Romanos 1 - CHUYA QELLQA La Biblia en Quechua de Ayacucho 2012

Cartapa qallariyninmanta

¹ Jesucristopa serviqnin ñoqa Pablom rimaykamuykichik. Diosmi apostolnin kanaypaq qayaykuwaspan allin noticiata willakunaypaq akllaykuwarqa.

² Chaytam profetankunatakama ñawpaqmantaraq Dios prometekurqa Chuya Qellqapi.

³ Kay allin noticiaqa Diospa Churin Señorninchik Jesucristomanta willakuymi. Paymi aychaman hina nacemurqa Davidpa mirayninmanta.

⁴ Chuya Espirituman hinañataqmi, wañusqanmanta kawsarimusqanrayku, Diospa atiyniyuq Churinwan sutichasqa karqa.

⁵ Diospa kuyakuyninman hinam apóstol kanaypaq Jesucristontakama akllasqa karqani, chaynapi llapallan nacionkuna Jesucristopi iñispanku payllataña kasukunankupaq.

⁶ Chay runakuna hinam qamkunapas Jesucristopaq akllasqaña kachkankichik.

⁷ Chaymi Roma llaqtapi Diospa kuyasqankunaman qellqamuykichik, Diosmi kuyasunkichik, hinaspam payllapaqña kawsanaykichikpaq qayasurqankichik. Dios Taytanchikpa chaynataq Señorninchik Jesucristopa kuyakuyninwan hawkayayninyá qamkunawan kachun.

Roma llaqtapi kaqkunata watukuy munasqanmanta

⁸ Imamantapas puntataqa, iñisqay-kichikmanta tukuy hinastinpi allin-ta willakusqankuta yachaspaymi Jesu-cristopa sutinpi llapallaykichikmanta Diosman graciasta qoni.

⁹ Churin Jesucristomanta allin noticiata tukuy sonqoywan willakuspay servisqay Diosmi yachan qamkunapaq tukuy tiempo mana qonqaspay mañakusqayta.

¹⁰ Mañakuchkanitaqmi, Dios munaptinqa imaynapas qamkuna watukaykamuyta.

¹¹ Qamkunawan tupaykuytam llumpayta munachkani Chuya Espiritupa atiyninta qoykunaypaq chaynapi qaqa hina sayanaykichikpaq,

¹² hinaspa hukninchikmanta hukninchikkama iñiyninchikpi kallpanchanakunanchikpaq.

¹³ Wawqe-panillaykuna yachaychikyá, achka kutipim qamkunaman chayaykamuyta munarqani, ichaqa hamuyta munaptiypas sasachakuykunam harkawarqa. Anchatam munachkani wakin llaqtakunapi hina qamkunapipas iñiq-kuna miraykachiyta.

¹⁴ Griegokuna-manpas, mana griegokunamanpas, yachayniyuqkunamanpas chaynataq mana yachayniyuqkunamanpas willakunaymantam debekuni.

¹⁵ Chayraykum Roma llaqtaykichikpipas llumpayta munachkani Jesucristomanta allin noticiakuna willaykuyta.

Allin noticiaqa atiyniyuqmi

¹⁶ Jesucristomanta allin noticia willakuytaqa manam penqakunichu, chayqa Diospa atiyninmi haykam iñiqkunata salvananpaq, puntataqa judiokunata chaynataq mana judiokunatapas.

¹⁷ Kay allin noticiam reqsichiwanchik, imaynam mana huchayuqpaqña Diospa chaskiwasqanchikta, chayqa Diospi hapipakuspa iñikuptillanchikmi. Chuya Qellqapim kaynata nin: “Allin ruwaq runaqa iñikuspallam kawsanqa”, nispa.

Runapa huchallikusqanmanta

¹⁸ Diosmi piñakuyninta hanaq pachamanta kacharimun runakunapa mana allin ruwayninpa chaynataq mana llakipayakuq kayninpa contranpi. Paykunam mana allin kawsayninkuwan cheqap kaqkuna reqsinata harkakunku.

