Proverbios 7 - CHUYA QELLQA La Biblia en Quechua de Ayacucho 2012

Pierdekuq warmipa engañakuyninmanta

¹ Churilláy, yachachikuyniykunata kasukuy, kamachikuyniykunata sonqoykipi waqaychay.

² Kamachikuyniykunata kasukuy, yachachikuyniykunata ñawi ruruykita hina waqaychay, hinaspaqa kawsankim.

³ Dedoykikunaman watakuy, tablapi qellqachkaq hina sonqoykipi qellqakuy.

⁴ Yachaytayá niy: “Qamqa paniymi kanki” nispa, yuyayniyuq kaytañataq niy: “Qamqa aylluymi kanki”, nispa.

⁵ Paykunam qosanta engañaq warmimanta librasunki, chayna warmipa miskillaña rimayninmantam waqaychasunki.

⁶ Wasiypa ventananmanta qawarispaymi,

⁷ jovenkunapa chawpinpirikururqani mana ancha yuyay hapiq joventa.

⁸ Paymi callenta rispan chay warmipa wasin lawman esquinata muyuykurqa.

⁹ Tardeykuruptinmi tutaykamurqaña.

¹⁰ Hinaptinmi paywan tupananpaq qonqayta huk warmi lloqsiramurqa, chuchumikapa pachanwan pachasqa, sakrillawan engañananpaq.

¹¹ Rimaysapa mana penqakuq warmi, wasipi mana takyaq warmi;

¹² chayna warmiqa callekunapim, plazakunapim, wichirachinanpaq purikuqkunata wateqachkan.

¹³ Paymi chay joventa abrazakuykuspan muchaykurqa, hinaspam mana penqakuspan nirqa:

¹⁴ “Dioswan allinlla kasqaymanta ofrendata qonaypaqmi prometekurqani, chaytam kunan cumpleramuni.

¹⁵ Chayraykum qanwan tupaykuq lloqsimurqani, uyayki qawaykuytam munarqani, kayqaya tariykamuyki.

¹⁶ Camaytam sumaqta allicharamuni, Egiptomanta kaq lino colchakunawanmi qataramuni,

¹⁷ miskillataña asnananpaqmi mirrawan, aloewan, canelawan talliykamuni.

¹⁸ Hakuchik, paqarinkama kuyanakuypi sinkakamusun, achikyaqkama kuyanakuypi kusikamusun.

¹⁹ Qosayqa manam hinapichu, karutam illarun.

²⁰ Wayqapi qollqeta aparikuspam illarun, payqa poqosqa killatañam kutimunqa”, nispa.

²¹ Chaynata hikutaspanmi chay joventa wichiykachirqa, sumaqllataña rimasqanwanmi sonqonta suwarurqa.

²² Hinaptinmi chay joven, nakanankupaq toro pusasqa hina, toqllaman wichiykuq luwichu hina, chay warmita qatikurqa.

²³ Sonqonta flecha parterunanta mana yachaspa trampawan hapirachikuq urpitu hinam wichiykurqa.

²⁴ Chaynaqa, churillaykuna uyariwaychik, rimasqaykunata allinta uyariychik.

²⁵ Chayna warmitaqa ama munapayaychu, chayna warmipa ñanninmanqa ama wichiykuychu,

²⁶ payqa achkaqtañam wañunankama wichirachin, kallpanpi runakunatam payqa wañurachin.

²⁷ Wasinpas wañuqkunapa kasqanman apakuq ñanmi, wañuypa munaychakuyninman apakuqmi.