgasqa kaspaykipas vencenkipuni”, nispa.

⁵ Huchasapa kasqanchikmi reqsichiwanchik Diosqa mana pimanpas sayapakuspa juzgasqanta, hinaptinqa ¿imanisuntaq? Chaynaqa, huchanchikmanta Dios castigawaspanchikqa, ¿cheqniwaspanchikchu chayta ruwanman? (Chaytaqa runa hinallam rimachkani).

⁶ ¡Manapunim! sichum pimanpas Dios sayapakuq kaspaqa, ¿imaynataq llapa runakunata juzganman?

⁷ Sichum ñoqapa llullakusqay Diospa cheqap kaqninkunata reqsichinman chaynapi Dios hatunchasqa kananpaq, hinaptinqa, ¿imanasqataq huchasapata hinaqa juzgawanku?

⁸ Chayna kaptinqa, ¿imanasqataq mana allin kaqkunata mana ruwanchikchu allin kaqkuna hamunanpaq? Chaynata nispankum yanqamanta achkaq cargochawanku. Paykunam ninku: “Pablom chaynata yachachichkan” nispanku; chayna runakunaqa condenasqayá kachunku.

Lliw runakuna huchayuq kasqanchikmanta

⁹ Chaynaqa, ¿judiokunachu wakin runakunamanta aswan allin kanchik? ¡Manapunim! Ñam yachanchikña, judiokunapas chaynataq mana judiokunapas huchapa watasqan kasqanchikta.

¹⁰ Chuya Qellqapim kaynata nin: Manam hukllapas allin ruwaqqa kanchu,

¹¹ manam pipas yachayniyuqqa kanchu, manataqmi pipas Diostaqa maskanchu.

¹² Llapallankum pantay ñanta pasakunku, llapallankum mana allinman wichiykunku, manam pipas allin ruwaqqa kanchu, manam hukllapas kanchu.

¹³ Rimasqankupas sepultura hinam, qallunkuwanmi llullakunku, siminkumantapas maqta urupa venenon hinam lloqsimun.

¹⁴ Rimankupas ñakaytawan piñakuyllatam.

¹⁵ Chakinkupas runata wañuchinanpaqmi utqayman kallpan.

¹⁶ Ñanninkupipas purmachiywan wakchayayllam kachkan.

¹⁷ Hawkayay ñantapas manam reqsinkuchu.

¹⁸ Dios manchakuytapas manam yachankuchu, nispa.

¹⁹ Yachanchikmi leypa nisqanqa leyman hina kawsaqkunapaqmi qosqa karqa, chaynapi siminku wichqasqa kananpaq hinaspa llapallan runakuna Diospa juzgasqan kanankupaq.

²⁰ Leyman hinaqa manam pipas Diospa qayllanpiqa mana huchayuqqa kanmanchu, leyqa huchayuq kasqanchiktam reqsichiwanchik.

Iñispalla salvasqa kasqanchikmanta

²¹ Kunanmi ichaqa, manaña leyman hinañachu imaynam mana huchayuqpaqña chaskiwasqanchikta Dios reqsichiwanchik. Chaytam leywan profetakuna kaynata nin:

²² Jesucristoman iñikuptillanchik-mi Diosqa llapa runakunata mana huchayuqtaña ruwawanchik. Manam imananchu pim kasqanchikpas.

²³ Llapallan-kum huchallikurunku, Diospa kancha-riq qayllanmantam qarqosqa kachkan-ku.

²⁴ Diosmi ichaqa kuyapayakuyninpi mana imallapaq, Cristo Jesús rantin-chikpi wañusqanrayku mana huchayuqtaña ruwaykuwanchik.

²⁵ Diosmi ñawpaq huchanchikkunata pampachawananchikpaq Jesucristota churarqa, wañuspa yawarnin chaqchusqanwan salvasqa kananchikpaq, chaytaqa iñiyllawanmi haypanchik. Chaynatam Diosqa pacienciayuq kasqanta qawachiwanchik.

²⁶ Kunanmi ichaqa huchanchikkunata pampachawaspanchik haykam Jesusman iñikuqkunata mana huchayuqpaqña Dios chaskiwanchik. Chaynapim justo kasqanta qawachiwanchik.

²⁷ Hinaptinqa, Diospa qayllanpi runapa hatun tukuyninqa ¿maypitaq kachkan? ¡Chayqa chinkasqañam! ¿Imanasqa? Manam leyta cumplisqanraykuchu, aswanqa iñisqanraykullam.

²⁸ Chaynapim yachanchik, runakunaqa iñiyllawan mana huchayuqpaqña Diospa chaskisqan kasqanta. Chayqa manam leyta kasukusqanraykuchu.

²⁹ Chaynaqa, Diosqa ¿judiokunapa Diosnillanchu? ¿Manachu wakiq runakunapapas Diosninku? Arí, paykunapapas Diosninkum.

³⁰ Diosqa chullallam. Chaymi pipas iñikuptinqa mana huchayuqpaqña chaskin, qari kayninpi señalasqa judío kaptin otaq mana señalasqa kaptinpas.

³¹ Chaynaqa, iñispallanchik salvakuspaqa, ¿mana valeqpaqñachu leyta hapichwan? ¡Manapunim! Aswanqa valorninta reqsispam allinpaq hapinchik.