¹⁹ Paykunaqa Diosmantaqa yachankuñam, kikin Dios reqsichikusqanrayku.

²⁰ Diospa mana rikuy atina kaqninkunapas, wiñaypaq atiyninpas chaynataq Dios kayninpas, kay pacha unanchasqa kasqanmantapunim tukuy ima unanchasqankunapi reqsichikun. Chaynaqa, manam pipas ninmanchu: “Diosmantaqa manam imatapas yacharqanichu”, nispaqa.

²¹ Paykunaqa Diosta reqsichkaspankupas manam Diosta hinachu hatuncharqaku, nitaqmi graciastapas qorqakuchu. Aswanraqmi yanqakunata yuyaymanaspanku mana allin sonqonkuta tutayarachinku.

²² Yachaysapapaq hapikuchkaspankupas mana yachayniyuqmi rikurirunku.

²³ Wiñay kawsaq Tukuy Atiyniyuq Dios yupaychaytam tikrarunku, hinaspam wañuq runakunapa rikchaynintaña chaynataq alton pawaqkunapa, tawa chakiyuq animalkunapa, pampan puriq urukunapa rikchaynintaña yupaychanku.

²⁴ Chayraykum Diospas millakuypaq kawsakuymanña kachaykun, mana allin sonqonkupa munasqanpi purinankupaq, chaynapim kikinkupura qanrakuspanku hatun millakuypaq kaqkunata ruwanakunku.

²⁵ Diospa cheqap kaqninkunatam tukuy llulla kaqkunamanña tikrarunku, hinaspam unanchaq Diosta qonqaruspanku unanchasqan kaqkunataña yupaychaspa servinku. ¡Diosllam wiñaypaq yupaychasqaqa kanan! Amén.

²⁶ Chayraykum Diospas millakuypaq ruwaykunamanña saqeykun. Chaynapim warmikunapas manaña qariwan kaspa mana ruwanakunataña ruwanku.

²⁷ Chaynallataqmi qarikunapas, manaña warmiwan kaspa, kalintapi animal hinaña kallpakachaspanku qaripuraña munapayanakunku, hinaspam millakuypaq mana ruwana kaqkunata kikinkupura ruwanakunku, chaynapim chay millakuypaq kaqkuna ruwasqankumanta castigota cuerponkupi chaskispa ñakarichkanku.

²⁸ Diosta mana kaqpaq hina hapisqankuraykum, Diospas mana allinkuna yuyaymanaymanña saqeykun, chaynapi mana ruwana kaqkunataña ruwanankupaq.

²⁹ Chaymi paykunaqa kay mana allin ruwaypa huntasqan kachkanku: Waqllikuqkuna, millakuypaq kaqta ruwaqkuna, qollqella kuyaqkuna chaynataq hukpa kaqninta munapayaqkuna, runa wañuchiqkuna, kikillanpaq munaqkuna, engañakuqkuna peleolla kuyaqkuna, cuento qepikuna,

³⁰ runamasinpa qepanpi rimaqkuna, yanqakunamanta tumpakuqkuna, Diostapas cheqniqkuna, kutipakuqkuna, hatun tukuqkuna, mana allin ruwayllapi yuyaymanaqkuna hinaspa tayta-mamankutapas mana kasukuqkuna,

³¹ allin kaqkunatapas mana entiendey munaqkuna, rimasqankutapas mana ruwayman churaqkuna, mana kuyapayakuqkuna, paykunaqa manam pitapas llakipayankuchu.

³² Paykunaqa yachankum chayna ruwaqkunaqa wañuypaq Diospa sentenciasqan kasqankuta, ichaqa yachachkaspankupas hinallam ruwanku, hinaspam chay mana allin ruwaqkunapa ruwasqanwanpas kusikunku.