Romanos 12 - CHUYA QELLQA La Biblia en Quechua de Ayacucho 2012

Diosllapaqña kawsananchikmanta

¹ Chaynaqa, wawqe-panillay-kuna, Diosninchikpa llakipaya-kuyninraykum ruegakuykichik, cuer-poykichiktayá Diosman qoychik, kawsachkaq ofrendata hina hinaspa chuyata, paypa munasqanman hina. Kaynam cheqap yachaywan Diosta yupaychayqa.

² Kay tiempopi runakunapa ruwasqantaqa ama qatipakuychikchu, aswanqa yuyaymanaynikichiktayá allinmanña tikraychik, chaynapi kawsaynikichik musoqña kananpaq. Chaynata kaw-saspam yachankichik imaynam Diospa munayninman hina hinaspa mana pantaspa paypaq hina kawsayta.

³ Yachachinaypaq Dios churaykuwas-qanman hinam nimuykichik: Amayá pipas kikillanmantaqa hatun tukuspaqa piensachunchu. Aswanqa allinta yuyay-manaspayá sapakama tanteaychik, imaynam sapakamaman Diospa iñiy qosusqaykichikman hina.

⁴ Imaynam cuerponchikpi achkallaña partenkuna kachkan, ichaqa manam llapallankuchu hina chaynallata ruwanku.

⁵ Chaynataqmi ñoqanchikpas achkallaña kachkaspapas Cristoman hukllawakuspanchikqa chullallaña kachkanchik, huk cuerpopa partenkuna kachkaspapas llapanchikmi hukllaña kachkanchik.

⁶ Diosmi atiyta qowarqanchik imapas ruwananchikpaq. Chaytam qowanchik kuyawasqanchikman hina. Chaynaqa, sichum profetizananchikpaq qowaptinchikqa iñiyninchikman hinayá chaywan llamkasun,

⁷ servinapaq qowaptinchikqa, servikusunyá, yachachinapaq qowaptinchikqa, yachachisunyá,

⁸ Kallpanchanapaq qowaptinchikqa, kallpanchasunyá, imallapas qokuykuq kayta qowaptinchikqa, qokuykuqyá kasun, kamachikuq kanapaq qowaptinchikqa, llampu sonqowanyá kamachikusun, llakipayakuq kayta qowaptinchikqa kusikuywanyá yanapaykusun.

Iñiqkunapa imam ruwananmanta

⁹ Cheqaptapuni kuyanakuychik, mana allin kaqkunata cheqnispa, allin kaqkunata ruwaychik.

¹⁰ Wawqe-panintin hinayá huknikichikmanta huknikichikkama kuyanakuychik. Respetanakuspayá wakiqnikichikta imapipas aswan allinpaq hapiychik.

¹¹ Kallpanchakuychikyá, ama qellaqa kaychikchu, tukuy sonqoykichikwan Señorninchikta serviychik;

¹² suyasqaykichikpiyá kusikuychik, ñakarispapas pacienciakuychik, tukuy tiempo Diosta mañakuychik.

¹³ Diospi iñiqkunapa imam pisipusqanpi yanapaykuychik, wasikichikpipas samaykachikuqyá kaychik.

¹⁴ Qatikachasuqnikichiktaqa bendeciychik, ama ñakaspa bendeciychik.

¹⁵ Kusikuqkunawan kusikuychik, waqaq-kunawan waqaychik.

¹⁶ Huk sonqolla kawsaychik, ama hatunchakuspa aswanqa humillakuspa kawsakuychik, amataq llumpay yachayniyuqpaqpas hapikuychikchu.

¹⁷ Mana allin ruwasuqnikichiktaqa ama chayna mana allinwanqa kutichikuychikchu. Llapa runakunapa qayllanpiqa allin kaqta ruwaychik.

¹⁸ Atisqaykichikman hinayá imatapas ruwaychik, llapa runawan hawkalla kawsanaykichikpaq.

¹⁹ Kuyasqay wawqe-panillaykuna, ama pitapas vengakuychikchu aswanqa Señorpa makinman churaychik payña castigananpaq. Chuya Qellqapim kaynata nin: “Mana allin ruwaqkunataqa kikiypunim vengakusaq, mana allin ruwasqanman hinam pagapusaq”, nispa.

²⁰ Nintaqmi: “Enemigoyki yarqaymanta kaptinqa mikuykachiy, yakunayaptinpas yakuta qoykuy, kaynata ruwaptikiqa enemigoykipa uyanmi penqakuymanta pukayanqa”, nispa.

²¹ Mana allinwanqa amayá vence-chikuychu, aswanqa allin kaqta ruwaspa mana allintaqa vencey.