Romanos 11 - CHUYA QELLQA La Biblia en Quechua de Ayacucho 2012

Judiokunaqa wakillan salvakunankumanta

¹ Chaynaqa, tapukunim: ¿Israel llaqtantaqa Diosqa cheqnirunchu? ¡Manapunim! Ñoqapas Israelpa castanmi kani, Abrahampa mirayninmi, Benjamín ayllumanta kaqmi.

² Ñawpaqmantaraq akllasqan llaqtantaqa Diosqa manam cheqnirqachu. Yachasqaykichikman hinam Qellqa willawanchik, imaynam Eliasqa Diosta mañakuspan Israelpa contranpi kayna rimasqanta:

³ “Señorlláy, profetaykikunatam wañu-rachinku, hinaspam altarnikitapas tuñi-rachinku chaymi sapallayña qeparuni, ichaqa ñoqatapas wañurachiwaytam munachkanku”, nispa.

⁴ Chaymi Diosñataq nirqa: Qanchis waranqa qarikunatam puchu-chikurqani, paykunaqa manam Baal idolopa ñawpaqninpiqa qonqorakurqakuchu, nispa.

⁵ Chaynataqmi kunanpas puchuqkuna kachkanku. Paykunaqa Diospa kuyakuyninman hina akllasqakunam.

⁶ Chaynaqa, Diospa kuyakuyllanman hina kaptinqa manañam ruwayninchikkunaman hinachu. Mana chayqa kuyakuyqa manañachá kuyakuychu kanman.

⁷ Chaynaqa, Israelpa mirayninkunaqa manam hayparqakuchu ima munasqankutapas. Diospa akllasqankunam icha-qa paypa chaskisqanña rikurirunku. Wakinpa sonqonñataqmi rumiyarurqa,

⁸ Qellqapa nisqanman hina: Diosmi qoykurqa, mana imapas sientiq espirituta, ñawinkuwanpas mana rikukuy atinankupaq chaynataq rinrinkuwanpas mana uyarinankupaq. Chaynam kunankamapas kachkanku, nispa.

⁹ Davidpas kaynatam nirqa: “Convido ruwasqankupas trampa hinayá rikuriruchun, convido ruwasqankupas toqlla hinayá rikuriruchun, urmaruspanku castigasqa kanankupaq.

¹⁰ Paykunapa ñawinkutayá tutayarachiy, tukuy tiempoyá wasankutapas kurkurachiy”, nispa.

Mana judío kaqkunapas salvakusqankumanta

¹¹ Ichaqa ñoqam tapukuni: ¿Urmay-kuspankuqa pasaypaqñachu judiokunaqa Diosmanta karunchakurunku? ¡Manapunim! Aswanqa paykuna mana kasukusqankuraykum mana judío kaqkunaman salvacionqa chayaramun, chaynapi llapa judiokunapas envidiakunankupaq.

¹² Chaynaqa, judiokunapa pantayman wichisqanku llapa runakunapa allinninpaq hinaspa mana judiokunapa allinninpaq kachkaptinqa, ¡mayna allinraq kanqa judiokuna Diosman huktawan kutirikuyninkuqa!

¹³ Mana judío kaqkunamanmi ichaqa kayta nikichik: Diosqa akllaykuwarqa mana judío kaqkunapa apostolnin kanaypaqmi, chaynapim tukuy sonqoywan ruwachkani,

¹⁴ chayta qawaykuspanku wakin castaykunapas qamkunamanta envidiakuspanku salvakunankupaq.

¹⁵ Judiokunata Dios qepanchakuruptinmi llapallan runakuna Dioswan allinyanakurunku. Chaynaqa, ¡mayna allinraq kanqa judiokunata Dios chaskiykuptinqa! ¡Wañuymanta kawsarimuchkaq hinaraqcha kanqaku!

¹⁶ Pipas tantata ruwakuspan puntata Diospaq rakipuptinqa, llapallan tantam Diospaña sapaqchasqa rikurirun. Chaynataqmi sachapa sapinpas Diospaq sapaqchasqa kaptinqa kallmankunapas paypaña rikurirun.

¹⁷ Imaynam allin aceitunas sachapa kallmanta kuchuruspa huk purun aceitunas sachapa kallmantaña injertachkaq hinam, judiokunapa Diosmanta karunchakurusqankurayku qamkunaña injertasqa karunkichik. Chaymi allin aceitunas sachapa sapinwan alimentasqa kachkankichik.

