Romanos 16 - CHUYA QELLQA La Biblia en Quechua de Ayacucho 2012

Saludokuna apachisqanmanta

¹ Iñiqmasinchik Febetam recomiendamuykichik, payqa Cencrea iglesiapi diaconisam.

² Señorninchik Jesucristopa sutinpiyá allinllata chaskiykuychik imaynam iñiqpura chaskinakuykuchkaq hina. Paytaqa yanapaykuychikyá imam pisipusqanpipas, payqa achkaqtam yanaparqa, yanapawarqataqmi ñoqatapas.

³ Cristo Jesuspaq llamkaqmasiy Priscilatawan qosan Aquilatapas rimaykapuwaychik.

⁴ Paykunaqa viday salvawanankuraykum wañuytapas mana manchakurqakuchu. Chaynaqa, manam ñoqallachu agradecekuniqa, aswanqa llapallan mana judío kachkaspanku iñikuqkunapas agradecekunkum.

⁵ Paykunapa wasinpi huñunakuq iñiqmasinchikkunatapas rimaykapuwaychik. Chaynataq Asia lawpi puntallataraq Cristoman iñikuq kuyasqay Epenetotapas.

⁶ Llumpay yanapasuqnikichik Mariatapas rimaykapuwaychik.

⁷ Llaqtamasiy Andro-nicotawan Juniastapas rimaykapuwaychik, paykunaqa ñoqamanta puntataraqmi iñikurqaku, ñoqawan kuskataqmi presopas karqaku. Paykunaqa ancha reqsisqa apostolkunam karqaku.

⁸ Señorninchik Jesucristorayku ancha kuyasqay Ampliastapas rimaykapuwaychik,

⁹ Cristopaq llamkaqmasinchik Urbanotapas, kuyasqay Estaquistapas,

¹⁰ Cristopa allinpaq qawasqan Apelestapas chaynataq Aristobulopa wasinpi lliw kaqkunatapas rimaykapuwaychik.

¹¹ Judiomasiy Herodiontapas chaynataq Narcisopa wasinpi Señorninchikman iñikuqkunatapas.

¹² Trifenatawan Trifosatapas rimaykapuwaychik, paykunaqa Señor-ninchikpaq llamkaqmasikichikmi. Kuyasqay paninchik Persidatapas rimaykapuwaychik, paypas llumpaytam Señorninchikpaq llamkarqa.

¹³ Señorninchik serviq allin reqsisqa Rufotawan mamantapas rimaykapuwaychik, payqa ñoqapapas mamay hinam karqa.

¹⁴ Asincritotapas, Flegontetapas, Hermastapas, Patrobastapas, Hermestapas hinaspa paykunawan kaq wawqe-paninchikkunatapas rimaykapuwaychik.

¹⁵ Filologotawan Juliatapas hinaspa Nereotapas panintinta chaynataq Olimpastapas paykunawan kaq llapallan iñiqmasinchikkunatapas rimaykapuwaychik.

¹⁶ Chuya muchakuywan rimaykanakuychik. Tukuy hinastinpi Jesu-cristopa sutinpi huñunakuqkunapas rimaykamusunkichikmi.

¹⁷ Wawqe-panillaykuna, ruegakamuy-kichikmi yachachikuykuna chaskisqaykichikpa contranpi kaqkunamantayá cuidakuychik. Paykunaqa iñiqkunata rakinachispankum pantachikuyllata ruwachkanku, paykunamantaqa karunchakuychik.

¹⁸ Paykunaqa manam Señorninchik Jesucristotachu servinku, aswanqa kikinkupa wiksallankumantam afanakunku. Sumaqllataña rimaspankum manaraq ancha yachaqkunata engañanku.

¹⁹ Dios kasukuq kasqaykichiktaqa lliwmi yachanku, chay ruwasqaykichikwanmi anchata kusikuni. Ichaqa munani allin kaqkunapi ancha yachayniyuq kanaykichiktam, mana allin kaqkunapaqñataq mana yachayniyuq kanaykichikta.

²⁰ Hawkayay qokuq Diosninchikmi Satanastaqa chakikichikman churaspa chaylla sarupanqa. Señorninchik Jesucristopa kuyakuyninyá qamkunawan kachun.

²¹ Chaynataqmi llamkaqmasiy Timo-teopas, judiomasiy Luciowan Jason-pas hinaspa Sosipaterpas rimayka-musunkichik.

²² Pablopa secretarion ñoqa Tercio-pas Señorninchikpa sutinpim rimay-kamuykichik.

²³ Wasinpi samapakusqay Gayopas chaynataq wasinpi huñunakuq iñiqmasinchikkunapas rimaykamusunkichikmi. Llaqtapa qollqen waqaychaq Erastopas hinaspa wawqenchik Cuartopas rimay-kamusunkichikmi.

²⁴ [Señorninchik Jesucristoyá llapallaykichikta yanapasunkichik. Amén].

Tukuykunanpaq Diosta Pablo yupaychasqanmanta

²⁵ Jesucristomanta allin noticiakunata willaspay yachachisqayman hina Diosninchik qaqata hina takyachisunkichik. Kaykunaqa kachkan ñawpaqmantaraq pakasqa kaqkunata kunan reqsichiwasqanchikman hinam. Chaynaqa, ¡payllatayá yupaychasun!

²⁶ Kunanqa profetakunapa qellqasqanwanmi llapallan nacionkunaman qawachisqaña kachkan. Chaymi wiña-wiñaypaq kawsaq Dios kamachiptin llapallan nacionkunapipas kay allin noticiataqa yachankuña, iñikuspa kasukunankupaq.

²⁷ ¡Sapallan yachayniyuq Diosmanyá Jesucristontakama wiña-wiñaypaq hatunchay kachun! Amén.