Romanos 14 - CHUYA QELLQA La Biblia en Quechua de Ayacucho 2012

Wawqe-panintin ama penqanakunamanta

¹ Pipas pisi iñiyniyuq kaptinqa ama imamantapas atipanakuspayá allinllata chaskiykuychik.

² Wakinmi ninku: Imapas mikuyqa allinmi, nispanku. Wakin pisi iñiyniyuq kaqkunañataqmi verdurallatam mikuna ninku.

³ Chaynaqa, tukuy imapas mikuqqa amayá penqachunchu mana mikuqtaqa, aychata mana mikuqpas amataqyá juzgachunchu tukuy ima mikuqtaqa. Chay runatapas Diosqa chaskinmi.

⁴ Hukpa sirvientenkunata juzganaykipaqqa, ¿pitaq qamqa kanki? Patronninchiki sirvientenkunataqa allin otaq mana allin kasqanmantapas juzganqa. Señormi sirvientenkunataqa atiyninwan allinman hurqonqa.

⁵ Wakinkuñataqmi ninku: Kay punchawmantaqa wak punchawmi aswan allinqa, nispanku. Wakinñataqmi lliw punchawkunata chaynallapaq hapinku. Chaynata tanteaspankuqa sapakamayá sonqonkupa nisqanman hina takyachunku.

⁶ Pipas mayqan punchawpi samaspaqa Señorta yupaychananpaqmi saman, chaynataqmi tukuy ima mikuqpas Señorta hatunchananpaq mikun, chay mikuymantam Diosman graciasta qon. Aycha mana mikuqpas Señorta hatunchananpaqmi mana mikunchu, paypas Diosmanmi graciasta qon.

⁷ Manam mayqanninchikpas kikillanchikpaqchu kawsanchik, nitaqmi wañukuspanchikpas kikillanchikpaqchu wañukusun.

⁸ Kawsaspanchikpas Señorninchikpaqmi kawsasun, wañu-kuspanchikpas Señorninchikpaqtaqmi wañusun. Chaynaqa, wañuspapas kawsaspapas Señorninchikpaqmi kanchik.

⁹ Chaypaqmi Cristoqa wañukuspan kawsarimurqa, chaynapi wañuqkunapa, kawsaqkunapa Señornin kananpaq.

¹⁰ Chaynaqa, ¿imanasqataq wawqekitaqa juzgachkanki? chaynataq, ¿imanasqataq wawqekitaqa despreciachkanki? Lliwchanchikmi Diospa qayllanman juzgawananchikpaq rikurisunchik.

¹¹ Chuya Qellqapim kaynata nin: “Señormi nin: Ñoqaqa kawsanim, llapallan runakunaqa qayllaypim qonqorakunqaku, llapallankum ñoqata yupaychawanqaku”, nispa.

¹² Chaynaqa, sapakamam Diosnin-chikman cuentata qosunchik.

Wawqe-panikunata ama huchaman urmachinamanta

¹³ Chaynaqa, amañayá kikinchikpuraqa juzganakusunchu, aswanqa tanteakuychik ama wawqe-panikichikta urmachinaykipaq hinaspa iñiyninpi ama wichichinaykichikpaq.

¹⁴ Señor Jesuswan huklla kaspaymi yachani ima mikuypas chuya kasqanta, aswanqa pipas chay mikuy millakuypaq kasqanta piensaptinqa paypaqchá millakuypaq kanqa.

¹⁵ Sichum imapas mikusqaykiwan wawqekita hukmanyachinki, hinaspaqa manañam kuyachkankiñachu. Amayá imapas mikusqaykiwanqa pipas huchaman wichiykunantaqa munaychu, paypaqpas Cristom wañupurqa.

¹⁶ Amayá munaychikchu imapas allin ruwasqaykichikmanta mana allin rimanankutaqa.

¹⁷ Diospa munaychakuyninqa manam mikukuyllachu nitaq upyakuyllachu, aswanqa Chuya Espiritupa yanapakuyninwan allinta ruwaspa hawkalla kusisqa kawsakuymi.

¹⁸ Kaynatapuni pipas Cristota servispa Diospa munasqanta ruwaptinmi runakunapas allinpaq hapinku.

¹⁹ Chaynaqa, hawkalla kawsakuytayá maskasun, chaynapi iñiqmasinchikkunawan aswan wiñachinakunanchikpaq.

²⁰ Amayá mikuypa causanpiqa Diospa obrantaqa tuñichiychu. Yachasqanchikpi hinapas llapallan mikuykunaqa chuyanchasqam kachkan, ichaqa manam allinchu mikusqanchikwan wakinkunata huchaman wichiykachiyqa.

²¹ Allinmi kanman aychata mana mikuspayki vinotapas mana tomaynikiqa, iñiqmasikita wichichinaykipaq hina kaptinqa ama imatapas ruwaychu.

²² Kaykunapi iñisqaykimantaqa sonqollaykipi waqaychaspayki Diosllaman willakuy. Mayna kusisqam imapas ruwasqanmanta sonqon “allinmi” niptinqa.

²³ Pipas iskayrayastin mikuqmi ichaqa huchallikuchkan mana allinpaq hapichkaspan mikusqanrayku. Chaynaqa, mana allinpaq hapichkaspanchik imapas ruwaruyqa hucham.