Proverbios 9 - CHUYA QELLQA La Biblia en Quechua de Ayacucho 2012

Yachaymantawan mana yachayniyuq kaymanta

¹ Yachaymi wasinta hatarichin, qanchis pilarninkunatam labrarachin,

² animalkunata wañuchispam convidota ruwarachin, allinnin vinota alistaruspam mesanta mastarachin.

³ Criadankunatam kamachin, llaqtapa alton orqomanta kaynata qayakunankupaq:

⁴ “Mana yachayniyuqkuna asuykamuychik”, nimunankupaq. Mana allin tanteakuqkunatapas kaynata nimuychik:

⁵ “Hamuspa convido ruwachisqayta mikuychik, vino alistasqayta upyaychik.

⁶ Pisi yuyayniyuq kaynikichikta saqespaqa kawsankichikmi, yachayniyuq runakuna hina kawsaychik”, nispa.

⁷ Hatun tukuq runata corregispaykiqa insultasqam kanki, mana allin ruwaq runata qaqchaspaykiqa uchuychasqam kanki.

⁸ Mana kasukuq runaqa qaqchaptikipas cheqnirusunkim, yachayniyuq runam ichaqa qaqchaykuptikipas kuyasunki.

⁹ Yachayniyuq runata yachachiptikiqa aswan yachayniyuqraqmi kanqa, allin kawsakuq runata yachachiptikiqa aswan yachayniyuqraqmi kanqa.

¹⁰ Dios kasuyqa yachaypa qallariyninmi; Chuya Diosta reqsiyñataqmi yachayniyuq kay.

¹¹ Yachaymi nin: Unay punchawkunam kawsakunki, wataykikunapas yapasqam kanqa, nispa.

¹² Yachayniyuq kaynikiqa kikillaykipaqyá kachun, mana kasukuq kaspaykiqa kikillaykim ñakariyta tarinki.

¹³ Mana yachayniyuq warmiqa piñanakuylla hatarichiqmi, mana yuyayniyuqmi, imatapas llutanpi ruwaqmi.

¹⁴ Payqa wasinpa punkunpi tiyaykuspanmi, llaqtapa alton moqokunapi tiyaykuspanmi,

¹⁵ ñannin pasakuqkunata, hawka purikuqkunata qayan:

¹⁶ “Mana yachayniyuqkuna hamuychik”, nispa. Mana yuyayniyuqkunatam kaynata nin:

¹⁷ “Suwasqa yakuqa miskillañam; pakakuspalla tanta mikuyqa miskillañam”, nispa.

¹⁸ Chay runakunam ichaqa mana yachankuchu chaypiqa wañuy tarikusqanta, chay warmipa convidasqankunaqa wañuyman apakuq kasqanta.