Romanos 13 - CHUYA QELLQA La Biblia en Quechua de Ayacucho 2012

Kamachikuqkuna kasukunamanta

¹ Lliwchaykichikyá kamachikuqkunata kasukuychik, lliw kamachikuqkunaqa Diospa churasqanmi. Kunan kaq kamachikuqkunatapas Diosmi churarqa.

² Chaynaqa, pipas kamachikuqkunapa contranpi sayariqqa Diospa kamachikuyninpa contranpim kachkan, chayna sayariqkunaqa castigasqam kanqaku.

³ Kamachikuqkunaqa manam allin ruwaqkunata manchachinanpaqchu kachkan, aswanqa mana allin ruwaqkunata manchachinanpaqmi. Chaynaqa, kamachikuqkunata mana manchakuyta munaspaykiqa allinta kawsakuy, chaynapim kamachikuqkunapas alabasunki.

⁴ Paykunaqa Diosta servinanpaq churasqam kachkanku qamkunapa allinnikichikpaq, chaynaqa mana allinta ruwaspaqa manchakunaykim. Kamachikuqkunaqa manam yanqapaqchu atiyniyuq kanku, aswan-qa mana allin ruwaqkunata castigananku-paqmi.

⁵ Chaynaqa, kamachikuqkunataqa kasukunanchikmi, manam castigota manchakuspallachu, aswanqa allinpuni kasqanraykum.

⁶ Chayraykum impuestotapas pagankichik, kamachikuqkunaqa sapa punchawmi Diosta servispanku llamkachkanku.

⁷ Pimanpas paganaykichik kaptinqa pagaychikyá: Impuesto kaptin impuestota, tributo kaptin tributota, respetana kaptin respetota, hatunchana kaptin hatunchayta.

⁸ Ama pitapas debekuychikchu, debespaqa debenakuychik kuyakuyllata, pipas runamasinta kuyaqqa leytam cumplirunña.

⁹ Kaynatam wakin kamachikuykunapas niwanchik: Amam waqllikunkichu, amam wañu-chinkichu, amam suwakunkichu [amam llullataqa willakunkichu], nitaqmi pipa imantapas munapayankichu, nispa. Kay kamachikuywan wakin kaqkunaqa hukllawakun: “Runamasikitam kikikita hina kuyanki” niq kamachikuypim.

¹⁰ Pipas kuyakuqqa manam runamasintaqa imananchu. Chaynaqa, kuyanakuspam leytaqa allinta cumplinchik.

¹¹ Kaywanqa yachanchikmi ima tiempopim kawsasqanchikta, ñam rikcharinaykichik horaña. Cristoman iñisqanchik punchawmantam ña hichpamuchkanña salvaykuwananchikpaq punchaw.

¹² Tutam pasachkanña, ñam achkiramunqaña. Chaynaqa, tutayaypi ruwasqanchikkunataqa saqesunña hinaspa kanchaywan pachallisqa purisun.

¹³ Hinaspa achkiypi purichkaq hina kawsasun: Ama mikukuyllapichu, sinkakuyllapichu, hukwan-hukwan tupakuyllapichu, liryanakuyllapichu nitaq envidianakuyllapichu.

¹⁴ Aswanqa Señorninchik Jesucristowan pachallikuychik, aychapa munaynintapas amaña ruwaychikchu.