Proverbios 21 - CHUYA QELLQA La Biblia en Quechua de Ayacucho 2012

¹ Tayta Diospa makinpiqa reypa ima ruway munasqanpas mayu hinam, Diosmi maymi munasqanman pusan.

² Runapaqqa imaña ruwasqanpas allinpaqmi rikchakapun, ichaqa Tayta Diosmi runapa ruwasqankunata juzganqa.

³ Sacrificiokuna qonamantapas aswanqa, allin arreglotawan allin kawsakuytam. Tayta Diosqa munan.

⁴ Hatun tukuywan, yachayniyuqpaq hapikuruyqa, hinaspa mana allin ruwaypi kawsayqa hucham.

⁵ Allinta tantearispa imapas ruwasqaqa apuyachikunmi, mana allinta tantearispa ruwasqam ichaqa wakchayachikun.

⁶ Llullakuywan huñusqa qori-qollqeqa wañuy maskaqkunapa yanqa munayllanmi.

⁷ Mana allin ruwaq runataqa mana allin ruwayllanmi tuñirachinqa, allin kaqkuna ruwayta mana munasqanrayku.

⁸ Mana allin runapa ñanninqa qewi-qewi hinaspa sasallañam, mana pantaspa kawsakuqpa ruwayninmi ichaqa allin.

⁹ Peleollapi puriq warmiwan hatun wasipi yachanamantaqa, altos kuchupi yachakuymi aswan allinqa.

¹⁰ Mana allin runaqa mana allin ruwayllatam munan, chayna runaqa runamasintapas manam llakipayanchu.

¹¹ Burlakuq runata castigaptikiqa mana yuyayniyuqpas yuyaytam haypan, yachayniyuqta qaqchaptikiqa aswan yachayniyuqmi rikurinqa.

¹² Chuya Diosqa mana allin runapa wasintam qawan, chayraykum mana allin runataqa tuñichin.

¹³ Wakchakunapa qayakuyninta mana uyariq runaqa, yanapakuyta mañakuspapas manam uyarisqachu kanqa.

¹⁴ Pakasqallapi qosqa regaloqa piñakuytapas tanichinmi, pakasqallapi qosqa regaloqa llumpay rabiakuytapas tanichinmi.

¹⁵ Allin arreglo ruwayqa allin ruwaq runatam kusichin, mana allinta ruwaqkunatam ichaqa tuñichin.

¹⁶ Yachaypa ñanninmanta sapaqchakuruq runaqa wañuqkunapa kasqanpim tukurunqa.

¹⁷ Aychan kusichiyman qokuruq runaqa wakchayaypim tukunqa. Upyakuykunata, perfumekunata kuyaq runaqa, manam haykapipas apuyanqachu.

¹⁸ Mana allin runaqa allin runapa rantinpim ñakarinqa, iskay uya runañataqmi allin kawsakuq runapa rantinpi ñakarinqa.

¹⁹ Rabiosa warmiwan yachaymantaqa chunniqpi yachakuymi aswan allinqa.

²⁰ Yachayniyuq runapa wasinpiqa qori-qollqewan aceitem tarikun, mana yachayniyuq runam ichaqa kapuqninkunatapas yanqachan.

²¹ Allin kawsakuytawan kuyapayakuq kayta maskaqqa ancha reqsisqa kaytawan allin ruwayta hinaspa kawsakuytam tarinqa.

²² Yachayniyuq runaqa allin nanachikusqa llaqtatapas vencerunmi, hapipakunanku perqankunatapas tuñirachinmi.

²³ Imam rimasqanta cuidakuq runaqa sasachakuykunamantam librakunqa.

²⁴ Burlakuspa qari tukuqtaqa “hatun tukuq, qara uya, mana penqakuq” nispam sutichanku.

²⁵ Qella runaqa tukuy imayuq kaytam munan, ichaqa manam llamkayta munanchu.

²⁶ Qella runaqa hukpa kaqtam imatapas munan, allin ruwaq runam ichaqa imallantapas qokuykun.

²⁷ Mana allin runakunapa ofrendanqa millakuypaqmi, mana allin sonqonwan qosqankurayku.

²⁸ Mana allin testigoqa chinkachisqam kanqa, cheqap testigom ichaqa uyarisqa kanqa.

²⁹ Mana allin runaqa sonqontam rumiyachin, allin ruwaq runam ichaqa ñanninkunata allichakun.

³⁰ Diospa qayllanpiqa yachaypas, yachayniyuq kaypas, allin tanteoyuq kaypas mana serviqmi.

³¹ Guerraman rinapaqmi caballotaqa alistanku, ichaqa Diosllam vencechiqqa.