Proverbios 29 - CHUYA QELLQA La Biblia en Quechua de Ayacucho 2012

¹ Huk runa qaqchasqa kachkaspan mana kasukuspanqa, mana pipa ama nisqanmi qonqaymanta chinkachisqa kanqa.

² Allin ruwaq runakuna munaychakuptinqa llaqtam kusikun, millay runa munaychakuptinmi ichaqa llaqta ñakarin.

³ Yachayniyuq runaqa taytantam kusichin, chuchumikaman qokuruq runam ichaqa kapuqnintapas yanqacharun.

⁴ Allinta munaychakuq reyqa llaqtatam takyachin, impuestollata mañakuqmi ichaqa llaqtata chinkachin.

⁵ Runamasinta alabaq tukuq runaqa runamasinpa ñawpaqninpim trampata churachkan.

⁶ Millay runapa wichichiqninqa kikinpa huchallanmi, allin ruwaq runam ichaqa hawka hinaspa kusisqa kawsakunqa.

⁷ Allin ruwaq runaqa wakchakunatam nanachikun, mana allin runatam ichaqa mana imapas qokunchu.

⁸ Chaqwa hatarichiq runakunaqa llaqtatam sasachakuyman apanku, yachayniyuqkunam ichaqa runakunapa piñakuyninta tanichinku.

⁹ Mana yachayniyuq runawan yachayniyuq runa churanakuyta qallaykuspanqa, asispanpas otaq piñakuspanpas manam ima arreglomanpas chayanqachu.

¹⁰ Runamasin wañuchiq runakunaqa allin ruwaq runakunatam wañuchiypi rinku.

¹¹ Mana yachayniyuq runaqa piñakuynintam kachaykun, yachayniyuq runam ichaqa piñakuyninta tanichin.

¹² Sichum huk kamachikuq llulla rimaykunata kasuptinqa, yanapaqninkunapas millay runakunam kanqaku.

¹³ Wakchamanpas, ñakarichikuqmanpas, hina Tayta Diosllam kawsakuytaqa qorqa.

¹⁴ Wakchakunata cheqap kaqwan kamachikuq reypa trononqa wiñaypaqmi takyanqa.

¹⁵ Qaqchakuywan azoteqa yachaytam qokun, munaysapa warmam ichaqa mamanta penqayman churan.

¹⁶ Millay runakuna achka kaptinqa huchapas llumpaymi, allin ruwaq runakunam ichaqa chay runakunapa wichisqanta rikunqaku.

¹⁷ Churikita corregispaykiqa hawka kawsakuytawan kusikuytam tarinki.

¹⁸ Diospa rimariynin mana kaptinqa llaqtapas huchamanmi qokurun, kamachikuyta kasukuqkunam ichaqa ancha kusisqa kanqaku.

¹⁹ Esclavotaqa manam simillawanqa correginachu, payqa uyarichkaspapas manam kasukunchu.

²⁰ ¿Rikurqankichu mana tantearispa rimaq runata? Chayna runamantaqa mana yachayniyuq runaraqmi allinqa.

²¹ Taksa kasqanmanta esclavonta mana imanaqqa qepa punchawmi sasachakuypi tarikunqa.

²² Chaylla piñakuruq runaqa piñanakuyllatam hatarichin, chaylla rabiakuruq runaqa chaylla-chayllam huchaman wichin.

²³ Hatun tukuq runaqa uchuychasqam kanqa, uchuychakuq runam ichaqa hatunchasqa kanqa.

²⁴ Suwaman sayapakuq runaqa kikintapunipas cheqnikunmi, ñakachkaptinkupas manam willakunchu.

²⁵ Runapa manchakuyninqa trampa hina wichichiqninmi, Diospi hapipakuq runam ichaqa hawka kawsakunqa.

²⁶ Kamachikuqpa yanapakuynintaqa achkaqmi maskanku, chaywanpas Diosllam justiciataqa ruwan.

²⁷ Allin ruwaq runakunaqa, mana allin runakunataqa cheqninkum; mana allin runakunañataqmi allin ruwaq runakunata millakunku.