¹⁸ Chaynaqa, judiokuna kuchusqa kallmakuna hina kaptinkupas amayá qamkunaqa hatunchakuychikchu. Qamkunaqa kallmakunallam kankichik, manam kallmankunachu sapinkunataqa kawsachin aswanqa sapinkunam llapallan kallmankunataqa kawsachin.

¹⁹ Ichapas niwaq: Ñoqayku injertasqa kanaykupaqmi kallmakunaqa kuchusqa karqa, nispayki.

²⁰ Arí, mana iñisqankuraykum kuchusqa karqaku, qamñataqmi ichaqa iñisqaykirayku paypa rantinpi allinta sayachkanki. Chaynaqa, Diospa qayllanpiqa ama hatun tukuychikchu aswanqa manchakuqyá kaychik.

²¹ Sichum chay cheqap kallmakunatapas mana pampachachkaspaqa qamtapas manam pampachasunkichu.

²² Chaynaqa, qawariy Diosqa kuyakuq kasqanta chaynataq imam rimasqan cumpliq kasqanta. Mana kasukuqkunapim rimasqanta cumplin, qamkunawanñataqmi kuyakuyninta. Mana chayqa paykuna hinachá kuchusqa kawaqchik.

²³ Sichum judiokuna rumi sonqo kayninkuta saqespa iñikunqaku, hinaptinqa huktawanmi injertachkaq hina maymi kasqanman kutiykachinqa, Diosqa huktawan injertananpaq atiyniyuqmi.

²⁴ Purun aceituna sacha kachkaptikim kuchurususpayki, mana chayna kanan kachkaptinpas allin aceitunas sachaman injertasurqanki, chay allin aceitunas sachapa kallmanpuni kachkaptinqa aswanraqchiki musoqmanta injertasqa kanqaku.

Judiokunapa salvakunanmanta

²⁵ Wawqe-panillaykuna, munachkanim Diospa pakasqan kaqkuna yachanaykichikta, chaynapi kikikichikmanta mana hatun tukuq kanaykichikpaq. Wakin judiokunam sonqonkuta rumiyarachinku, chaynaqa kanqaku mana judío kaqkuna iñikuspa salvakuy tukunankukamam.

²⁶ Chaymantañam llapallan judiokunapas salvasqa kanqaku. Chuya Qellqapim kaynata nin: “Sión llaqtamantam librakuqqa hamunqa, hinaspam Jacobpa mirayninta huchamanta rakinqa.

²⁷ Chaynapim pactoyta cumplisaq huchankuta qechuspay”, nispa.

²⁸ Judiokunaqa Cristomanta allin noticiakunata mana chaskispankum Diospa enemigon kachkanku qamkunapa allinnikichikpaq. Chaywanpas Diosqa paykunataqa kuyanraqmi ñawpaq taytankumantaraq akllasqa kasqankurayku.

²⁹ Diosqa kuyakuynin qowasqanchiktaqa manam kutichikunmanchu, nitaqmi qayakuynintapas qechuwachwanchu.

³⁰ Ñawpaqtaqa Diosta mana kasukuqmi karqankichik, kunanmi ichaqa judiokunapa mana kasukusqankurayku qamkunataña Diosqa kuyapayarisunkichik.

³¹ Chaynallataqmi kunanpas judiokunaqa mana kasu-kunkuchu, aswanqa qamkunataña Dios kuyapayasunaykichikpaq, chay-napim paykunapas Diospa kuyapayakuyninta haypanqaku.

³² Diosqa llapa-llanchiktam mana kasukuqta saqeykuwarqanchik, chaynapi llapallanchikmanta kuyapayariykuwananchikpaq.

³³ ¡Mayna hatunmi Diospa atiyninqa! ¡Payqa tukuy yachayniyuq kaspanmi tukuy imata reqsin! ¡Pitaq yachanman imam munasqantawan imam ruwanantapas!

³⁴ Chaynaqa: ¿Pitaq Señorpa imam piensasqanta yachanman? ¿Pitaq payta consejayta atinman?

³⁵ ¿Pitaq puntata imallantapas Diosman qoykunman karqa, chaynapi paypas kutichipunanpaq?

³⁶ Tukuy imapas Diosmantam hamun, pay kaptinmi, paypaqtaqmi tukuy imapas kachkan. Payllayá wiña-wiñaypaq qapaqchasqa kachun. Amén.